استفسار هاااااااام بخصوص ال ADSL

[ميدووو باشا]

لو سمحتوا ممكن اعرف لو فى حد هنا السنترال غير عنده ارقام التليفون الارضى والكابلات اتحولت من نحاس لفايبر؟ والنت جالك بعد اد ايه لما فصل بسبب تغيير ارقام التليفونات؟؟؟ لان انا مشترك مع فودافون والنت فاصل عندى من يوم 22/9 بسبب تغيير ارقام التليفونات الارضى وتحويل الكابلات من نحاس لفايبر .. وكل ما اكلم الشركة يقولولى ان فى صعوبة فى التركيب من الشركة المصرية للاتصالات وان الفايبر بياخد وقت شوية فى تركيبه .. فا عايز اعرف هل الكلام دا صح ؟ والى حصل معاه كدا النت جالك بعد اد ايه؟ وشكرا مقدما patch_lov-

[Ahmed Eshish]

شركة tedata محتكرة الفيبر في مصر للاسف هتضطر تحول ل tedata لانك مش هتعرف توصل تاني من فودافون

[نادر زاهر]

سمعت ان اجهزة التشغيل غير موجودة الاف تى داتا

[عبدومحمود]

انا عندى بيتم تغير الكبل القديم باجديد اللى هو الفيبر شغالين منذو شهر وعملية الانتهاء فى شهر 11 الجاى

[elraiekawy]

السلام عليكم
بص يانجم الخط تم تغييره من نحاس لفايبر فى خلال شهرين
و بعد كده تاخد اسبوعين لما ينقلوا بياناتك من الخط القديم للجديد
وبعد كده تروح تى داتا غصب عنك و تشترك معاهم فى خلال اسبوعين حتى لو الشركة اللى انت معاهم بتدعم الفايبر الموضوع بيطول جدا ده لو ركبوا لك

بس الحق يقال بعد تغيير الخط من نحاس لفايبر مفيش مشاكل و السرعة بتوصلك كاملة

[mohamedfawzyhassan]

بص يا باشا ... فى طريقتين للتحويل ل فايبر ... الطريقه الحاليه اللى شغالين بيها ان الخط بيبقى فايبر لغايه الكابينه و بعد كده بيبقى نحاس لغايه البيت عندك ... و دى اسوأ حاجه لسببين :

1- هتحتاج جهاز يركب فى الكابينه و ده محتكر من TE زفت
2- هتحتاج تعمل كونفجريشن للخط بتاعك و برضه المصريه للأتصالات محتكره الموضوع برضه و مبتعملوش غير ل TE زفت

من الأخر عصابه و احتكار و حاجه تقرف

بعد مرورى بنفس تجربتك ... للأسف غيرت من فودافون ل TE .. النت رجع فى 24 ساعه و الخط قارى سرعه 16 ميجا ... لانى مشترك معاهم فى طلقه

مع انى فضلت حوالى شهر بتابع مع فودافون بعد تحويل الخط و اعرف مديرين كبار هناك ... ومكنش فى اى حل ولا حتى مده متوقعه لتشغيل الخط ... بسبب عصابه و احتكار TE مع المصريه للأتصالات

اخر ملحوظه ... فودافون برقبه بتوع البليله TE فى الخدمه و نوع الراوتر و كل حاجه ... بس مفيش حاجه فى ايديهم يعملوها و بيخسروا عملا كتير بسبب احتكار عصابات الدوله ... و الموضوع بيكبر و هيتقدم شكوى رسميه بيه لوزير الأتصالات

[حسن الاسمر]

لو سمحتوا ممكن اعرف لو فى حد هنا السنترال غير عنده ارقام التليفون الارضى والكابلات اتحولت من نحاس لفايبر؟ والنت جالك بعد اد ايه لما فصل بسبب تغيير ارقام التليفونات؟؟؟ لان انا مشترك مع فودافون والنت فاصل عندى من يوم 22/9 بسبب تغيير ارقام التليفونات الارضى وتحويل الكابلات من نحاس لفايبر .. وكل ما اكلم الشركة يقولولى ان فى صعوبة فى التركيب من الشركة المصرية للاتصالات وان الفايبر بياخد وقت شوية فى تركيبه .. فا عايز اعرف هل الكلام دا صح ؟ والى حصل معاه كدا النت جالك بعد اد ايه؟ وشكرا مقدما patch_lov-
السلام عليكم اخى ردا على استفسارك اولا التعديلات الجديده تستغرق مدة 40 يوم بأقصى تقدير ثانيا لو خطك الارضى كان جاى من سنترال بعيد وتم ترحيل خطك لسنترال اقرب فسيتم تغيير رقمك وبالتالى ستعتبر بالنسبه لاى شركة dsl مشترك جديد ودى ميزه مش عيب لانك ستستلم راوتر جديد هديه +اشتراك 6 شهوربنصف المبلغ المقدر للسرعه المراد الاشتراك عليها من تجربتى مع كل الشركات اقول لك الافضل لك تى اى داتا
اما فى حالة عدم تغيير الرقم الارضى فأن كل شىء سيظل كما هو بأستثناء انك لازم تتصل بالشركه مقدمة الخدمه الخاصه بالdsl وتبلغهم بالعطل من اول يوم حتى يتم تعويضك عن فترة الانقطاع
سيعود الخط الارضى اولا ثم عليك بأبلاغ شركة النت لاعادة الخدمه وده بياخد48ساعة عمل ليس من بينها العطلات الرسميه وشكرا

