[عــادل محمد]

اراجوز

--------------------

أراجوز ... أراجوز .. إنما فنان
فنان .. أيوة إنما أراجوز
ويجوز يا زمان أنا كنت زمان
غاوي الأرجزة طياري ... يجوز
إنما لما الكيف بقى إدمان
باجي أبص لشئ واحد .. أرى جوز
_______________________

فلسان ... كحيان .. أيوة أنا فلسان
إنما .. برضك .. راجل إنسان
بضرب بالألف لسان ... ولسان
وبكلها بعرقي ومش... إحسان
راجل والرجولية لا عضلات
ولا ألبندة وسيما و ... حركات
الجولية الحقيقية ثبات
قدام جبونية ... أي جبان
________________________

أراجوز أنا واحمي أرا أرا إيه ؟
أحمي قراريط الناس من مين ؟
مالناس الأرا أرا إيه أرا إيه؟
مالناس القراميط الملاعين
ماهو أصل أنا مش مالأرا أرا إيه ؟
مش مالقراطيس
ولو الحال مال معدش أنا على أرا إيه أرا إيه
قرافيص واطنش عالأندال
لازم أشك الأندال مهموز
وأدوس عاللي افترى والعنطوز
ما أنا أرا إيه أرا إيه ؟ .. أرا أرا أراجوز
_________________________

أراجوز .. وشجيع .. والدنيا ميدان
فارس.. حارس ... واقف ددبان
وإذا بان للشر نيبان .. وإذا بان
بحمي الغلبانة وال ... غلبان
وشجاعتي مهياش في الطاخ والطيخ
دي شجاعة تفكير و .. تماخيخ
الأرض اضربها تجيب بطيخ
بذكاوتي وأخلي الخلا .. بستان
________________________

أراجوز أنا والدنيا أرا إيه؟
قرشانة واحنا شبر شبير
يا ما قرمتني وأرا أرا إيه ؟
قراصتني في لباليبي وانا كبير
فسرحت انفخ أرا إيه أرا إيه ؟
أراغيلها واغني ياليلي يا عين
واتمسخر على أرا إيه أرا إيه ؟
أراذلها الفجرة الطماعين
واضحْك كل صبي وعجوز
عاللي بيتنطط فرقع لوز
ماانا أرا إيه أرا إيه ؟؟ أرا أرا أراجوز
_______________________

أراجوز .. وسايقها ... هبل في جنان
وأنا قلبي ... مليان .. جدعنة وحنان
وأبان ساهي سهتان سهيان
إنما عقلي للعدل ... ميزان
أنا فلتة ... إنما مش فلتان
وساعات حرنا وساعات ... زنان
يمكن علشان وحداني
ماليش أراجوزة تاخدني .. بالأحضان

[محمد فتحى الطباخ]

إنما لما الكيف بقى إدمان

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!! !!!!!!!!!!!!!!!!!!!!