[metwally55]

ياجندى بلدنا شجاعتك مثال .. يا صخرة ف مكانك .. جبل م الجبال
. وصمتك وصبرك مهابة وجلال .. اسد فى المعارك ملاك السلام .
انا بنحنى لك وتعظيم سلام
سلوكك رجولة.. عزيمة وإرادة .. يارمز البطولة .. فرضت السيادة
لآ ارهاب يصدك .. و لا الخوف يردك ... وروحك بتسبق ف طلب الشهادة
وف السلم رافع رايات السلام
انا بنحنى لك وتعظيم سلام

وشعبك ندا لك ولبيت ندانا .. ووفيت بوعدك وصنت الامانة
عدو لكل خاين ف طبعه الخيانة .. صديق كل وطنى ومخلص معانا
فى اول صفوف الجهاد ف الامام... انا بنحنى لك وتعظيم سلام

خريطة طريقنا الى الانسانية .. بلدنا ح تعلى بيك انت وبيّا
ولا ظلم بينا ولا محسوبية .. وكل البشر تعيش متساوية
حرية وعدالة وأمن وسلام
انا بنحنى لك وتعظيم سلام
 
بحبك يابلدى ياسر الحياة .. يأمنى وأمانى ياطوق النجاة
يفوت التاريخ .. ويمضى الزمان .. وتهلك ممالك .. وتخضع جباة
وانتى على مر كل العصور .. أميرة وحسنك حضارة ونور
اصيلة يابلدى يابنت الأصول .. عظيمة وساحرة القلوب والعقول!!
دا شعب الفراعنة اللى قالوا انه مات .. عنيه فتحت وقام م السبات
وحطم تابوت الخضوع والسكات .. وكسر قيوده .. وأعلن وجوده
وقال كلمته بكل اللغات
وانتى على مر كل العصور .. أميرة وحسنك حضارة ونور
اصيلة يابلدى يابنت الأصول .. عظيمة وساحرة القلوب والعقول!!

زائير الأسود ف يوم الكرامة .. هدير بحر ثاير كأنه القيامة
يزلزل عروش الظلم والظالمين .. ومصر بتنفض غبار السنين
وقايمة من القبر زى الجنين .. بتحضن ولادها بحب وحنين
وانتى على مر كل العصور .. أميرة وحسنك حضارة ونور
اصيلة يابلدى يابنت الأصول .. عظيمة وساحرة القلوب والعقول!!

ايديكم ف ايدنا سواعد ح نبنى .. انا وانت وانتى .. وأبنك وأبنى
ح نصنع ننتج.. ح نزرع ح نجنى ..
يعلى صوت المكن الداير .. ونشوف طرح الأرض بشاير
هو دا عيد الثورة امال .. يوم خمسة وعشرين ف يناير!!
وانتى على مر كل العصور .. أميرة وحسنك حضارة ونور
اصيلة يابلدى يابنت الأصول .. عظيمة وساحرة القلوب والعقول!!
بحبك زى ما تـــــــكونى .. بكل عواطفــى وجنونى
ياشمس منورة ف كونى .. وفرحة مدوبة شجونى
اميرة ومهرك الغالى .. دموعى وروحى وعيونى
بحبك يا ملاك من نور .. ياأحلى من بنات الحور
وصوتك لما تتكلمى .. كأنه زقزقة عصفــــــور
ياشمس منورة ف كونى .. وفرحة مدوبة شجونى
اميرة ومهرك الغالى .. دموعى وروحى وعيونى
بحبك مهما قلبك جار .. حنينى يدّوب الأحجار
ف قلبى نهر شوق فياض .. يخلى جبال جليدك نار
ياشمس منورة ف كونى .. وفرحة مدوبة شجونى
اميرة ومهرك الغالى .. دموعى وروحى وعيونى
مفيش غيرك ف كل الناس .. عيون دايبة وفا واخلاص
ورا عنادك حنان جارف .. بحور م الرقة والأحساس
ياشمس منورة ف كونى .. وفرحة مدوبة شجونى
اميرة ومهرك الغالى .. دموعى وروحى وعيونى







