إلي متابعي التلفزيون القدامي تعالوا نسترجع الذكريات ونشوف مين فاكر

[hany yasser]

مين فاكر لما كانت قنوات النيل للرياضة والدراما والمنوعات قنوات مشفرة ؟
مين فاكر برنامج الدرجة الثالثة لشوبير علي التلفزيون المصري ؟
طيب مين فاكر قناة ART TEENZ ؟
مين فاكر بطولة دوري أبطال العرب اللي كانت علي قنوات ART فقط ؟

ومين فاكر لما كان البرنامج الرياضي الوحيد في مصر هو برنامج اسبوعي اسمه الكورة مع شوبير علي قناة دريم 2 بيجيب فيه ملخص كل مباريات الدوري
ومكانش بيتذاع مباريات غير للأهلي والزمالك والإسماعيلي علي القنوات المحلية


ومين فاكر لما كان التلفزيون المصري بيذيع كل البطولات العالمية زي كأس العالم وكأس أوروبا وكأس افريقيا ودوري أبطال أوروبا و حتي بطولات أمريكا الجنوبية مجانا
ومكانش في قنوات رياضية مشفرة ولا حقوق ولا الكلام ده
ومين فاكر أول ما ظهر موضوع الحقوق لما التلفزيون المصري اشتري بطولة أفريقيا بالتعليق الفرنسي وكنا بنشغل الراديو ونقفل الصوت

طيب مين فاكر برامج القناة الثانية فترة بعد العصر عالم سمسم والبوكيمون وبات مان وسابق ولاحق ؟
مين فاكر برامج التلفزيون المصري الصبح سينما الأطفال ومازنجر وباور رينجرز وسندباد البحري وبعد الظهر الفيلم العربي الأبيض واسود
وفترة المغرب المسلسل العربي وبالليل الفيلم الأجنبي مع نادي السينما
وبرامج حديث المدينة وخلف الأسوار وعالم الحيوان وحديث الشعراوي يوم الجمعة
طيب مين فاكر مسلسلات هرقليز وزينا وسندباد علي التلفزيون المصري
مين فاكر اعلانات ميلودي تتحدي الملل ؟
مين فاكر لما كانت قنوات MBC بتفتح قناة ورا التانية واليوم اللي فتحت فيه كل قناة وخصوصا يوم افتتاح MBC3 وبعدها MBC4

طيب مين فاكر قناة دريم سبورت ؟
مين فاكر برنامج هنا القاهرة بتاع علاء الصادق اللي كان عامله عشان يشتم الحكام :D ؟
ومين فاكر قناة الحياة أول ما فتحت لما كانت قناة واحدة هيا الحياة الحمراء وبدأت ببرنامج شوبير برضوا وكان بيقعد لقرب الفجر وده اللي عرف المصريين علي القناة وجاب مشاهدين ليها
فاكرين يوم لما فتحت قناة مودرن سبورت والإعلان الكبير بتاعها في الجرائد لما كانت جايبة كل مذيعين الرياضة في مصر وكان افتتاح القناة جميل
ولما كانت بتعرض الدوري الفرنسي ودوري الدرجة الثانية

طيب مين فاكر لما مصر كانت بتلاعب موريشيوس ومدغشقر في تصفيات أمم أفريقيا وكنا بنكسبهم ستة وسبعة ؟
مين فاكر الجزيرة الرياضية لما كانت قناتين بس ومفتوحة وبتجيب كل بطولاتها مجانا للجميع ؟
ومين فاكر برنامج مشروع معلق علي الجزيرة ؟
طيب فاكر برنامج ستار ميكر علي التلفزيون المصري وحجازي متقال لما كان كل أعضاء اللجنة ومنهم حلمي بكر وحسن أبو السعود وجيهان مش عاجبهم وكان بينجح بصوت الجمهور وعملهم أغنية بأسماء أعضاء اللجنة

طيب مين فاكر في رمضان التلفزيون المصري لما كنا نفطر ونقعد نتفرج علي بكار ثم الكاميرا الخفية لابراهيم نصر والفوازير ومقلب دوت كوم وكل برامج رمضان

فاكرين لما مكانش في طريقة نشوف بيها الأفلام الجديدة الا علي روتانا سينما وكانت تجيب اعلان الفيلم الجديد قبلها بشهر ونفضل مستنيين اليوم والساعة اللي هتعرضه فيها

طيب مين فاكر لما نزلت جميع القنوات المحلية من الأولي الي الثامنة علي النايل سات واتشالت تاني بعدها
مين فاكر لما كان النايل سات كله علي بعضه ميوصلش لربع عدد القنوات الحالي
ومين فاكر سبيس ستون لما كانت قناة الأطفال الوحيدة وكانت بالنسبة لنا رائعة وخصوصا حلقات القناع
مين فاكر لما كنا نسمع أي خبر سياسي نقوم جايبين الجزيرة لإن ببساطة مكانش في قنوات اخبارية غيرها وكان كل الشعب المصري المثقف بيقول عليها كويسة قبل ما يمسكها الناس اللي مسكوها دلوقتي

ومين فاكر لما كنا منعرفش يعني ايه HD و SD وليه التلفزيونات الجديدة مستطيلة مش مربعة ؟

