[mohamedenan]

مـذيـعـة تـحـاور مـواطـن ســنة 2080 شوف هتقول ايه؟؟؟؟؟؟؟؟؟؟؟؟

المذيعه: اسم حضرتك

المواطن: وائل هيثم

المذيعه: احكى لنا شوية عن ايام زمان

المواطن: أحكى ايه ولا ايه ولا ايه عن زمان ....

والنبي متفكرنيش بايام العز....ايام الرخص...أيام الاحترام....

طب ده انا مثلا فاكر من حوالى 40 - 45 سنة كدة

كان الواحد مننا ياخد من ابوه المصروف10او 15 جنيه فى اليوم

وكانوا بيكفوا...ومابيفتحش بقه...مش زى دلوقتى....الله يكون فى عوننا...

.ده انا فاكر ان عمرى ما ناقشت بابى هيثم الله يرحمه ف المصروف....


زمان الواحد كان محترم في لبسه كان الولد لابس البادي الكات

والبنطلون النجر او البنطلون الجينز الديرتى المقطع و خلاص.....

والبنت تلاقيها ماشية باحترامها لابسة المينى جيب والاستوماك

او البنطلون الاستريتش و خلاص...لكن لبس اليومين دول....

مايتوصفش....اجارك الله


زمان المصاريف كانت محدودة ...فين ايام ما كيلو اللحمة كان بـ 45 جنية بس...

.. كانت ايام ..

وبعدين زمان كانت ابواب البيوت تتقفل من بدري يعنى الساعة 4 الفجر كدة...

وكان الابهات ليهم شنة و رنة....يعنى ماتلاقيش واحد بيعلى صوته على ابوه

و لا بيمد ايده على امه....غير لو زعقوا له او ابتدوا معاه بالصوت العالى....


زمان كنا بنذاكر على الاغانى الطربية الاصيلة....فين ايام الاغانى الاصيلة

زى بحبك يا حمار و العنب العنب العنب....لكن اغانى اليومين دول

لا ليها طعم ولا لون و الكلمات بقت مبتذلة ومالهاش معنى....

طب بذمتك كدة قارنى بين مطربات زمان زى الست روبى

و الست دانا و الست هيفا....لكن مغنيات اليومين دول

بيعتمدوا على جسمهم و على المسخرة....فين ايام الفن الاصيل


وبعدين زمان بصراحة بقى كانت المذيعة تقعد قدام الضيف او جنبه

مش على رجله زي ما انتى عاملة كدة....

المذيعة: قول للزمان ارجع يا زمان

هذا طرف من الخيال ولا يمت للواقع بصلة الا من خيال كاتبه

[المعلم ابو لبده]

ياباشا كيلوا اللحمه دلوقتى 70 80 حاجه كده يعنى

الاجيال اللى طالعه دلوقتى فله اخر احترام

ودلوقتى مش عارفين نجوز ولا نسكن ولا ناكل والميه هتتبخر

انا عوز ارجع ايام محمد على ممكن اسافر بعثه فرنسا وفلق ومرجعش

ودا واقع وليس خيال


شكرا اخى الكريم "مش متعقد خالص "

[مجدى (الضابط) كشك]

اييييييييييييه زمان ايام ماكان ابو تريكه فى الهجمه الواحده يجيب جولين وجوز الحمام 3 فرده وعود القصب كان له زعزوعتين من فوق

[lemostrong]

كيلو اللحمة دلوقتى ب 50 جنيه
وبعدين انت هتجيب النهاردة زى سنة 2080
ربنا يستر علينا وعلى بناتنا

[ميدياجروب]

سعر الكيلو اللحمه عندنا فى دمياط
55جنيه

[مجدى (الضابط) كشك]

الحياه = لحمه
على حسب اكثر التعليقات

[مجدى (الضابط) كشك]

الله يرحم ايام زمان كان الواحد يشترى نصف كيلو لحمه كان الجزار يعطى للزيون عجل هديه

[عبدالحميدالنجم]

وبعدين زمان بصراحة بقى كانت المذيعة تقعد قدام الضيف او جنبه

مش على رجله زي ما انتى عاملة كدة....

المذيعة: قول للزمان ارجع يا زمان

هو يعنى الراجل هيعمل ايه ماهو من زمان

[ابويوسف 2]

الله يرحمنا هو فية بعد كدة زمان دة موت

[adeldesh]

الحمد لله مش هانكون موجودين 2080

[زكريابكر]

شكرا اخى الكريم "مش متعقد خالص "

[المعلم ابو لبده]

اللحمه دى اللى بتتشد ولا ايه وتلعب فى سنانك بعدها شهر وتقول اصل انا واكل لحمه

جيرانى بيجبوها

[ابوهمام]

2080
اللي يعيش بقي
ربنا يسترها

[محمد على حجازى]

بجد يا جماعه ربنا يسترها علينا
اللهم امين اتقوا الله تجد الله معك
واستعينو بالصبر والصلاه ان الله مع الصابرين