[محمود رشوان]

الجحش قال للحمار *** يابا اديني الحنطور

يابا انت سنك كبر*** و وجب عليا الدور

كح الحمار كحة *** فزعت لها الركاب

مش يابني بالصحة *** ده كل شئ بحساب

وسواقة الحنطور *** محتاجة حد حكيم

وانت عينيك فارغة *** همك علي البرسيم

قوللي تسوق ازاي *** والتبن مالي عينيك

ده حتي حبل اللجام *** واسع يا ابني عليك

اعقل وبطل طمع *** لاتسخن الركاب

ما تجيش يا واد جنبهم *** لاتبقي ليلة هباب

دول صنف ناس جبار *** قادر مالوهش امان

يبان عليهم وهن *** لكنهم فرسان

يابا دا نومهم تقل *** وبقاله يابا سنين

كل البشر صحصحوا *** ولسه دول نايمين

يا جحش بطل هبل *** وبلاش تعيش مغرور

ركابنا مش اغبيا *** ولا عضمهم مكسور

بكرة حيصحولك *** ويزلزلوا الحنطور

وتلاقي في قفاك *** تمانين خازوق محشور

___________________

أحمد فؤاد نجم

[نۨــٰا̍صــر ؏ــڶــۍۧ]

وتلاقي في قفاك *** تمانين خازوق محشور


يا ريت تيجى على القفا كانت تبقى سهله .

[عبده نت]

طيب ايه رايك فى دى كمان

دا شعب فقرى

للشاعر أحمد فؤاد نجم

نظرا لأن النعمة فاقت حدها
ولأننا مش قدها
ولأن فعلا انجازاتك
فوق طاقتنا نعدها
ولأننا غرقنا في جمايل
مستحيل حنردها
نستحلفك ....... نسترحمك
نستعطفك .......نستكرمك
ترحمنا من طلعة جنابك حبتين
عايزين نجرب خلقة تانية
ولو يومين
اسمع بقى
إحنا زهقنا من النعيم
ونفسنا في يومين شقا
عايزين نجرب الاضطهاد
ونعوم ونغرق في الفساد
بيني وبينك حضرتك
دا شعب فقرى مايستحقش جنتك
أنا عارفه شعب ماينفعوش
إلا شارون وبلير وبوش
عايز يجرب الامتهان
ويعيش عميل للأمريكان
بيمد "غازه" لإسرائيل
ويومين كمان ويمد نيل
أهو يعنى نشرب ميه واحدة
ندوب في بعض
ماء وماء وماء
ونفض سيرة الانتماء
وبلاها نعرة وطنطنة
تبقى البلاد "مستوطنة "
(متسلطنة بالسرطنة)
إيه اللي خدناه م الكرامة والإباء
حبة خطب وكلام...كلام
إحنا راهننا على النظام
ورضينا بخيار السلام
بخيارحنسد عين الشمس بيه
علشان مايطلعش النهار
ويطلع لمين؟
حبة معارضة مغرضين؟
وحسب بيان السلطة
شلة مأجورين؟
ياعم فضك سيرة
وارضى بقسمتك
دا شعب مش فاهم أكيد
يالا اطرده من رحمتك
وإن كنت غاوي الحكم
خليك مطرحك
حاغطس واقب وأعود
بشعب يريحك
راضى وعمره مايجرحك
أخرس ومايسمعش
وأعميلك عينيه
مش كل قرش يبص فيه
مايقولش لأه، وفين، وليه
يضرب ينفض في السليم
وعلى الصراط المستقيم
كل اللي يعرف ينطقه
عاش الزعيم
يحيا الزعيم

شكرا لك حبيبى

[محمد ربيع الجمسي]

[فؤاد أحمد فؤاد]

[العميد18]

وصلاح جاهين قال ,, اقلع غماك يا تور وارفص وتف ....... واكسر تروس الساقيه ترفض تلف ,,,,,,,,,قال حبه كده وحبه كده ,,,,,, لنهايه السكه للبير يجف ................... صلاح واحمد فواد افضل من كتب عن الحياه بصوره بسيطه

[امير العذاب]

ههههههههههههههههههههه

[ابو دياب]

الموضوع باين من شكله كدا بيلمح لحد معين

فين فرج باشا حزف؟

[نۨــٰا̍صــر ؏ــڶــۍۧ]

المشاركة الأصلية كتبت بواسطة ابو دياب

الموضوع باين من شكله كدا بيلمح لحد معين

فين فرج باشا حزف؟

ليه حزف ؟
الناس كاتبه موضوع جميل نروح نحوله بقدرة قادر لكلام فاضى وحزف وغيره سيبوا الناس تقول رأيها أحنا فى مصر...........اوى .
وبعدين اللى على راسه بطحه .

[NERMEN]

المشاركة الأصلية كتبت بواسطة ابو دياب

الموضوع باين من شكله كدا بيلمح لحد معين

فين فرج باشا حزف؟

عشان اية يتحذف الموضوع جميل ولايمكن ان نحذف الموضوع لمجرد شكلة