ومين فاكر لما كانت القوات المحلية بتجيب السلام الوطني وتقفل بالليل

وحاجات كتير بس ده اللي افتكرته دلوقتي
لو فاكر كل ده يبقي انت من عشاق التلفزيون القدامي :)
_________
HANY YASSER

[اسامه الملكى]

موضوع جميل بارك الله فيك

رجعتنا لايام زمان كانت ايام جميله

[م/السيد الغرباوى]

ياراجل دا انت من ايام زمن الفن الجميل

[سعيد عاشور]

قول للزمان ارجع يازمان انت بقي فاكر قنا النايل تي في الزرقا كانت معظم برامجها انجليزي وفرانساوي بس كانت بتجيب مسلسل مصري كل يوم الساعه 6 وكمان فاكر النشره اللي باالفرنساوي الوحيده الساعه 6علي القناه 2
وطب وفاكر لما كانت ام بي سي قناه واحده وكانت بتجيب دوري ابطال اوروبا بتعليق الكابتن حماده امام
وكانت كل خميس في التلفزيون المصري حفلات اضواء المدينه وليالي التلفزيون بث مباشر من مارينا
وكانت بتجيب اعتاه نجوم الغناء
واتحاد ازاعات الدول العرابيه لما كان بيشتري البطولات ويوزعه علي القنوات العربيه الفضائيه والارضيه
زمان التلفزيون الجميل فتك به علم التشفير واالحقوق التلفزيزنيه والحصريات وضاعات حلوة التلفزيون زمان يا عرب

[alaaamma]

طيب فاكر انتا ايام رمضان وسلسل السندباد وقت السحور ومسلسل ابو زيد الهلالي بعد العشاء وكمان فاكر فلم القناه التانيه يوم السبت الساعه عشره الصبح وفلم يوم الجمعه الساعه 3 قبل العصر علي القناه الاولي وفلم يوم الثلاث الشاعه 4.30 علي القناه السابعه وفلم شمس الزناتي لما كان بييجي علي القناه الاولي مبيكونش في حد في الشارع

[تامر منسي]

بجد انت رسمت الابتسامه علي وشنا بالذكريات الجميله ديه

[batista_cena]

رجعتنا لايام الزمن الجميل :)

patch_lov-patch_lov-patch_lov-

[hima5300]

ربنا يكرمك
الواحد كان قاعد يفتكر ويتحسر علي االلي هو فيه دلوقتي

[اسامة يسرى]

بجد انت رسمت الابتسامه علي وشنا بالذكريات الجميله ديه

[gameyking]

موضوع جميل جدا ياريت يكون فيه قسم اسمه زكريات من عمر فات زي الفيس

[الفنى.كريم]

موضوع جميييييييييييييييييييييييييييييييييييييييل جدا فكرني بالزمن الجميل ومسلسلات زمان شارع المواردي- والرحايا -والوهم والسلاح - والسبنسه وغيرها واغاني اطفال زمان فولا فولا -وسوسه كف عروسه - وذهب الليل وطلع الفجر-------------------

[وليد حبى]

patch_lov-patch_lov-patch_lov-patch_lov-

الله عليك

[الامبراطور محمد]

وكفاية الناس كان عندها أخلاق والصغير بيحترم الكبير والناس بتساعد بعضها وحاجات كتير كويسة

[mettoo]

أياااااااااااااااااااااااااااااااااااااام لاتعوض

[محمدسالم بكر]

موضوع غاية فالروعة ومايعرفش انه موضوع جميل غير اللى عاش جزء من الزمن الجميل ده...زمن لما كانت العيلة بتجتمع مع بعض علشان تتفرج على مسلسل بعدالعشاء او دورى أبطال اوربا على القناة التانية ولاكاس العالم ....ولالما كنا نستنى اليوم المفتوح يوم الأحد ....ومين فاكر مسلسل اوراق الورد ...بحق زمن الفن الجميلة لا وزمن كل حاجة فيه جميلة ....

[forgotyou11]

فاكر انت اما كنا بنستنى من العيد للعيد عشان نتفرج على فيلم هندى تعالى شوف دلوقتى

[شكرى المنياوى]

ياسلام فكرتنى بالزى مضى
بارك الله فيك

[osamapp]

أياااااااااااااااااااااااااااااااااااااام لاتعوض

[scre3m]

طاب حد فاكر بانوراما فرنسية ولا برنامج اخترنا لك على القناة التانية ولا فى رمضان برنامج بدون كلام

[يوسف ماضى]

طيب انت فاكر بانوراما فرنسية اللى كان بيجيب افىم فرنسية كان برنامج رووووعة وكمان برنامج تاكسى السهرة وكمان مسلسل ذئاب الجبل لما كان بيجى الساعة 8 مكنتش بتلاقى حد ماشى فى الشارع وصلت مرة انا واحد مات فى بلد جنب بلدنا قالو فى المكرفون الدفنة بعد مسلسل زئاب الجبل والله حصل عندنا فى قرية بجوارنا والله احلى ايام وناس زمان الطيبين فعلا كل حاجة قولتة انا حضرتة وكل حاجة لية زكرى معاى شكرا اخى الكريم