صدق لما بقولك عنك .. إنك روحى وعمرى وإنك
لما بتضحك ضحكة سنك .. بتخلى الشمس تغير منك
صدق لما يقولك رمشى .. إنك وانت بعيد ما بنمشى
واما تقرب حزنى بيمشى .. والافراح بتقرب منى
صدق لما يقولك قمرى .. ياللى ملكت ف ايدك أمرى
إنك اول حلم ف عمرى .. بعد ما كان النوم مخاصمنى
واما بتضحك ضحكة سنك .. بتخلى الشمس تغير منك

صدق لما تقولك يدّى .. إنك أغلى ما ملكت يدّى
وانت كنوز الدنيا دى عندى .. وأغلى عندى كمان من ذاتى
صدق لما تقولك عيــنى .. إنك أحلى ما شافت عينى
وانت الحب اللى بيدينى .. شكل وطعم جديد لحياتى!!
واما بتضحك ضحكة سنك .. بتخلى الشمس تغير منك
 
الليل
ياليل مالك كدا..عايش حزين ووحيد .. كأن لك يا ليل .. حبيب غايب بعيد
لو كنت زييى انجرحت .. اشكى وانا سامعك
انا فوق خدودك لمحت .. وقريت سطور دمعك
انت حزين مهموم .. ولا الدموع دى نجوم
مكتوب عليك السهر .. ما تدوقشى طعم النوم!!!
انا مش ببالغ دنا .. أبو قلب داب وانضنا
و لادوقت طعم الهنا .. ولا عمرى كنت سعيد
شىء ف العذاب دا سنين .. واشكى لغيرك مين؟؟
ما هو انت زيى حزين .. وبرضه زييى وحيـــد!!
لو كنت زييى انجرحت .. اشكى لجريح سامعك
انا فوق خدودك لمحت .. وقريت سطور دمعك
انت حزين مهموم .. ولا الدموع دى نجوم
مكتوب عليك السهر .. ما تدوقشى طعم النوم!!!
ياليلى ايه العمل .. كان قلبى شاب وشآب
كل ما اقـــول الأمل .. يطلع أمل كذاب
المر مالى الكاس .. وقلوب بلا إحساس
وانا وانت وسط الناس .. تايهين كما الأغراب!!
لو كنت زييى انجرحت .. اشكى لجريح سامعك
انا فوق خدودك لمحت .. وقريت سطور دمعك
انت حزين مهموم .. ولا الدموع دى نجوم
مكتوب عليك السهر .. ما تدوقشى طعم النوم!!!
ياقلبى بكرة القمر
يا قلبى بكرة القمر .. يطلع ويحلى السهر
وتعود ليالى زمان
انسى اللى فات باساه .. ووبكل ناره انساه
قوم ودع الاحزان
**************
اللى انقضى ف الألم .. ما يستحقش ندم
نصحى عليه وننام
قوم وافتح الشبابيك .. للفرح واملى عينيك
ياقلبى بالاحلام
انسى اللى فات باساه .. ووبكل ناره انساه
قوم ودع الاحزان

**********
ايه يعنى حب قديم .. ساب جرح قاسى أليم
ودع عذاب لياليه
الجرح بكرة يطيب .. والشمس مش ح تغيب
ع الدنيا من بعديه
انسى اللى فات باساه .. ووبكل ناره انساه
قوم ودع الاحزان
 
