[م/احمدعبدالفتاح]

الانتنا الهايبر لينك ومقارنة مع السيكتور المصري

لو انت صاحب شبكة جديد او قديم ايه افضل انتنا تشتغل بيها فى التوزيع اللاسلكى؟..الأنتنا الهايبر لينك او الأنتنا السكتور الصعيدي بالتفصيل معلومات هامة جدا..


افضل سيستمات بركبها وانا مطمن على اداؤها..
سيستم الهايبر لينك او السكتور الصعيدي مع البوليت...
نتعرف الاول على السيستم علشان نبقى فاهمين الدنيا فيها ايه؟...
ايه هو السيكتور وايه هو البوليت؟..

الأنتنا السيكتور المصري
هى انتنا مهمتها الاولى والاخيرة هى نقل وتقوية اشارة الاكسيس بوينت اللى بتركب عليه علشان توصلها الى مدى اعلى ونطاق اوسع(يعنى تزود الاشارة بالبلدى) يبقى متفقين ان الانتنا هى وسيلة توصيل اشارة لكن مش هى كل حاجة لان بدون اكسس تحتها يبقى كأنك بتاخد حقنة من غير سن؟.!!! هاه ينفع تاخد الحقنة بدون ابرة السرنجة؟!!!
طيب السيكتور دى زاويتها 180 درجة يعنى ايه؟..
هاقولك انا السيكتور 180 درجة يعنى بتبث لكل اللى فى وشها فقط والاجناب اما الخلف فمافيش اشارة وده معنى سيكتور يعنى موجه الى اتجاه معين..
لو حسبناها الانتنا الداير مايدور بتبث 360 درجة..اما السيكتور فهى نص الاتجاه ده وده يخلي السيكتور المصري بنص كفائة الهايبر لينك لعدة أسباب أولها انك بتتكلف ضعف سعر الأنتنا الهايبر لينك لأنك بتشتري 2 بوليت و 2 سيكتور مصري سعرهم بيدخل فى 3 الاف جنيه لكن بتشتري الأنتنا الهايبر لينك مع البوليت سعرهم 1500 جنيه بالكتير يبقى أكيد الى يكسب هوا الأنتنا الهايبر لينك مع البوليت ..
لكن ركز جدا وخد بالك
الانتنا الموجهة دوما اقوى فى الاشارة من الداير مايدور لكن هذا لا ينطبق مع السيكتور المصري لأن اشارتهم زى بعض بالظبط لكن ناخد بالنا أن مفيش فرق فى الأشارة بين السيكتور المصري وبين الهايبر لينك اساسا بالعكس الأنتنا السيكتور المصري تم تجربتها فى سوهاج مرتين وفشلت والأشارة نزلت والشبكات اتلغت وبرضو فى الأسماعيلية وأماكن كتير
!!
طيب نيجى لفكرة مهمة جدا غايبة عن الناس؟!!
ايه اللى مبوظ السكتور المصري ال 18 ديبى !!
خلينا نتكلم كلام بلدى كده انا فاهمه وانتم فاهمينه..
انا راجل صاحب شبكة (عاوز اكل عيش) يعنى ايه الكلمة دى..
يعنى عاوز حاجة متقرفنيش ومتزهقنيش واربط على اى اشارة اشتغل منها واى مكان اشتغل علشان اقدر الم تكلفتى والاقى فلوس اصرف منها
طيب لو جبت بوليت وسكتور مصري(ودى اسال فيها الناس اللى عندها البوليت والسكتور المصري وهما يقولوا لك)

