[السيدعبدالعزيز]

1- مسئولين ناسيين الماتش و رايحين كل همهم ان اللاعيبة ما يعملوش لقاءات مع قناة فضائية علشان يتقال عليهم انهم وطنيين .

2- مراسل قناة معروف مين أصحابها رايح جاى مع المنتخب ( طبعا طظ فى المنتخب , المهم الحصريات و المعلق الفلانى يطلع يكيد المعلق العلانى اللى مش عارف ياخد حصريات زيه ) .

3- شوية هزار من اللاعب الفلانى على خفة دم من اللاعب العلانى على لقطات مضحكة من مين , تحس كإنهم رايحين معسكر فى برنامج ترفيهى , مش ماتش فى تصفيات المفروض يبقوا مركزين فيه .

4- شوية سيلفيات حلوة علشان اللايكات و أطفال النت و البنات يدخلوا يعملوا قلوب للاعب الفلانى الكيوت و اللاعب العلانى اللذوذ .


5- لاعيبة عادية , سنهم صغير فجأة بقوا نجوم و الإعلام مديهم أكبر من حجمهم فطبيعى انهم يفتكروا نفسهم منتخب البرازيل اللى هيكسب أى حد .




6- كوبر انه مدرب جيد , لكن بدأ يحس بنفسه بعد كاس الأمم و بدأ يتعامل كإنه صاحب المنتخب و دى بداية الفشل لأى مدرب , رأيي انه لازم يتغير حتى لو وصل لكاس العالم , دا غير ان إسلوبه مش مناسب للكورة المصرية .


7- لما تضم مهاجم إحتياطى فى ناديه و غالبا ناديه هيمشيه أخر الموسم , و تسيب مهاجم أفضل منه بمراحل لمجرد انك متخانق معاه , يبقى انت مدرب بتهرج .


8- محمود تريزيجيه المجتهد يفصل عشرة من اللاعب المتصيت على الفاضى اللى إسمه رمضان صبحى .

9- عبد الله السعيد مالوش بديل فى العالم , لإن مفيش لاعب فى العالم هينزل يخرف فى الماتش و يلاقى الإعلام بيزيط له و يطبل له .

10- أحمد الشناوى أفضل حارس فى مصر , لو كان إستمر أساسى كان زمانه دلوقتى فارق مع المنتخب , شريف إكرامى سنه 34 سنة و لسة بينزل الماتش مرعوب و خايف .


11 - الننى أخره يبقى بديل حتى لو لعب فى ريال مدريد , طريقة لعبه مش مناسبة للمنتخب , دوره فى ناديه غير دوره فى المنتخب .


12- أحمد فتحى لاعب مجتهد , لكن جو الرجولة و الجدعنة و الجوكر اللى بيلعب فى أى حتة بتاع كاس الأمم دا ما يأكلش عيش لو لعبت ضد فرق عندها باكات سريعة ,

مصر محتاجة باكين يمين و شمال صغيرين فى السن ياخدوا مكان فتحى و عبد الشافى أو على الأقل يبقوا إحتياطى ليهم و ياخدوا ماتشات تدريجيا لغاية ما يكتسبوا خبرة .

13- فى أكتر من باك شمال فى الدورى المصرى أفضل بكتير من كريم حافظ .

14 - فى لاعيبة كتير بينضموا للمنتخب بسبب انهم محترفين مش أكتر حتى لو بيلعبوا فى دوريات تعبانة , وردة و كريم حافظ مثالين .

15 - فى لاعيبة كتير فى مصر يستاهلوا ينضموا للمنتخب على حساب لاعيبة محترفين و أغلبهم صغيرين فى السن .

16 - المحمدى و عمر جابر هم أفضل باكين يمين حاليا فى مصر , لما تركن الإتنين و تلعب بأحمد فتحى اللى كبر يبقى انت مدرب بتهرج , أنسب مكان لأحمد فتحى حاليا هو نص الملعب فقط .

------------------------------

الخلاصة لما يبقى عندك مدرب بيهرج و بيشخصن مشاكله مع اللاعيبة و بيظلم فى إختياراته , و إتحاد كورة مش مركز فى الكورة و قنوات فاشلة كل همها الحصريات والإنفرادات على حساب مصلحة

المنتخب و جماهير بيلمعوا و يصيتوا أى لاعب مهما كان مستواه لمجرد انه من نفس ناديه و عايزينه يلعب عافية ,

يبقى ما تزعلش لما تخسر من فريق أضعف منك كنت تقدر تعمل معاه على الأقل نتيجة إيجابية و تريح نفسك فى باقى التصفيات و ترجع شخصية المنتخب اللى إتبهدلت فى الكام سنة اللى فاتوا

[alforssan5]

هههههههههههههههههههههه بلح

[عمرو معروف]

صح والله عندك حق تحس اني اللعيبة بتتمشي في الملعب ومبتلعبش كورة وتحس انهم مغرورين

[حمادة زيان]

صح والله عندك حق