انتـــشـار الخـــناقــات فـى رمــــضـان

حمادة ونور · #1 2014/07/03, 11:00 PM

انتـــشـار الخـــناقــات فـى رمــــضـان

دايماً كنا بنقول ومازلنا بنقول رمضان شهر الخير , رمضان شهر الهداية , شهر التوبة
(( شهر الهدوء النفسى )) ......... ولكن !

ممكن نقول ان الواحد بيدخل على الشهر بيحاول انو يكتر من عباداته
ولو قلت أضعف الايمان ( يحسن اخلاقه )

للأسف الشديد ابتدت تظهر ظاهرة غريبة جداً وبجد مش لقيلها منطق وسبب مقنع

وهى ظاهرة انتشار الخناقات فى رمضان !!!!!!!!!

مش هقول خناقات عددها عادى ..لأ دا عددها مبالغ فيه - مش بس كده

وكمان خناقات من العيار التقيل اوى . يعنى تسمع شتايم درجة اولى !!

تسمع صوت اسلحة وسكاكين وحاجات غريبة وطوب وضرب تحس ان فى معركة بين اهالى غزة واسرائيل !!!!!

للأسف ده اللى بيحصل دلوقتى ,

الواحد مبقاش يعرف ده ليه , هل الظاهرة دى بقت موضة ولا ايه

فى السنوات الاخيرة فعلاً الواحد لاحظ ان اكتر الخناقات بتبقى فى رمضان

هنا بقى نسأل الاسئلة .........

- هل فى شيطان بيوقع الناس لبعضها ؟ اه

بس مين الشيطان ده ؟ الشيطان ده هو ادهى شيطان خلقه ربنا وهو شيطان الانس
فعلاً شياطين الانس العن وأضل سبيل من شياطين الجن
والدليل .... بص وشوف الفرق مابين رمضان وغير رمضان صدقونى الفروق مش كتيرة

العملية كلها حكم النفس على النفس وضبط النفس مش شيطان

دايماً الشيطان اللى احنا بنقول عليه ده بنعتبره الشماعة اللى بنعلق عليها اخطائنا , كل ما يحصل حاجة نقول اصل شيطان

دلوقتى احنا فى رمضان ,, اعتقد مفيش حجة ,,
شوفوا بقى اللى بيحصل , انتشار الخناقات بصورة غير عادية
الناس مبقتش تطيق بعضها
لغة الحوار مبقتش الكلام , بقت لغة الايدى وماتحمله الايدى
مبقاش عندنا تسوية بالكلام فى اى نزاع يحصل ,
لأ دا الاكتر
تتخرب كل حاجة ( ازاز يتكسر , واحد يتعور , واحد يتقتل , صويت واهوال )
وبعدين ابقى قابلنى نشوف ازاى بقى نحل الخناقة بالكلام

يعنى الكلام بقت اخر حاجة بيتم التفكير فيها فى حل اى نزاع , ده ان وجد !

والاكتر والاكتر ان اكتر اوقات الخناقات ديه قبل الفطار وممكن بساعة عشان بس نحللى الصيام ويفطرو على الخير طبعاً !!!!!!!!

ومفيش مانع انهم يكملوها بعد الفطار . مهو ......... ( فاصل ونواصل برضو )

الواحد اساساً المفروض وهو صايم بيكون مهدود يعنى يادوب لو مشوار او شغل جاى منه
بيبقى خلصان .

للأسف ...! بنلاقى عزيمة شديدة للخناق !!!

انتشرت البلطجة , وقلة الادب كترت اوى
تتوقع انك ممكن تلاقى عيل صغير يشتمك بأردء الشتايم , مابالك بواحد كبير شوية
مبقاش فيه تربية وده جزء كبير من المشكلة دى واللى اكيد ليه دور ان اجيال تطلع بالشكل البشع ده !!