(1) الربط اقل اشارة على الاكسس 30 ديبى (الاشارة دى وانت بتربط وتعمل بحث على اكسس العملاء بتقراها لو اقل من 30 يبقى مافيش نت او فيه وبيقطع فحت)
(2) لاب توب او موبايل ..دى نادرا مايحصل ويمكن يحصل مرة واحدة فى حياتك بس (اسال اللى عندهم السيستم بتاع السكتور المصري)
(3) درجة حساسية عالية جدا جدا للنويز(يعنى الشوشرة..هافهمها لك..لو انت فاتح قناة اف ام وبتسمع اغانى وفجأة دخل عليك قناة قران وقناة اخبار على نفس الموجة ياترى هاتقدر تفهم انت بتسمع ايه؟؟...طيب النويز هى الشوشرة على قناة الارسال اللى بترسل بيها..يعنى لو ربنا كرمك وعملت مصلحة السكتور المصري والبوليت ..وتانى يوم احمد وعادل اصحابك قاموا حطوا جنبك كل واحد برج بوليت وسكتور مصري وتالت يوم البلد اللى جنبك قام اصحابك وعملوا نفس المصلحة واحنا كلنا شغالين على 13 قناة فقط وكل واحد منهم اخد قناة شبه التانى..!!! هاتلبس الليلة وتشيل اوبح انت ومشتركينك ومشتركينهم؟؟..
ماهو اكسيس المشترك هايسمع لاى شبكة من دول؟؟ كل القنوات عاملة شوشرة على بعض ومخلية الليلة طين بالهبل...
السكتور المصري بقى درجة حساسيتها عالية جدا نظرا لانها 180 درجة يعنى مشتتة فى ال 180 درجة وبتحتاج 2 بوليت و 2 سكتور وده بيعمل نويز على بعضه علشان تعمل شبكة والتكلفة بتدخل فى 3000 جنيه لكن البوليت والهايبر لينك بيتكلف معاك 1500 جنيه وده يخلي عدد الأجهزة المتركبة فى الجو بدلا من 2 يبقى واحد يعني لو بلدك فيها 10 شبكات بالسيكتور المصري .. يبقى انتا كدا مش 10 شبكات يبقى دول 20 شبكة لكن لو مركب انتنا هايبر لينك مع بوليت هتبقى 10 شبكات فقط..ثانيا لو حاجة اتحطت عليها اشارتها قليلة زى اكسيس او لاب ربط عليها اشارته قليلة بتبوظ كل شغلها والناس اللى عليها مش ابو اشارة قليلة بس؟..طب تفسير النقطة دى ايه؟..


السكتور المصري قارية اكسس اشارته قليلة وعمالة تحارب علشان تقدر تبعت له داتا يعنى نت وطبعا محاربتها دى على حساب باقى الاكسسات ام اشارة حلوة فيبقى النت زفت الزفت على الحلو والوحش (السيئة تعم)
(4) عد المشتركين على الانتنا السكتور المصري مع البوليت مايزيدش عن 21 الى 25 اونلاين لو اكتر من كده النت يروح فى داهية ويبقى تقيل جدا ومحدش يشتغل

(5)السكتور المصري سعرها 650 جنيه مع العلم اضربهم فى 2 يعني بتحتاج 2 سكتور علشان تغطي 360 درجة يعني التكلفة الأجماليه بتاعت الـ 2 انتنا سكتور مصري 1300 جنيه بالقليل وبتحتاج عدد 2 بوليت معاهم بسعر القطعه متوسط 800 جنيه يعني الأجمالي بتاع السكتور المصري مع البوليت داخل على 3 الاف جنيه

(6) نقطة الصفر...للناس اللى دارسة وعارفة فى المجال اللاسلكى ان تحت الانتنا النقطة صفر الاشارة منعدمة...يعنى السكتور المصري بتاعة الاماكن البعيدة وللاسف مع كتر الشبكات لا عادت شغالة بعيدة ولا قريبة واسمعوا وشوفوا بنفسكم تجاربها عند الناس اللى مركباها