حالف ياليل ...
حالف ياليل من بعد غربة وويل .. لامسح دموع الصبر ف المواويل
وارسم عنيكى الضى ف القناديل .. واكتب على جناح الطيورمرسالى
تعبت ايديا مشاورة بالمناديل .. وتعبت من سفرى ومن ترحالى
لأبنى القصور أم الحيطان بنور .. وازرع جناين تحت منها بنور
وح خلى شوق قلبى الغريب عصفور .. ح يغنى فوق غصنك بشوق موالى
تعبت ايديا مشاورة بالمناديل .. وتعبت من سفرى ومن ترحالى
باس الندى ورد الخدود صحاه .. وعنيكى طير أخضر وقلبى سماه
طاير انا من غير جناح وياه .. ولمست بايديا نجم السما العالى
تعبت ايديا مشاورة بالمناديل .. وتعبت من سفرى ومن ترحالى
ضحكة عنيكى الشمس ف الفجرية .. مدت خيوط النور دفا وحنية
عطشان لقيت ف عنيكى نبع المية .. ولقيت سنين عمرى اللى راح راجعة لى
تعبت ايديا مشاورة بالمناديل .. وتعبت من سفرى ومن ترحالى 
دا كل اللى بينا خلاص انتهى ...
دا كل اللى بينا خلاص انتهى .. عنيكى قالتها وانا سمعتها
وجوه العيون .. مفيش غير شجون .. وشك وظنون
و لا من ملامحك .. ف قلبى الا جرحك .. طب اذاى اسامحك
وجرحك يهون!!
ما كانش اللى بينا .. مجرد حكاية
عشان تكتبى لها .. بغدرك نهاية
واشوف حد تانى .. ف قلبك مكانى
ينسيه حنانى .. ويسرق هنايا!!
مفيش ف العيون .. مفيش غير شجون
وشك وظنون
و لا من ملامحك .. ف قلبى الا جرحك
طب اذاى اسامحك
وجرحك يهون!!
لو انتى الوحيدة .. ف كل الوجود
ما فكرش ارجع .. لحبك واعود
خلاص صدقينى .. هجرنى حنينى
وبعدت ما بينى .. وبينك حدود
مفيش ف العيون .. مفيش غير شجون
وشك وظنون
و لا من ملامحك .. ف قلبى الا جرحك .. طب اذاى اسامحك؟
وجرحك يهون!!
انا كل ما اصالحك تخاصمنى .. انا برضه بحبك مع أنى
من قبل ما احبك وانا عارفة .. إنك ح تبعنى وح تخونى
لكن أعمل ايه مش بايديّا .. الحكم ف حبك مش ليّا
الحكم لقلبك وانا راضية .. زى ما يحكم يمشى عليا!!
اليوم بيفوت على قلبى سنين .. وانا بستناك ويّا حنينى
والليل بيعدى عليا حزين .. اضحك له واقول بكرة يجينى
ويفوت اليوم ورا يوم ورا يوم
ياناسينى زى الهنا والنوم
وفايتنى لشوق يلعب بيا
لكن أعمل ايه مش بايديّا .. الحكم ف حبك مش ليّا
الحكم لقلبك وانا راضية .. زى ما يحكم يمشى عليا!!
ويفوت من بعد الليل فجرى .. يتعجب على شوقى وصبرى
يسألنى لأمتى ح تستنى .. انا ح استناه لآخر عمرى
ويفوت اليوم ورا يوم ورا يوم
ياناسينى زى الهنا والنوم
وفايتنى لشوق يلعب بيا!
لكن أعمل ايه مش بايديّا .. الحكم ف حبك مش ليّا
الحكم لقلبك وانا راضية .. زى ما يحكم يمشى عليا!!
 
انا مش أد خداعك .. و لاقربك ووداعك
انا مش لعبة ف ايدك .. ولا خاتم ف صباعك
***********
انا مش حلم ف ليلة .. تنساه من بعديها
ولا حدوتة جميلة .. لا صحابك تحكيها
وابقى حكاية قديمة .. ملهاش عندك قيمة
لا انا حبى كان نزوة .. ولا حبك دا جريمة
انا مش لعبة ف ايدك .. ولا خاتم ف صباعك
***********
اما مش شمعة ف ليلك .. بلهيب نارى اضوىلك
انا وردة ودبلها .. اخلاصى لتمثيلك
وانا ليه ابقى اسيرك؟ .. راح اسيبك لمصيرك
للوحدة .. وقسوتها .. لعذابك .. وضميرك
انا مش لعبة ف ايدك .. ولا خاتم ف صباعك
 

[أبوشيمو]

تسلم يا ميتو
كلماتك جميلة جدا

[سامح مرسى السيد]

الله عليك بصراحة رووووووعة