[mostafa dddr]

مبدأيا ً عرفت اول حاجه ان ترتيب الشاشات الأفضل هى كالتالى
Sony ويأتى بعدها LG وبعدها Samsung
بناءً على كلام وتجارب الناس من خلال شراءهم للشاشات
لكن Sony فى مصر مش هى رقم 1 لأن تصنيع Sony داخل مصر
مش بنفس مواصفات Sony برا مصر واكيد دا يمشى مع باقى الشركات
لكن Sony سعرها عالى ومواصفاتها بتبقى محدودة
وكل ما زاد ميزه كل ما بتزيد فـ السعر , فـ عشان تشترى شاشة Sony
محترمه بمعنى الكلمة هتحتاج ميزانية كبيرة و الله اعلم فى موضوع جودة
التصنيع دا لأن قليل الـ شوفته بيتكلم عن Sony
حالياً بالنسبة للناس LG هى الأفضل
بصراحة عمري ما اشتريت حاجه LG عشان احكم عليها انا
بس اشتريت Samsung موبايل و شاشة واقدر احكم عليها بإنها سيئة
اقل شىء اقدر اقولهولك عن samsung ان مفيش فـ معظم شاشاتها
حالياً مخرج صوت , وصوت سمعاتها مع الوقت بيضعف
فـ بالتالى لو ضعفت مش هتعرف توصل سماعات خارجية !

الناس شكرت في LG وشاشات الـ Smart سواء Full HD بس
او Full HD & 3D خصوصاً الاختيار التاني وبالطبع هو اغلى شويه

قررت اشترى موديل LG بحجم 32 بوصه موديل 6300 بسعر 2900 جنيه
بعدها متكتبش ليا انى اشتريها لظروف ما
فـ بعد شهر ونص قررت اشترى حجم اكبر عشان يبقى بالمرة ومحسش ان انا
بعد شويه محتاج شاشة اكبر بمواصفات افضل ووقتها هدفع الـ 2900 من تاني
وفوق منها 1500 و 2000 كمان !
قررت الحمدلله اشترى نفس الموديل بحجم 43 بوصه بسعر على النت 4350
الموديل Full HD بس من غير خاصية الـ 3D
لكن بحثت اكتر ولقيت ان الموديل 6500 افضل وهو 3D بالإضافة Full HD
وكانت ع النت بسعر 4700 جنية تقريباً بحجم 42 بوصه
نزلت اشتريها من موزع LG رسمي و لقيت موديل 6300 بسعر 4150 جنيه
وموديل 6500 بـ 4500 جنيه
توكلت على الله واشتريت الشاشة LG 42LF6500 عشان الشاشة يبقى
فيها كل حاجه ان شاء الله وحجمها كويس وحتى تصميمها من ناحية
القاعدة بصراحة افضل

ودى صورة موديل 6300




ودى صورة موديل 6500




كدا خلاص اشتريت الموديل الـ 3D وهو 42lf6500 وكلامي هيبقى عليه هو بس
دا الريموت بتاع الشاشة وهو جميل فوق ما تتخيل بصراحة




بتقدر من خلاله تستخدمه كـ ماوس يعنى مش هتتنقل ما بين قوائم الشاشة
عن طريق الاتجاهات ( هو ينفع اه برضه ) لكن ميزة الريموت بقى انه هيخليك
تروح فـ اى مكان وتتحرك بالمؤشر ودا صورة للمؤشر ظاهر




ودى صورة للشاشة من الجانب




الشاشة تقدر طبعاً توصلها بهارد سواء عن طريق واى فاى او لان او usb
وعندي هارد WD My Cloud 4TB بتقدر تخش عليه وتاخد منه
اى حاجه عن طريق الواى فاى او كابل lan او كابل usb
فـ انا ركبت كابل الـ lan لأنه الافضل طبعاً ما بين الـ 3 انواع الـ ذكرتهم
ركبته فـ الشاشة ودخلت اشغل فيديو لكن كان فى مشكلة وهى ان الفيديوهات
متكرره بشكل فظيع , لكن سهله الحمدلله جربت اغير اسم فولدر الفيديو
من عربي لأنجليزى والمشكلة اتحلت بفضل الله

دا شكل الكرتونة قبل فتحها




محتويات الكرتونة
الشاشة + ريموت سحري + حجارة ( بطاريات ) الريموت + سلك ( فيشة ) الشاشة +
الحامل ( القاعدة ) بتاعة الشاشة + كيس مسامير لتثبيت الحامل بالشاشة +
علبة نضارات 3D فيها نضارتين + كيس فيه مسمارين كبار فيهم رأس بلاستيك
قوى جداً + حاجه كدا عامله زى الحزام بس صغيرة :D




الشاشة شغلت معايا امتدادات MKV , AVI , RMVB , MP4
مجربتش غير الامتدادات دي , الشاشة بتقدر من خلالها تقدم وترجع
فـ الفيديو ما عدا امتداد RMVB بيشغله اه انما متقدرش تقدم وترجع
لكن الحمدلله انه بيشغله , كتير من الشاشات مش بيشغله
ومش مكتوب ع الموقع الرسمي لـ LG انه بيشغل RMVB !
لكن الشاشة شغلته عادي .