الأنتنا الهايبر لينك..
الانتنا الهايبر لينك يعنى الانتنا الأومني ودوما الأومني افضل من الموجهه الى زي السكتور المصري لأن الأومني بتغطي 360 درجة لكن السكتور 180 وبتحتاج 2 أنتنا..؟.... السر فى الأومني وتركيز الاشارة صح ولا انا غلطان..ناهيك عن نوع التردد....
خد بالك الهايبر لينك يرمى مسافة ابعد من السكتور المصري علشان الهايبر صناعة شركة عالميه امريكية فى الأصل بتصنع فى الصين...لكن السكتور المصري مهما راح وجه فهو متصنع فى مصر بدون أي خبرة كله بتجارب الأجانب والشروحات الموجوده على الأنترنت...
الهايبر لينك...مش عاوز اشارة معينة للربط
الهايبر لينك..بتحمل عد اكسسات اكتر علشان النويز اقل لان حتى لو اصدقائك عاملين شبكات يبقى مفيش حاجه هتأثر عليك مما يزيد كفاءة شبكتك وقدرتك على التميز بين الشبكات فى البلد
الانتنا الهايبر لينك بيشغل اللاب توب والموبايل بكل سهولة (بس نتفق الاول فى النقطة دى) التردد اللاسلكى المجانى اللى كلنا شغالين فيه ده اسمه 2.4 ده ترد عالى وعريض الموجة وكل مالاموجة تبقى عريضة والرقم يعلى كل ماقل قوتها فى الاختراق..يعنى ايه ..اقولك انا ..فودافون وموبينيل واتصالات..دول شغالين على تردات بيدفعوا ليها مليارات الجنيهات للدولة علشان تحميها لهم ومحدش يشتغل معاهم عليها...الترددات اللى شغالين عليها تبدء من 900 يعنى تردد وموجة اقل بكتير جدا وتقدر تخترق فكلما قلت الموجة ترد وعرض تقدر تخترق الجدران..والدليل انت بتشتغل نت تحت البطانية وانت نايم على السرير فى بيتكم وامامك مليون عمارة خرسانة دخلت لك الاشارة ازاى؟...
اما الترد 2.4 فهو ترد (_طخين وملظلظ) يجى يدخل فى الخرسانةيجى له حول فى عنيه ودوار البحر وهوبا يلف ويرجع عليك يعمل نويز:d
يبقى نتفق فى النهاية لان مافيش جهاز لاسلكى من اللى شغالين بيهم يقدر يخترق الجدران فى الاساس ويوصل لللاب توب والموبايل الا فى نطاق يكون مكشوف يعنى نقول 300 متر مثلا ابقى شايف شغلى بعينى
الهايبر لينك ماعندوش النقطة صفر يعنى اربط بيه تحت البيت وفى الشارع عادى..بس برضه بلاش الاحلام الزيادة..لانه دوما افضل من السكتور المصري فبما ان السكتور المصري يستحيل تعمل كده تحتها ولا فى الشارع فهو يقدر يعمل كده بنسب عالية جدا واسالوا اللى مجربين السيستم السكتور المصري ...
)
سعر الانتنا الهايبر لينك 750 جنيه طبعا هتحتاج انتنا واحدة وجهاز بوليت واحد لكن السكتور المصري هتحتاج 2 سكتور مع 2 بوليت يعني بدل 1500 جنيه لسيستم البوليت مع الهايبر لينك هتدفع دم قلبك الضعف 3 الاف جنيه علشان تشتري السكتور المصري مع البوليت
-------------
نقطة الضمان؟..
الهايبر 3 شهور فقط..غالبية التجار بيبيعوها كدا .. طبعا الأنتنا الهايبر لينك معموله فى مصنع ومتقاسة ومعمولها تيست بأحدث الأجهزة العالمية لأنها شركة كبيرة
السيكتور المصرى ضمان مشكوك فيه وغير معلومة المصدر يا دوب كل الناس الى بتبيعها بتتصل بيها بالتليفون وتبعتلك الحاجه وتشتريها زى البطيخة يا حمرا يا قرعة..
--------
نقطة التطوير
السكتور المصري كما هي منذ طلعت السوق (كان نزل دفعة مضروبة غرقت الاسواق ومختومة وسمعنا قصص عن الختم ده ..انقطعت فترة ورجعت اشارتها اقل من الاول كتير جدا..كل مدى الاشارة تقل عن الاول..اسال اللى معاه واحدة قديمة اشارتها ازاى..واللى معاه واحدة جديدة عاملة ازاى.؟وبالعقل تقدر تستنتج اللى بيحصل وكل مدى تقل الجودة والاشارة)

السيكــتور المصرى نزل منه الاصدارة الاولى 18 ديبى. طبعا عالميا فى العالم كله مفيش شركة عملت انتنا سكتور مصري 180 درجة بقوة أعلي من 15 دى بى لكن طبعا أحنا فى مصر تفوقنا عن العالم كله وعملنا سكتور 180 درجة بقوة 18 دى طبعا المصريين علماء ذرة مفيش كلام

