[plh]m]

اوعدنى قبل ما تبدأ بالقراء انك هتشيل الشارة اللى على عنيك سواء كانت حمرااااء او حتى كانت بيضااااء بخطين حمر .. لانى عارف ان مقالى مش هيعجب اهلوية كتيييير واكيد مش هيعجب زملكاوية اكتر .. الحدوتة باختصار بدأت لما نادى الزمالك فى منتصف الموسم الماضى 2009 &2010 وبعد عشر مبارايات بالظبط كان فى المركز ال 13 ومهزوم 5 مبارايات من اصل 10 .. وكعادة الزمالك بعد كل هزيمة دموع للاعبين شيكابالا وحازم امام وغيرهم بالاضافة الى النظرة البلهاء لعبد الواحد السيد مع هز رأسة ووضع يدة عليها وكأنه مستعجب مع ان معظم الاهداف التى تدخل فى مرمى الزمالك تكون بسبب عبد الواحد - هذا لا يتعارض مع ان عبد الواحد حارس مميز وينقذ الزمالك فى العديد من الانفرادات والهزائم فى بعض الاوقات - المهم الزمالك بقاله سنين وسنين مش بيشوف دورى ولا حتى مركز تانى ولا تالت ولا رابع بل انهى احدى المواسم فى المركز السادس وكان حاله لا يسر عدو ولا حبيب حتى بعض الاهلويه الاعزاء قال جملتة الشهيرة تعاطفا مع الزمالك " الارض لو تتزلزل الزمالك مش هينزل " وتعالت اصوات الجماهير تطالب بتولى حسام حسن المسئولية وقد كان وفعل العميد مالم يخطر على قلب بشر
اولا انهى الموسم فى المركز الثانى وهذا اشبة بالانجاز وكان يقترب على استحياء من المركز الاول
ثانيا المدرب الوحيد الذى فاز ب8 مبارايات متتالية
ثالثا 7 مبارايات متتالية لم يدخل فى شباك الزمالك اى هدف
رابعا انتصر على مدربين فطاحل ويسبقوة بسنوات فى عالم التدريب امثال ( انور سلامة المصرى ) & ( مختار مختاربتروجت ) & ( فاروق جعفر طلائع الجيش ) & ( طارق يحى الانتاج الحربى ) &ا ( كابرال الاتحاد السكندرى ) & ( محمد صلاح المنصورة ) & محمد عامر بترول اسيوط & ( اسماعيل يوسف الجونه ) وغيرهم وعلى فكرة الدور الاول كان الزمالك مهزوم من معظمهم طبعا دا غير ان الزمالك لم يهزم من الاهلى فى الدورى - كالعادة - على مدار الدور الاول والتانى وتعادل مع الاسماعيلى فى اسماعلية
خامسا تغير طريقة اللعب الى 4-2-3- 1 وتطبيقها بنجاح والاعتماد على الصغار وتصعيد ناشئين و مشاركة شباب لم تتجاوز اعمارعم 17 سنة فى ذلك الوقت محمد ابراهيم & عمر جابر & احمد توفيق
سادسا والاهم احتواء شيكابلا ومعالجته نفسيا وجعله يظهر بمستوى رائع ومختلف بل اصبح هداف الموسم الحالى2011 ويعيش افضل فتراتة على الاطلاق !!! مش بردو دا شيكا اللى كان بيرفع الحذاء لجمهور الزمالك وكان بيبكى والجمهور بشتمة ودايما يدخل فى مصادمات مع جمهورة ويشاور للجمهور" خلاص ماشى مش هكمل " وبقاله سنين لم يقدم شىء للزمالك مين عمل كدة ؟ ومين خلى شيكا يتالق واصبح معشوق جماهير البيت الابيض الفضل فى مين بعد ربنا سبحانه وتعالى ؟؟ اكيد العميد حسام حسن .. البعض يردد الان " الزمالك هو شيكابالا " وانا ضد اختصار كيان فى شخص واحد ومع ذلك لو لازم نختصر فالاولى ان نقول " حسام هو الزمالك " او نقول " حسام هو من صنع من شيكابالا نجم للزمالك "
ثامنا عودة الروح والرغبة فى الانتصار وتعريف اللاعبين بحجم واسم نادى الزمالك
تاسعا توظيف جيد لابراهيم صلاح وتقديمه لمنتخب مصر بعد ان اعلن النادى الاستغناء عنه
استقدام حسين ياسر واستخراج مهراته التى دفنت فى الجزيرة وبشهادة الاهلويه
تسجيل احمد جعفر للاهداف مع الزمالك وللعلم لم يسجل جعفر مع الزمالك الا بعد تولى حسام حسن
*****
بدأنا الموسم الجديد ومع الاسف وبدات المشاكل و سريعا على سبيل المثال لا الحصر
* ضياع ثفقة جدو بسبب ضعف ادارى وقانونى وبالمناسبة " حسام حسن " كان مختار جدو و موقع معاة قبل ما حسن شحاتة يختارة ويتالق فى افريقيا ودا ان دل على شىء يدل على عين حسام الجيدة . ولعل جاء تالق جدو بسبب توقيعة للزمالك واحساسة الداخلى بانه لايقل عن لاعبى الزمالك والاهلى فى المتخب
* حل مجلس الادارة - الغنى - وتعين مجلس الادارة - الفقير - وسلفنى شكرا
* مشكلة الهارب مع اللى اصبح خايب - الحضرى وعبد الواحد السيد
* مشكلة عبد الحليم على المدرب المساعد والمطراوى
* مشكله احمد رفعت وحازم امام الصغير وبيسيب التمرين علشان استغفر الله العظيم
* مشكلة عماد محمد اصلة ولا مؤخذة مش قادر ياخد عالاجواء
* مشكلة ميدو مع البطاقه الدوليه وحاجة تكسف اداريا
* مشكله عمرو ذكى اللى محسوب عالفرقة اونطة ومصاب 24 ساعة فى اليوم
* مشكله عبد الواحد السيد اللى مفروض انه كابتن ومعاة 12 لاعب رايحين يشتكوا فرقتهم فى اتحاد الكورة فى الوقت اللى لو كانوا ركزوا فى البطولة كان هيكون افضل
* مشكله الموارد المالية واللاعبين فلوسها متاخرة مفيش دعم مفيش صفقات مفيش نفس للعب
* اخطاء تحكيميه تؤثر على نتيجة المباريات
* اعلام رياضى غير محايد بالمرة
بالله عليك بالله عليك بالله عليك
لو اى نادى فى العالم عندة كل المشاكل دى ممكن ياخد حتى دورة رمضانيه ؟؟؟
مستحييييييل .. ومع ذلك حسام حسن عمل من الفسيخ شربات واستطاع ان يتمسك بالمركز الاول على مدار 25 اسبوع الى ان جاء الداهية مانويل جوزية وهة برضوا انجااااااااااز
لانة بمنطق الحكماء والعقلاء مينفعش السنة اللى فاتت تكون فى المركز ال13 مهدد بالهبوط والسنه دى تاخد الدورى -طبعا لو كان حصل كان هيصبح اعجاز- بس لو محصلش مينفعش نلوم حسام على البطولة والزمالكاوية لو لاموا حسام هيلوموا على اساس اية ان شاء الله على اساس ان الدرع مش بيخرج من ميت عقبة !!!
باختصار "حسام حسن اسطورة لا ينكرها الا جاحد " ونجح وباقل الامكانيات
زمان واحنا فى الاعدادية فى منتصف التسعينات وبعد يوم كروى شاق مع فريق المدرسة لما الطالب فينا كان بيجوع ومعاة 10 جنية كان ممكن يجيب نصف فرخة ولو كان معاة 3 جنية كان ممكن يجيب رغفين حواوشى ولو ومفيش معاة غير 25 قرش كان بيوظف ال25 قرش دول ويروح يشترى " رغيف وطعميتين وببريزة سلطة" يعنى بيرضى جوعة على قد امكانياتة وبيوظف ال25 قرش صح رغيف 5 قروش وطعميتين 10 قروش وببريزة سلطة
وهو دة اللى عملة العميد مع نادى الزمالك .. باقل الامكانيات حاول يشبع جمهور البيت الابيض

