[جلال العسيلى]

#من_اقوى_الاخطاء_اللى_بتحصل_عند_قياس_سكر_الفاطر





المريض : لو سمحت انا كنت عايز احلل سكر فاطر
فنى المعمل : روح كل يا باشا وعدى عليا بعد ساعتين
المريض : الساعة معايا 2 يعنى اجى لسيادتك الساعة 4 ؟؟؟
فنى المعمل : الله ينور عليك يا باشا
ده الحوار الموروث عبر الاجيال واللى بيتكرر يوميا فى معامل مصر اذا أتى الحديث عن سكر الفاطر
تعالى كدة نمشى مع المريض شوية ونشوف هياكل ايه ؟؟؟ :)
لو المريض على اد حاله . هايروح يضرب طبق الفول المتين بالزيت الحار من على عربية الفول ( اجدع ناس على فكرة ) وكلنا عارفين ان الفول ده ما هو الا كربوهيدرات معقدة وبتاخد وقت طويل جدا فى الامتصاص وبالتالى بعد مرور الساعتين المتفق عليهم مش هايحصل امتصاص كامل للمحتوى السكرى الموجود فى الفول والنتيجة هاتبقى مغلوطة ومش دقيقة
طيب لو المريض جيبه دفيان . ساعتها هاينزل على اشهر كبابجى فى وسط البلد ويطلب طبق مشويات مشكل كفتة على طرب على ريش ويقوم بالطبق من غير اى عيش ولا سلطات ولا حبشتكنات وبالتالى المريض ده كانت وجبته بروتين 100% وانا المفروض اقيس السكر بعد ساعتين ؟؟!!! لا تعليق هنا بقى :)
#ماذا_يحدث_فى_اوروبا_والدول_المتقدمة ؟؟؟؟
التحليل ده اسمه OGTT يعنى Oral Glucose Tolerance Test ومعناه ان الشخص هياخد جلوكوز بالفم ونختبر مقدار تحمل الجسم للجلوكوز ده Tolerance يعنى الجسم هيتفاعل ازاى مع الجلوكوز . هل سيتحمله ويضبط سكر الدم ولا يعجز عن تحمله والسكر فى الدم يرتقع ؟؟؟؟
ببساطة المعامل المحترمة بتوزن على الميزان 75 جرام من الجلوكوز وتقوم باذابته فى كاسة ميا والمريض بيشربه امام فنى المعمل وبيحلل بعد ساعتين من شرب الجلوكوز
#طيب_لو_المريض_طفل_؟؟؟؟
ساعتها بوزن الطفل نفسه واضرب الوزن فى 1.75 يعنى مثلا طفل وزنه 20 كيلو يبقى ساعتها هياخد ( 20* 1.75 ) يعنى هياخد 35 جرام جلوكوز ولو الطفل وزنه 40 كيلو يبقى هياخد ( 40 * 1.75 ) يعنى هياخد 70 جرام جلوكوز اما بقى لو وزنه 50 كيلو هياخد 75 جرام فقط
متستغربش كدة . مش معقول الطفل هياخد جرعة جلوكوز اكبر من البالغين . الطفل بياخد حاصل وزنه مضروب فى 1.75 بحد اقصى 75 جرام فقط زيه زى البالغ
التحليل ده لو بعد ساعتين اتضح ان سكر الدم اقل من 140 مجم لكل ديسيلتر من الدم يبقى الشخص نورمال والتحليل طبيعى
اما لو كان 200 او اكثر يبقى الشخص مصاب بالسكر diabetic وطبعا لازم اتاكد باعادة التحليل فى يوم اخر قبل ما اصارح المريض بالتشخيص ده
حد يسألنى طيب والارقام اللى فى النص يعنى من 140 الى 199 مجم / ديسيلتر دم ايه اخبارهم ؟؟؟؟
ده بقى بسميهم prediabetics يعنى ما قبل السكر . اصل المريض ده ارقامه اعلى من الطبيعى فمقدرش اقول انه طبيعى وفى نفس الوقت الارقام اقل من بتاعة السكر فمقدرش اقول انه مريض بالسكر ولكنه فى منتصف الطريق يعنى زى ما المسرحية بتقول : " فاضلك زلطة وتطلع برة " لو اتحرك زلطة بس قدام هايتحول الى مريض سكر رسمى وعشان كدة الشخص ده لازم ياخد باله من الدايت والرياضة واسلوب الحياة الصحى عشان يؤخر حدوث السكر عنده قدر الامكان

[جلال العسيلى]

اللهم اشفى كل مريض

[سعيد شريف]

يارب اشفى كل مريض

[احمد2011]

اللهم اشفى كل مريض بحق النبى علية الصلاة والسلام

[جلال العسيلى]

المشاركة الأصلية كتبت بواسطة احمد2011

اللهم اشفى كل مريض بحق النبى علية الصلاة والسلام

[محمدمحفوظ]

تسلم وبارك الله فيك وكل عام وانتم بخير

[bebo606]

استاذي الفاضل / كل عام وحضرتك والأمة العربية والإسلامية بخير وسلام

فعلا كلام حضرتك مظبوط فعند عمل تحليل صايم وفاطر اصوم من 8 ساعات إلى 10 ساعات واذهب إلى المعمل ويقوم بأخذ عينه من الدم
وبعد ساعتين من الأكل يقوم المعمل بأخذ العينة الثانية لقياس السكر الفاطر وطبعا الفطار اما فول أو بيض مسلوق مع ربع رغيف مع شوية سلاطة

اما موضوع الجلوكوز فاعتقد لا يتعامل به اي معمل في مصر

الف شكر

تحياتي وتقديري واحترامي لحضرتك

[جلال العسيلى]

المشاركة الأصلية كتبت بواسطة محمدمحفوظ

تسلم وبارك الله فيك وكل عام وانتم بخير

[mohamed etreby]

اللهم اشفى كل مريض بحق النبى علية الصلاة والسلام

[ميدو9000]

بارك الله فيك معلومة مهمه ومبسطة وساهلة

[سيد ابوكرم]

كلام حضرتك مظبوط
بارك الله فيك معلومة مهمه ومبسطة