وبعدها بقى اتعمل الأنتنا السيكتور المصري بقوة 20 دى بى اى وكمان اتعمل معاها سيكتور بقوة 22 دى بى اى هههههههه وكلهم 180 درجة يعني أنتا متقرطس رسمي ونظمي مفيش شركة فى العالم عملت أنتنا فوق 15 دى بى اى لكن المصريين أم الأختراع عملوا أنتنات أعلي من العالم كله بكتير دايما المصريين سابقين العالم كله فى الاختراعات

-----------
نقطة الحساسية

السكتور المصري استحالة تربط اقل من 30 الى 32 مع العمل ان لو ربطت على 30 او 32 وزاد عد المشتركين الشبكة كلها هاتبقى فى مشاكل يوميا...

الهايبر لينك يربط من 20 ديبى وصورنا التجارب دى كتير جدا فى بداية مرحلة الترويج للانتنا

----------

نقطة هامة جدا جدا

ندخل على موضوع السيكتور الصعيدي
النصـــــــــــــــــب على العملاء باسم الأنتنا السيكتور الصعيدي


فى الايام الماضية وبعد النجاحات التى شهدتها الانتنا لكثرة الطلب عليها وتواجدها بالعديد بل بكل محافظات مصر
قام شخص بنسخ التصميم الخاص بها (الناس كلها اتكلمت على مدة قوة الانتنا ولما نزلنا كمان الاصدارة 2 بالظهر الاستانلس قام بطبع التصميم وعمل نفس الشكل والظهر الاستانلس واطلق عليها السيكتور المصري الى اتكلمنا عنه فوق...انا لا اعيب فى منتجه او منتج غيره انا بس بوضح نقط هامة جدا وللقارىء والمشترى الحكم الكامل
انظر لتاريخ صدور الانتنا الصعيدي 15 ديبى ودي حقيقة عالميه مفيش أنتنا أكتر من كدا فى العالم فده يزود مصداقية صاحب الأنتنا...ثم انظر لتاريخ صدور الانتنا السيكتور المصري 18 ديبى الاولى..هتعرف الحقيقة وقت ما تلاقي السيكتور الصعيدي متقالش عليها انها 18 ولا اتقال عنها 20 ولا 22 دي بي .. يعني العالم كله معملش اعلي من انتنا 15 فى العالم كله واحنا بقى مخترعين وعملنا أنتنا اعلي من أنتنا العالم كله)
انظر لتاريخ صدور الانتنا السيكتور الصعيدي 20 ديبى بالظهر الاستانلس..ثم انظر لتاريخ صدور الانتنا الاستانلس المصري المقلدة واحكم ايضا بنفسك

الطامة الكبرى....
ودى نقطة غايبة جدا عن بال كثيرين
+-50 اوم
هل حد يعلم ايه اللى انا كتبته ده؟...موجب وسالب خمسين اوم...
انظر لسعر الانتنا المصرى من يوم مانزلت هتلاقي سعرها نزل أول مره بقوة 18 دى بى بسعر 500 جنيه ..وانظر لسعر الانتنا الصعيدى من يوم مانزلت بقى سعرها 300 جنيه تقريبا يا تري أيه السبب
دوما سعر الصعيدى اقل الى النصف..محدش سال نفسه ؟ ازاى بيبعوها بنصف الثمن؟..ولا الراجل بتاع الانتنا الصعيدى ده بيصرف عليه من جيبه؟...
اوضح انا بقى للناس الفرق فى اختلاف السعر امام الجميع ويشهد الله تعالى انى ماكتبت الا الحق ولو فيه حاجة غير كده انا مستعد للمحاسبة امامكم ناهيكم انى من مبيعاتها باكل وبشرب وبصرف على اهل بيتى ويستحيل اقبل الحرام ادخله على نفسى وعلى اهل بيتى.!!!

الفرق يكمن فى (الكونكتور)...

