[kaspersky]

السلام عليكم ورحمة الله
قبل الأسئلة أتوجه بالشكر والعرفان لأعظم منتدى ساتلايت في العالم العربي
تعلمتأغلب المعلومات عن الدش من موقعكم المحترم ومن خلالكم فلكم العرفان والاحترام
عندي طبق 180 (ُECC) متحرك بالإسكندرية وقطعة دريك بمخرجين وموتور سوبرجاك 24 انش
أستقبل النايل سات والأوروبي جيد جدا ولكن كثير من الأقمار لا تعطيني إلا عدد اقل من المسجل بمواقع الترددات
مثلا إسترا 19 يعطيني 200 قناة فقط ومعظم القنوات لا أستقبلها خاصة بين سبورت وأمثالها من القنوات الرياضية ... أرجو أن ينشرح صدر الإخوة لهذه الأسئلة
الأسئلة:
1- يحيرني فكرة إن زاوية ميل العدسة -skew angle- مختلفة في الأقمار فكيف يمكن ضبطها لتستقبل أقمار المدار
2- ما أقصى أقمار الشرق الممكنة الاستقبال مع عدم الوقوع في مشاكل مع الموتور
3- آخر مدى للموتور عندي لا يتعدى الثلاثينات شرقا فهل من طريقة لتوسيع هذا المدار لأن البوزيشنر يعطيني إرور إذا وصلت لدرجة 40 شرق و17 غرب !!!!!!!!!!
فلا أدري هل هذا من الموتور أم ماذا (قرأت أنه يمكن أن يكون من ترس الليمت)
4- متى أشعر إن الطبق محتاج فني ومتى أشعر إنه مضبوط
5- هل يتحويل الطبق إلى ثابت وكم قمرا يمكنني استقباله باعتبار النايل سات اساسي وهل يمكنني الجمع بين نايل وهوتبيرد ويوتلسات و استرا 19

أتمنى ألا أكون أطلت عليكم

[ahmed hassn2012]

اولا انت محتاج قطعة قوية للطبق وقد تحتاج ضبط المدار والقطعة التى يمكن تركيبها على الطبق 180 كامكس 5007 وموجودة بمصر او لو فى امكانيه تجيب قطعة من السعودية زى السانتك او تلجأ الى تعديل القطع اذا كانت متوافره عندك ايا منها (ترومان اتنين مخرج القديمة الرمادى او البيضا - سترونج حديد - اريون dB 0.35 - بريفكس لبنى - ستاربورت ام علبة زرقاء القديمة ) وفيد دائرى بحلقات لقطعة فوجى او اى فيد دائرى

ثانيا
1- كلما تحرك الطبق تميل القطعة مع حركته طالما تم ضبط العدسة بزوايه 45 درجة تقريبا عند ضبط قمر المنتصف عرب سات 30 شرق
يعنى هى بتلف مع الطبق اثناء حركته
2- ممكن توصل لقمر اسياسات 100 شرق لكن داه محتاج ضبط جيد وقد تواجه مشاكل مع الماتور ولذلك حاليا الافضل الوصول لياه سات 53 شرق او الهولندى 58 شرق وقناة دهوك اذا كان لغتها عربى اثناء المباريات وبعد ذلك مالوش لازمة اوى
فالمدار الافضل يبدأ من هسباسات 30 غرب وينتهى عند الهولندى57 او ياه سات 53 شرق
وللاجابة على السؤال الثالث تابع هذا الموضوع
هنا
4 - الطبق قد يحتاج فنى اذا فشلت فى تركيب الطبق كما يجب ان يكون
ومتى تشعر انه مضبوط لما تستقبل المدار وجميع الاقمار باشارات جيدة وتستقبل الترددات الضعيفة على استرا 19 وعلى ثور 1 غرب
5- اذا فشلت فى فيما سبق ممكن تصل الى مرحلة تركيب الطبق ثابت والاقمار التى يمكن استقبالها النايل سات والاوروبى واسترا 19 شرق اما يوتلسات 16 حيكون صعب لان فلاشنة الطبق ممكن تعوق تركيبه

وهناك موضوعات كثيرة مثبتة فى طريقة ضبط الطبق المتحرك تساعدك فى فهم طريقة ضبط المدار وتركيب الطبق