[ميدووو باشا]

يعنى يا جماعة من رأيكم انى احول تى اى داتا وخلاص بدل ما افضل مستنى على الفاضى؟؟؟

[REDA93]

الفيبر تمام

[عمرو عفيفي]

يعنى يا جماعة من رأيكم انى احول تى اى داتا وخلاص بدل ما افضل مستنى على الفاضى؟؟؟

حول واكسب وقت
لان لحد الان مفيش شركات شغاله علي الفايبر
غير tedata

[ميدووو باشا]

يا جماعة انا كلمت فودافون وقالولى انهم بدأوا فعلا فى توصيل الخدمة للكابلات الفايبر .. وكمان قريت على النت ان فودافون واتصالات اخدوا حق التوصيل لكابلات الفايبر خلاص .. فا انا مش عايز احول ع الفاضى ل تى اى داتا دى واقعد حوالى شهر عقبال مالخدمة تيجى .. وبعدين انا كنت مشترك معاها من كام سنة وشركة زبااااااالة جدا

[sheko fun]

لو حضرتك عايز رأيي يا أستاذ ميدو :



أستني شركة فودافون أو اتصالات افضل .

شركة TE Data دي شركة معدومة الضمير اساسا ولو اشتركت فيها مش هتشوف نت وهيرتفع الضغط عندك لأن ايام هتلاقي نت لاكن بطيئ جدا وايام مقطوع وايام شغال .

وكمان عشان تخرج من عندهم وتنهي الإشتراك هيدوخوك السبع دوخات وتقعد اكتر من شهر تستني ال Cancelation number

فأنت قضيها بوصلة نت مثلا من احد جيران حضرتك او من أي سايبر قريب من حضرتك وصل واي فاي ... لغاية ما فودافون او اتصالات تدخل الخدمة .



انا حبيت اقول رأيي المتواضع لأن هنا كلنا اخوات ونخاف علي مصلحة بعض .... وفي النهاية اتمني ان حضرتك تاخد القرار الصحيح .


بالتوفيــــــــــــــــــــــــــــــــق إن شاء الله .

[M.Tifa]

مشترك فى TEdata سرعة 1 ميجا بـ 140 جنيه
النظام القديم , النت فصل شهر ونص تقريبا ً
لغاية ما ركبوا الفايبر وغيروا الرقم ورجعوا النت تانى
يدوب لسه النهارده المغرب بس راجع !
وكان المفروض ان الاشتراك خلص بس اخدت تعويض
عن الفترة ال غاب فيها النت لأن اخر شهر ليا مستخدمتش منه كتير

سرعة الداون لوود مستقرة الى حد ما

http://store2.up-00.com/2015-10/1444252925391.png

ال Ping قليل عن زمان بكتير بس ما زال فى تقطيع
والموضوع دا محتاج اجربه على اكتر من جهاز
عشان اتأكد , لأن احيانا ً الجهاز بيبقى السبب بصراحة ف ان ال ping
يبقى عالى او فيه تقطيع

http://store2.up-00.com/2015-10/1444252781961.png

الكابلات فايبر لغاية الكابينه اللى بعيده عن البيت بحوالى
100 متر تقريبا ً انما واصلنى سلك نحاس ف النهاية

[sheko fun]

لو ال ping الي عند حضرتك ده اثناء التحميل من الdownload manager يبقي حلو .

لاكن لو مش بتحمل حاجة ولا مستخدم اي صفحة نت والبنج كده .... يبقي فيه حاجة مش مظبوطة خاااالص .

[حمادة ابو حلو]

تى داتا تمام 8 ميجا بدون استخدام عااااااااااادلhttp://www.3rbz.com/image194369.html

[بيزوووووو]

والله انا مش عارف اقولك اية انت كدة فى رحمة

انا من يوم 19/5 النت فصل ومجاش لحد دلوقتى

ولغيت التعاقد القديم وعملنا تعاقد جديد وطلعوا عليا فواتير

علشان مش يعملوا الغاء ومموايل كدة

ولسة مستنى انة يجى والله كلهم شركات زبالة

ومن الاخر المصرية للاتصالات مش هتركبلك حاجة

وهتخليك غصب عنك تحول ل دى زفت

مكنش كدة اصبر بقا زى حالاتى

[الحمادوى]

انا حاليا على خط بتاع واحد صاحبى تبع تى اى داتا
وقدمت على خط تليفون جديد
وكنت بفكر اجرب شركة تانية وكنت ناو ى على اتصالات
واحد معرفة فى السنترال
كان قايلى من فترة ان قبل السنة دى ما تخلص هيركبوا الفايبر فى منطقتنا
وقالى فعلا ان الخطوط هتكون تبع شركة تى اى داتا

ايه رايكوا اشترك مع تى اى داتا من البداية وخلاص
ولا اجرب شركة تانية
زى ما كنت ناوى؟

[YES ACTION]

هو سرعة الفايبر بتوصل لكام يا شباب وهايبقي في استخدام زفت الطين ولا مفيش

[hazzuma]

قبل السنة دى ما تخلص هيركبوا الفايبر فى منطقتنا





منطقتك إيه؟ تحياتى

[الحمادوى]

منطقتك إيه؟ تحياتى

انا من دمياط
يعن خارج نطاق العاصمة
M-Dg