بخصوص موقع الكشف الطبي لمعاش كرامه و بطاقة الخدمات المتكامله..

[إبراهيم داود]

هاوضح لحضراتكم بعض النقاط الهامه بخصوص موقع الكشف الطبي لمعاش كرامه و بطاقة الخدمات المتكامله عن طريق طرح اسئله والإجابه عليها

https://www11.0zz0.com/2023/04/17/11/652643533.jpg (https://www.0zz0.com)
ألسؤال الأول
ليه الموقع مايفتحش كل الإعاقات فكل المحافظات طول اليوم ؟
الإجابه
لأن عدد ذوي الإحتياجات الخاصه اللي طالبين الحصول علي بطاقة الخدمات المتكامله بالجمهوريه كتير جدا يتجاوز تقريبا ال 8 مليون مصري
يعني لو الموقع فتح لكل الأعاقات فكل المحافظات
الوزاره مش هاتعرف توفر لجان طبيه للكشف علي كل العدد ده فالمجالس الطبيه
ولا هاتقدر توفر مستشفيات طبيه لعمل التقارير والأشعات اللازمه للمرحله الثانيه
السؤال الثاني
إمتي إعاقة كذا في محافظة كذا هاتفتح ؟
الإجابه
محدش يعرف ولا حد عنده أي معلومه تخص مواعيد ولا حتي ايام فتح الموقع لمعاد كشف إعاقه معينه ولا محافظه معينه
لأن الموقع ماشي بطريقة الروتيشن ( يعني مالوش نظام محدد ولا معاد معين ولا يوم بعينه ولا إعاقه بذاتها )
السؤال الثالث
إيه التقارير الطبيه اللي بارفعها علي الموقع عشان احجز ؟
الإجابه
إنت مش بترفع أي تقرير علي الموقع خااااااااااااالص
إنت بتحجز علي الموقع معاد للكشف لعمل تقرير طبي مميكن
ثم تجهز التقرير والأشعه المطلوبه لنوع إعاقتك
ثم بتتوجه للمجلس الطبي التابع لمحافظتك فالوقت والتاريخ اللي حجزت فيهم
ثم بيتم الكشف عليك وبتسلمهم التقارير الطبيه والأشعه المطلوبه منك
ثم تنتظر فتره من الزمن وتدخل علي الموقع تستعلم عن نتيجة كشفك
ثم بتصدرلك البطاقه
السؤال الرابع
هل ينفع أعمل نفسي ناصح واحجز معاد كشف لنوع اعاقتي فمحافظه تاني ؟
الإجابه
هاينفع من حيث الموقع
لكنك هتلبس فحيطه سد وهاتروح اللجنه تكشف
هايرجعوك تاني لان بطاقتك مختلفه عن محافظة المجلس الطبي يا عم الناصح
السؤال الخامس
أنا مثلا إعاقتي بتر الرجل وظاهره لاي حد يبقي ليه أجيب تقرير طبي ؟
الإجابه
صحيح الأعاقه ظاهره ومش محتاجه لتقارير
ولكن الوزاره شرطت كده
يبقي هاتمشي زي ما الوزاره مشترطه عشان طلبك مايترفضش
ولو عايز تجرب براحتك
بس لو طلبك إترفض سعتها ماتلومش غير نفسك
السؤال السادس
أنا مثلا إعاقتي بصريه ومش عارف اجيب الرسم الكهربي للشبكيه ده
هل اروح من غيره ؟
الإجابه
ممكن تروح ولكن انت وحظك
لو كشف عليك فاللجنه الطبيه دكتور إبن حلال ممكن يعديهالك
إما لو كشف عليك دكتور معقد نفسيا هيديلك غير مستحق