بحبك يا مصر
 

فرحان.. أكيد

قلقان.. أكيد

خايف علي الحلم الجديد
......
خايف من الليل العنيد

وبمد إيد للشمس لما تبتسم

فجأة العفاريت القديمة تترسم وتمد إيد

وألاقي صوت بيهزني جاي من بعيد

بيقولي فووووق...

الصعب لسه ف أوله

والحِمل مين يتحمله؟

والريح شديد

إوعاك تقول

تل الحمول داب وانصهر

دا اللي ظهر

فتفوتة من جبل الجليد

أرجع وأخاف

وأشد علي راسي اللحاف

وأسأل همومي يا تري

لحد إمتي هتفضلي متسمرة

فوق الكتاف

ألاقي نور الشمس بيرش الدفا

ويقولي قوم.. مش وقت نوم

كل اللي فات م العمر كوم

والجاي كوم

حلمك في إيدك

والطريق للخطوة بان

ومافيش هنا غيرك ضمان

طول ما انت حارس ع البيبان

طول ما أنت حاضر..

ف المواقع والمصانع والغيطان

طول ما أنت صامد ف الميدان

طول ما أنت وسط الناس

ومش واقف وحيد

أملك ف بكرة الجاي يزيد

والهم والأحزان تهون

ومن الطبيعي إنك تكون

فرحان.. أكيد

قلقان.. أكيد

حودة الجوكر
tvtv53

تسلم اديكم بجد واللة العظيم مصر هتفضل طول عمرها شيلة ليكم الجميل