استهلاك التليفزيون والرسيفر للكهرباء

[aponadaa177]

بعد اذن الخبراء في حالة انقطاع الكهرباء ما الذى يلزم تشغيل التليفزيون والرسيفر فقط اريد شئ يكون سعره خفيف وشكرا لكم

[saadsaead]

يوجد كونفرتا على بطاريه تعمل لمدة 8 ساعات على التليفزيون والريسفر 2لمبه موفرة
السعر معقول تجدها عند بتوع الريسفرات

[abdelazeez]

سعرها كم اخى الكريم ؟ عشان الواحد ما يدبسش ؟

[saadsaead]

اخى فيه منه كيلو 275 جنية ده بيشغل تليفزيون+ ريسفر+2 لمبه

وكيلو ونصف 400 جنية ده بيشغل تليفزيون+ ريسفر+4 لمبه+2مروحة سقف
تقبل تحياتى ابوياسين

[aponadaa177]

شكرا جدا ابو ياسين

[heshamzn]

طيب مفيش خطر ان الشاشة تتحرق او اى عطل يحدث بها يعنى انا عندى شاشة غالية هل ينفع اجيب لها الكلام دا ؟؟؟ ولا فى احتمال تتحرق يبقى بلاش منه احسن غالية

[ninjawy]

شكرا جزيلا علي المعلومات المفيدة

[الحسام المنتصر]

شكرا جزيلا علي المعلومات المفيدة

[المهندس /هاني عطية]

شكرا جزيلا علي المعلومات المفيدة

[حفيد الصالحين]

موضوع بطاريه السياره اللى ذكره الأخ
غير عملى لأن البطاريه بتضعف بعد فتره وهتضطر تجيب غيرها
وكمان مش بتشتغل اكتر من ساعتين وبتتشحن ميقلش عن 5 ساعات
فالأفضل مولد كهربى حوالى 3 كيلو او 5 كيلو
مش عارف بكام حالياً بس الأسعار عليت عن الأول ويفضل ميكونش صينى
الكورى او الأوربى كويس بس طبعاً اغلى من الصينى
انا عندى واحد كورى 5 كيلو بيشغل شقتين تليفزيون ومراوح ولمبات وكل حاجه
عدا سخان كهربا ومكواه وتلاجه

[aponadaa177]

بكام ال 5 كيلو اخي الفاضل

[cobraxp]

طيب ولو جبت جهاز ups ايه النظام

[aponadaa177]

ايه ups ده هو كمان

[seco beco]

بكام ال 5 كيلو اخي الفاضل وبيحتاج بنزين او سولار اد ايه

[islamsabry2008]

بصو يا جماعة بالنسبة ups ده جهاز داخله 2 كونفرتر واحد من 220 الي 12 فولت والثاني من 12 الي 220 وفي النص بطارية 12 فولت 0.7 امبير ودي بتدي من 10-20 دقيقة للكمبيوتر فقط اذا ممكن انك تجيب بطارية سيارة بدالها تكون 70 امبير تمنها 400 جنيه تقريبا بتشغل كمبيوتر وتليفيزيون ودش و 5 لمبات لمدة 6 ساعات وكل ما تزود تقل المده وبالنسبة للشحن فهو بنفس الطريقة حتي لما الكهرباء تيجي هو بيفضل شغال زي مثبت تيار وبيشحن البطارية في نفس الوقت

المولدة البنزين كل اللي في السوق صيني وهو جيد انا عندي مثلا 5 كيلو بتخرج 2.7 كيلو حد اقصي دلوقتي تمنها في حدود 2000 جنيه وبتشغل شقتين بتلاجة واحده فقط بدون سخان واي لمبات لغاية ما تحس بزغللة في اللمبات يبقي تخفف

ولكن اهم حاجة في المولدة دي ان ملف الدينامو يكون نحاس لان معظم الموجود الومنيوم مطلي نحاس ودي لو هتخرج 2.7 الفعلي بتاعها 1.5 دي اهم حاجة

اتمني ان اكون شرحت شرح وافي

[seco beco]

بالنسبة ups ده جهاز سعره كام

[عاطف السيدهلال]

وده سعره كام وممكن يجي من أين

[هاني عامر2]

انا عندي الاثنين
مولد هوندا 5 كيلو يباني وده من التوكيل في شارع عماد الدين بالقاهرة كنت شارية في 2010 ب8500 تقريبا وجبت واحد من شهر للمسجد بسعر 12500
في عندهم هوندا تيلاند واسمه برافا اسعراها مقربة للصيني بس انضف بمراحل
الدينمو ايطالي نحاس طبعا والمحرك تيلندي
وعندي بالمحل انفرتر صيني مع بطرية 90 امبير وتنجر شحن متكلفة في حدود 1000 جنية 1200 وات بتصفي 600 تقريبا
بتشغل تلفزيون ورسيفر و4 لمبات موفرة ومروحة لمدة 5 سعات تقريبا
العيب انك هتغير البطارية كل سنتين تقريبا وسعرها 500 جنية وده في مقابل انك مشهتجيب زيت وبنزين للمولد