[شعوان الحربى]

المشاركة الأصلية كتبت بواسطة ahmed hassn2012

ثانيا
1- كلما تحرك الطبق تميل القطعة مع حركته طالما تم ضبط العدسة بزوايه 45 درجة تقريبا عند ضبط قمر المنتصف عرب سات 30 شرق
يعنى هى بتلف مع الطبق اثناء حركته

هنا
4

الطبق

تحيتى ليك يا استاذ احمد

متهيالى انك منتبهتش و انت تكتب زاويه العدسه عل نص المدار

و يمكن انت تقصد ميل القطعه من بره لان في عدسات زى الاسترونج الحديد بتبقى فعلا ميله 45 درجه

لكن اغلب العدسات التانيه المفروض الكونكتر اللى راكب فيه السلك يبقى عمود عل الارض عل نص المدار

طبعا هى مش 45 درجه زى مانت عارف لكن بتكون عمود على الارض

بحيث لو شلت الغطا وبصيت جوه العدسه تلاقى ابره منهم ماشيه مع الارض و ابره تانيه عمود على الارض

و الحاجه التنيه المهمه هى قمر نص القوس

القمر ده بختلف من مكان لمكان تانى

فى اسكندريه هو عربسات2 اللى على 30.5 شرق

انا كنت باعمل صيانه و تركيب طباق لشركه بترول أسمها سنتافى

فى موقع كان تحت السلوم جنب مطار حباطه العسكرى قريب من حدود ليبيا

و قمر نص المدار هناك كان بدر اللى مدار 26

و فى موقع تانى بعد سفاجا و قبل راس بناس جوه البحر الاحمر بس قريب من الشط

و نص المدار هناك كان اقرب حاجه ليه هو قمر يتلسات اللى مدار 36 شرق و يبقى الطبق مايل شرق سنه صغيره اوى يجيب 36 شرق

دى نقطه مهمه يريت نركز عليها لان مصر كبيره اوى و كل حته و ليها نظامها

[kaspersky]

جزاكم الله خيرا ahmed hassn2012 شعوان الحربى على سرعة الرد
إجابات وافية
سأجرب تنفيذ الشرح الذي أشار له الأستاذ أحمد في فتح وغلق الماتور
عاجز لكما عن الشكر

[احمد انور خضر]

صور قد تساعدك

[شعوان الحربى]

تمام يا استاذ احمد انور الله يحفظك

كده بالرسم يوضح اكتر ان قمر نص المدار بيفرق من حته لحته

فى قمرين مختلفين فى الصورتين 30.5 و القمر التانى 31.5

و طبعا فمكان تالت شرق شويه هيكون قمر تالت غير الاتنين دول و مكان رابع غرب شويه هيكون قمر رابع و هكذا

[kaspersky]

شكرا أستاذ أحمد على الصور التوضيحية
بناء على شروحات المنتدى
قمت بعمل بعض التعديلات على موضع الموتور حيث لاحظت إن الأقمار الغربية لا تتعدى تلتسار فأرجعت الموتور بعد فك المسمار إلى الخلف حتى وصلت لقبل نهايته باتنين بوصة تقريبا فاستقبلت هسباست ولكن الإشارة بين الخمسنات والستينات (لا أدري هل ده مناسب) ولو قرصت على الموتور يعطيني إرور لأنه وصل إلى الليمت الغربي
بالنسبة للأقمار الشرقية
قمت بفك المسمار الخاص بالليمت ولفيته قليلا لليمين قبل الليمت ولكن ما زال يعطيني إرور عن درجة 30 شرقا تقريبا فلا أدي ما السبب
وهل يمكنني الاستغناء عن هذا الترس علما بأني لا أريد أكثر من قمر 57 لاستقبال دهوك وسأتوقف عند ذلك
شكرا على متابعتكم المثمرة

[شعوان الحربى]