السيكتور المصري بكنكتور نفس الأنتنا الصعيدي طيب ايه الفرق يقولك اصلي بنجيب كنكتور من امريكا ومره من الصين وده حاجات كلام فاضي بس تبرير لغلاء سعر الأنتنا السكتور المصري عن الأنتنا السكتور الصعيدي مع العلم تكلفة الأنتنا سواء دي او دي متكلفش فى الأساس بالكتير أوي 150 جنيه يعني حرام عليك تعمل أنتنا بـ 150 جنيه تروح تبيعها ب ضعفين تمنها .. يعني بيعها بـ 300 جنيه زى السيكتور الصعيدي هتبقى مبلوعه شويه لكن تبيعها بـ 500 جنيه وبعدها تروح تبيعها بـ 650 جنيه يبقى ده كله حرام فى حرام

فى السيكتور المصري ..الكونكتور المستخدم يباع فى مول السخاوى ومولات الشبكات فى التحرير وتقدر تسال عنه لا يزيد عن 22 جنيه مثلا الى 25 جنيه مصرى؟؟؟؟بامانة ربنا حكم انت عقلم فى المول وبالسعر ده وانت عارف ان المول هايحط مكسب مثلا 10 جنيه ولا 8 جنيه يبقى مثلا الكونكتور صفى سعره على 10 جنيه ده يبقى كفائته ايه بالله عليك انت تحكم...الكونكتور +-75 اوم واتحدى حد يقدر يتحكم فيه ويظبطه على البوليت +-50 اوم...
ده معناه ضعف اشارة واداء وسرعة قتل السيستم وحرق البوليت...
وده برضه يفسر سر مدى رخص سعر الانتنا الزهيد

انا مش هاخوض كتير فى الانتنا السيكتور المصري انا حكيت لك وانت ادامك دى وادامك دى جرب وبالله عليك امام الناس تحكم على تجربتك بامانة بينك وبين ربك..بس خد بالك التعليم مش ببلاش لانك لما تحط سيستم تعبان وفكيته وربط عليه ناس دى سمعة الشبكة فى بداية تركيبها والله لو جبت سيستم بعد كده من الهند الناس عرفت انك سىء الخدمة

تحياتى للجميع اخوكم
م/احمدعبدالفتاح على
ابوملك









انتظرونا دائما

[طارق عبد الحكيم]

شكرا لك ياغالي على هذه المعلومة المفيدة
واصل نشاطك وعطائك

[ahmedmedooo]

بارك الله فيك وشكرا على النصائح الغاليه

[وائل001122]

مجهوووووود رائع


وفى انتظار الافضل منك دائما اخى الغالى

[ahmedmedooo]

غاوى عمل انتنه يدوى وتم التجربه على اكثر من انتنه ومنها ضعيفة الارسال ومنها قوية الارسال

http://www.masrawysat.com/vb/showthread.php?t=1179438

[احمد محمد بسيوني]

الله يبارك فيك

[ياسرvvvv]

بارك الله فيك
بس لى طلب ممكن
اريد ان اعمل شبكه هوائى لا تقل بثها عن 3 كيلو ارسال نت
فما تنصجنى ان اعمل من البدايه اكن شاكرا

[طارق عبد الحكيم]

المشاركة الأصلية كتبت بواسطة ياسرvvvv

بارك الله فيك
بس لى طلب ممكن
اريد ان اعمل شبكه هوائى لا تقل بثها عن 3 كيلو ارسال نت
فما تنصجنى ان اعمل من البدايه اكن شاكرا

عن تجربة ياغالي اشتري بوليت + انتنا انترلين 12 او هايبر لينك 15
وعيش هيشيل معاك 30 اكسيس

[ياسرvvvv]

شكرا لك يا غالى بس ممكن ده هيغطى مساحه قد ايه وكم يكون سعره تقريبا وهل ده هيغطى المساحه 180 درجه يعنى من كل الاتتجاه بنفس الجوده
ثانين ممكن ان سمحت ترفعلى اسطوانه كى اسطبها لكيسه لعمل ***** مع الشرح الكامل لها نع انى عندى روتر دمج واسف للاطاله وشكرا لك

[طارق عبد الحكيم]

$$ جميع اصدارات المايكروتيك من الاقدم الى الاحدث $$
تسطيب المايكروتيك من البدايه الى الاحتراف

الانتنا ياغالي تختلف عن السكتور الموجه
الانتنا دائري 360 درجة