العملية مبقتش عملية شيطان , دى ممكن تكون حكمة والله اعلم عشان بس الناس متتكلمش وتقول شيطان وتعرف نفسها انهم هما اللى وحشين لما ييجو يرتكبو خطأ فادح

انا من وجهة نظرى الشيطان اضعف حاجة ممكن تفكر فيها , ومعاك انو ليه اسلحة فتاكة , بس صدقونى هو سهل انو يتغلب لو انت نفسك او انا نفسى عايز كدا

بالنسبة لحضارة مصر ... لو عايزين تعرفوا يعنى ايه حضارة

الحضارة حضارة سلوك ورقى , لان تصرف كل واحد فينا دى وجهة لبلده

الكلام ده حقيقى ممكن مكناش واخدين بالنا منه اوى

مش اهرامات الجيزة ولا ابو الهول ولا معبد حتشبسوت ولا نهر النيل هى حضارة مصر

دلوقتى الحاجات دى موجودة ... اه , الفراعنة بنوها ... هقول ايوة برضو

بس هل الحاجات دى بتتكلم , بتعبر , بتقول احنا هنا ........( لأ )

عشان تعرف انك فى بلد حضارى حقيقى ,

سلوك شعب يكون كويس , يكون فيه تربية كويسة دى الحاجة اللى تأثيرها حقيقى

حتى لو ملكنا كل اثار ومقومات العالم واتعرفنا اننا شعب اندثرت فيه الاخلاق اللى اتعودنا عليها من زمان صدقونى مش هيبقى فى اى حضارة

لأن ببساطة الحضارة = سلوك

ياريت ميجيش الوقت اللى يقول فيه الاجنبى

(( بلد فيه اثار عظيمة , بس مفهوش سلوكيات حضارية ))

الواحد بجد مابقاش يحس بالامان فى البلد دى

ربنا على المفسدين فى الارض والظلمة

ربنا يهدينا جميعاً

ويارب منوصلش لدرجة اننا نقول رمضان شهر الخناقات

منقول

eldeepmoh.2009 · #2 2014/07/03, 11:49 PM

,والله اول يوم رمضان اخويا بيركن عربيته فحك عربية واحد تانى حكه لا تذكر راح المحترم التانى سب الدين لاخويا و جاب شوية بلطجيه بسنج وسكاكيين وخشب وقومى ياليله بقى وياعم صلى على النبى ياجماعه احنا فى اول رمضان ولاحياة لمن تنادى -فقلت لنفسى البرشام والمخدرات بتعمل اكتر من كده - فانا شايف ان مفيش ثقافة لا دينيه ولا ادبيه وللاسف ده عند قطاع كبير من الشعب ولما تيجى تقول لبعض الاشخاص حقك عليا ومتزعلش يفتكر انك خايف منه وتكبر معاه فربنا يهدى المصريين ان شاء الله وشكرا على موضوعك الجميل ده وده موضوع فعلا كبير مش صغير وكل واحد ليه اخ او صاحب يحاول ينصحه وياخده الى الطريق الصح طريق العمل ووالاجتهاد ومراعاة اوامر ديننا الحنيف الذى ينهى عن صغائر الامور وان شاء الله هبدا بنفسى

حمادة ونور · #3 2014/07/04, 12:15 AM

اقتباس:

المشاركة الأصلية كتبت بواسطة eldeepmoh.2009

,والله اول يوم رمضان اخويا بيركن عربيته فحك عربية واحد تانى حكه لا تذكر راح المحترم التانى سب الدين لاخويا و جاب شوية بلطجيه بسنج وسكاكيين وخشب وقومى ياليله بقى وياعم صلى على النبى ياجماعه احنا فى اول رمضان ولاحياة لمن تنادى -فقلت لنفسى البرشام والمخدرات بتعمل اكتر من كده

والله يا غالى انا كان معايا عربية وما صدقت بيعتها عشان البلطجة وقلة الادب اللى الواحد شايفها

واشتغلت على مشروع توناية اللى هو 7 راكب وسيبته وقولت اسيبه احسن ما أقتل حد او حد يقتلنى بسبب اللى الواحد بيشوفه من همج وبلطجة وقلة ادب

mostafa hamed · #4 2014/07/04, 12:47 AM

واحنا عندنا كل يوم او كل ساعه خناقه وناس بتتعور وسب فى الدين وبقت حاجه استغفر الله العظيم

ربنا يستر وتعدى الدنيا على خير فى طاعه الله عز وجل

eldeepmoh.2009 · #5 2014/07/04, 12:54 AM

ربنا يهدى ان شاء الله

حمادة ونور · #6 2014/07/04, 01:17 AM

اقتباس:

المشاركة الأصلية كتبت بواسطة mostafa hamed

واحنا عندنا كل يوم او كل ساعه خناقه وناس بتتعور وسب فى الدين وبقت حاجه استغفر الله العظيم

ربنا يستر وتعدى الدنيا على خير فى طاعه الله عز وجل

آمين يارب

والله الواحد مبقاش عارف يعمل ايه لحد ما بقى يكره انه يقعد فى البلد بسبب اللى فيها