الشاشة صورتها روعة بصراحة واستخدامها مريح وسهل وسريع
سريعة يعنى فـ حركة الريموت كـ ماوس وتنقلك ما بين القوائم
وبتقدر تغير Mode الفيديو وحجمه من حيث انه يبقى بكامل الشاشة او لأ..الخ

مداخل ومخارج الشاشة
3 USB
3 HDMI
مدخل Lan
مخرج صوت لسماعات خارجية
وفى حاجات تانية طبعاً لكن دول اهم حاجه




ملاحظة هامة جداً:
لو حابب تتفرج ع الشاشة بجودة عالية Full HD يبقى لازم تشترى
رسيفر محترم وغالي بلاش الرسيفرات ام 300 و 400 والجو دا
لأن الصورة هتبقى عليها زبالة مش عارف عشان حجمها كبير ولا
عشان السعر دا هيجبلك رسيفر اى كلام
انا جربت الشاشة على رسيفر beIN Sports 1000s وكانت الصورة تمام
انما اشتريت رسيفر Truman 270 Option HD بسعر 350 جنيه
والصورة على الشاشة زبالة زبالة زبالة فوق ما تتخيل
سواء على القنوات الـ HD او القنوات العادية SD

خلى بالك فى مواقع زى القاهرة للمبيعات هتنصب عليك لو اشتريت منها
انا قولت قبل كدا انى كنت هشترى موديل 6300 بحجم 32 بوصه
وكلمتهم وكان العرض الشحن ببلاش , كلمتهم قالولى مفيش شحن لمحافظتك
لو عايز الشاشة ادفع 200 جنيه شحن !!!
حالياً الموديل lf6500 دا سعره عندهم 4690 يعنى 4700 جنيه
بدلاً من 5211 جنيه !! ودا مش سعرها اصلاً فـ السوق
ومعاها فلاشة و كابل HD و حامل حائط و كام نضاره ...الخ
احياناً ودا حصل مع ناس هنا فـ المنتدى بياخدوا من الحاجات دي
ويقولولك هى كدا !

وعلى فكرة الشاشة بتدعم الترجمة لعدة لغات
بتحط الفيلم على فلاشة ومعاه ملف الترجمة ومش هتغير فيه حاجه
هتشغل الفيلم وتروح على ايقونة الترجمة وتفعلها وتختار نوع اللغة
يعنى لو ملف الترجمة عربي هتختار عربي الملف بالانجليزي هتختار انجليزي
عشان الشاشة تعرف تقراه وتعرضه ليك بشكل صحيح
والترجمة بتقدر تتحكم فيها من ناحية اللون و الحجم ومكانها
تقدر تنزلها او تعليها ع الصورة براحتك , بصراحة ميزة روعة روعة

مواصفات سريعة عن الشاشة
LED Smart TV
Screen Size 42 , 106 cm
Full HD 1920 x 1080
Smart TV Platform webOS 2.0
Cinema 3D TV
Built in 3D
Subtitles Support
Convert 2D to 3D
WiFi
Lan
HDMI Inputs 3
USB Inputs 3
Audio outputs 2 ( Optical Sound Sync , Audio out HP )
Audio Output (rms) 20W
Dolby Digital Decoder
DDR - 1.5 GB
GPU - IMG SGX543MP2 (266MHz)
CPU - Quad (1.1GHz 512KB)
HEVC decoder - 2K @ 60FPS 10-bit
Power Supply (Voltage, Hz) 100~240Vac 50-60Hz
Power Consumption Standby Mode 0.3W
باقى المواصفات بالتفصيل
http://www.lg.com/in/tvs/lg-42LF6500...specifications
http://www.ezoneonline.in/Categories...)/p/6000029034


تقييمى للشاشة: حتى الآن 10/10 الحمدلله

[mazen_coco]

ده االمنتدى الفضائى مش منتدى الشاشات ياغالى
بشكر حضرتك على مجهودك بس ده مش مكانه الصحيح
كل عام وحضرتك بخير

[mostafa dddr]

المشاركة الأصلية كتبت بواسطة mazen_coco

ده االمنتدى الفضائى مش منتدى الشاشات ياغالى
بشكر حضرتك على مجهودك بس ده مش مكانه الصحيح
كل عام وحضرتك بخير

عارف , بس مفيش قسم خاص بالشاشات
فـ قولت اخليه فى المنتدى العام
خصوصاً ان معظم الاستفسارات عن شراء شاشات بتبقى هنا
وياما تابعت مواضيع عشان اجمع معلومات ومكنش حد كتير
بيحاول يساعد فـ قولت اعمل مراجعة وافيد الناس
والموضوع فى ايد المشرفين ينقلوه فـ اى مكان

[احمد خميس شيحة]

انا لسه جيبها بنفس سعر حضرتك وبسم الله ماشاء الله شاشه روعه فعلا

[اسامه حامد]

وعليكم السلام

انا ركبت منها فهيا ممتازه

[™MIZO]

عندى موديل lb6520 موديل 2014 نفس الشاشة بنفس المواصفات بس 4 نظارات و 2 ريموت . بس بنظام web os مش web os 2 والشاشة الحمدلله كويسة جدا شاريها من 5 شهور

[elneklawy]

هى فيها رسيفر داخلى

[ayman belal]

تسلم يا غالى
مجهود ممتاز من حضرتك

[mostafa emam]

الله ينور عليك يا اخى

[مدحت الاشرم]

تسلم ايدك مجهود جبار وراائع من حضرتك ربنا يباركلك

[اسماعيل عمر]

تسلم يا غالى
مجهود ممتاز من حضرتك

[ذياد الحسينى]

مجهود ممتاز بارك الله فيك

[طارق رفعت محمد]

انا شارى 6300 سمارت نت فو اتش دى روعة الروعه موديل 2015 شهر 6

[ase92110]

الف مبروك ==== الشاشة ممتازه انا عندي نفس الموديل بتاع حضرتك بس 32 بوصه في ميزه في الريموت السحري اللي بيجي مع الشاشة انك تقدر تتحكم في الريسيفر من نفس ريموت الشاشة كائنه ريموت الريسيفر

[™Mr.Mahmoud™]

تسلم علي مجهودك الكبير ياغالي
جزاك الله كل الخير