المشاركة الأصلية كتبت بواسطة kaspersky

شكرا أستاذ أحمد على الصور التوضيحية
بناء على شروحات المنتدى
قمت بعمل بعض التعديلات على موضع الموتور حيث لاحظت إن الأقمار الغربية لا تتعدى تلتسار فأرجعت الموتور بعد فك المسمار إلى الخلف حتى وصلت لقبل نهايته باتنين بوصة تقريبا فاستقبلت هسباست ولكن الإشارة بين الخمسنات والستينات (لا أدري هل ده مناسب) ولو قرصت على الموتور يعطيني إرور لأنه وصل إلى الليمت الغربي
بالنسبة للأقمار الشرقية
قمت بفك المسمار الخاص بالليمت ولفيته قليلا لليمين قبل الليمت ولكن ما زال يعطيني إرور عن درجة 30 شرقا تقريبا فلا أدي ما السبب
وهل يمكنني الاستغناء عن هذا الترس علما بأني لا أريد أكثر من قمر 57 لاستقبال دهوك وسأتوقف عند ذلك
شكرا على متابعتكم المثمرة

واضح كده انك لسه مخلصتش من مشكله الليمت

حضرتك لف الطبق شرق لغايه ما البوزيشنر يديك ارور

اطلع للمتور و فك العلبه هتلاقى الترس ضاغط عل لسان اللمت

فك مسمار الترس و لفه بعيد عن اللسان

ارجع جرب تانى تلف الطبق شرق لغيه متستقبل بقيت الاقمار اللى انت عاوزها

طبعا لو وقف المتور قبل ما توصل لقمر دهوك ارجع فك الليمت تانى

و لما توصل عند قمر دهوك لف المتور شويه تانى شرق بعد دهوك و بعدين اقفل الليمت على كده

الاحسن طبعا انك تخلى ترس الليمت عشن الترس ده بيضمن ان المتور يقف اجبارى قبل ميوصل الطبق للاخر خالص

لو الطبق تقيل ممكن يسقط و المتور ميقدرش يطلعه تانى و لازم واحد فوق جنب الطبق يزقه بايده و التانى تحت يحرك البوزيشنر

[kaspersky]

المشاركة الأصلية كتبت بواسطة شعوان الحربى

واضح كده انك لسه مخلصتش من مشكله الليمت

حضرتك لف الطبق شرق لغايه ما البوزيشنر يديك ارور

اطلع للمتور و فك العلبه هتلاقى الترس ضاغط عل لسان اللمت

فك مسمار الترس و لفه بعيد عن اللسان

ارجع جرب تانى تلف الطبق شرق لغيه متستقبل بقيت الاقمار اللى انت عاوزها

طبعا لو وقف المتور قبل ما توصل لقمر دهوك ارجع فك الليمت تانى

و لما توصل عند قمر دهوك لف المتور شويه تانى شرق بعد دهوك و بعدين اقفل الليمت على كده

الاحسن طبعا انك تخلى ترس الليمت عشن الترس ده بيضمن ان المتور يقف اجبارى قبل ميوصل الطبق للاخر خالص

لو الطبق تقيل ممكن يسقط و المتور ميقدرش يطلعه تانى و لازم واحد فوق جنب الطبق يزقه بايده و التانى تحت يحرك البوزيشنر

سأفعل إن شاء الله اليوم وأوافيك بالرد (وليتسع صدركم الطيب)

[kaspersky]

الحمد لله أولا
ثم بفضل توجيهاتكم استطعت استقبال هسباسات حوالي (420) قناة ولكن الإشارة غير مرتفعة أقوى تردد 11771 الإشارة 68-70 درجة
وتم توسيع المدار بالفعل من خلال تحريك الترس وتحرر الموتور ووصل لمدى أكثر من 60 شرق وأنا لا أريد أبعد من ذلك لكن للأسف....................
الموتور يذهب شرقا ثم يعطي إرور عند العودة وكأنه لا يستطيع سحب الطبق
لا أدري يبدو إنني وأنا أفك الموتور وبعد فك الإبزيم لإنزال الموتور ناحية الغرب لاستقبال هسباسات .. سهو نسيت فك المسمار الآخر المثبت بالطبق وشديت الموتور
لكني فكيت المسمار ولفيت الموتور ونزلت لأقصى نقطة ناحية الغرب ثم ربطته تاني واستقبلت هسباسات بالعافية
وعند تجربة الصعود ناحية الشرق صعد اتلموتور لكنه لا يعود إذا زودت أكثر من قمر المنتصف 31 درجة ولكن بقية الأقمار في هذا المدى (30 غرب- 31 شرق) يعمل بلا مشكلة
فهل بالفعل الموتور تضرر بالفعل أم ماذا وهل له إصلاح
شكرا لكل من قدم النصح والعون

[EMADALZOUK]

متابع معاك فى الموضوع ده
علشان بحب اعرف مشاكل المواتير

[المهندس كرم ستالايت]

المشاركة الأصلية كتبت بواسطة احمد انور خضر

صور قد تساعدك

[chemical79]

لكن اغلب العدسات التانيه المفروض الكونكتر اللى راكب فيه السلك يبقى عمود عل الارض عل نص المدار

طبعا هى مش 45 درجه زى مانت عارف لكن بتكون عمود على الارض

بحيث لو شلت الغطا وبصيت جوه العدسه تلاقى ابره منهم ماشيه مع الارض و ابره تانيه عمود على الارض



أفهم من كلام حضرتك ده إن كونكتر اللاقط لازم يبقى لوضع أسفل عند قمر المنتصف ؟؟؟

[chemical79]

سؤال وإستفسار أخر لسيادتكم وأرجوا التوضيح .... أنت بتقول ......
و الحاجه التنيه المهمه هى قمر نص القوس

القمر ده بختلف من مكان لمكان تانى

فى اسكندريه هو عربسات2 اللى على 30.5 شرق

انا كنت باعمل صيانه و تركيب طباق لشركه بترول أسمها سنتافى

فى موقع كان تحت السلوم جنب مطار حباطه العسكرى قريب من حدود ليبيا

و قمر نص المدار هناك كان بدر اللى مدار 26

و فى موقع تانى بعد سفاجا و قبل راس بناس جوه البحر الاحمر بس قريب من الشط

و نص المدار هناك كان اقرب حاجه ليه هو قمر يتلسات اللى مدار 36 شرق و يبقى الطبق مايل شرق سنه صغيره اوى يجيب 36 شرق

دى نقطه مهمه يريت نركز عليها لان مصر كبيره اوى و كل حته و ليها نظامها

وعليه أنا عندى قمر المنتصف وفقاً لإحداثيات الموقع بتاعى هو يوتلسات 33 شرق ..وعند البحث عن هذا القمر لم أستدل على إشارته لمغادرة قنواته ..السؤال ..إزاى أصل لضبط دقيق لهذا القمر فى حالة عدم تواجده لضبط المدار كاملاً ..هقولك أنا عملت ايه وهل هذا صحيح أم خطأ .. أنا حصلت على إشارة أسترا31.5 شرق بقوة 85% ثم قمت بإزاحة البولار والإستاند مسافه بسيطه نحو الشرق مع رفع بسيط لمسمار الميزان (الطبق) . هل الفكره والعمليه هذه صحيحه أم لا ..؟ وماهو الحل الأمثل لديكم ...؟ أأسف للإطاله ولكم وافر التقدير والإحترام

[kaspersky]

المشاركة الأصلية كتبت بواسطة chemical79

وعليه أنا عندى قمر المنتصف وفقاً لإحداثيات الموقع بتاعى هو يوتلسات 33 شرق ..وعند البحث عن هذا القمر لم أستدل على إشارته لمغادرة قنواته ..السؤال ..إزاى أصل لضبط دقيق لهذا القمر فى حالة عدم تواجده لضبط المدار كاملاً ..هقولك أنا عملت ايه وهل هذا صحيح أم خطأ .. أنا حصلت على إشارة أسترا31.5 شرق بقوة 85% ثم قمت بإزاحة البولار والإستاند مسافه بسيطه نحو الشرق مع رفع بسيط لمسمار الميزان (الطبق) . هل الفكره والعمليه هذه صحيحه أم لا ..؟ وماهو الحل الأمثل لديكم ...؟ أأسف للإطاله ولكم وافر التقدير والإحترام
[/B]

يمكنك ضبط البولار على القمر ده Eutelsat 33C وموقعه 33 شرق
وده موقعه على موقع كنج أوف سات
http://ar.kingofsat.net/pos-33E.php