[منو79]

[MR_ZIZO76]

والله يا اخى لى فترة لم اقراء تحليل محترم وغير منحاز ويعيد الحقوق لاصحابها بهذا القدر
وللاسف اصبحت التحليلات المنطقية قليلة نسبة الى ما يفعله الاعلام الاهلوى من وضع غمامة حمراء على الاعين حتى ترى كل شيئ احمر شكرا لك على المقال الرائع

[السيدعبدالعزيز]

نحن لانختلف ابدا ان حسام عمل فى الزمالك مافشل فيه الاخرون وهم افذاذ.
ولكن ممكن تحليل من حضرتك لخروجه من بطولة افريقيا ؟.
ثم 4 هزائم فى الدورى ؟.
ثم التعاقد مع اكثر من 8 صفقات لم يلعب منهم سوى 2 او 3 ؟.
ثم الرجوع للخلف فى نهاية الدورى بعد ان كان هو اقرب المرشحين له ؟.
ثم اسلوبه فى زعزعه الاستقرار والامن بين جماهير الكرة المصرية على كافه انتمائتها .
تقبل تحياتى ؟.

[MR_ZIZO76]

استاذ عبد العزيز نصف الرد على اسئلتك كان فى المقالة الاولى اما بالنسبة للصفقات فيمكننى اعداد تقرير عن نفس الصفقات الخاسرة فى الاهلى رغم ان الهلى حاسب الموضوع مكسب مش كورة بمعنى هاجيبه ب10 وابيعه ب20ورغم ذلك (خاسرة )ولايوجد محاسب وهل اعتبرت انت سيد عبد الحفيظ فى تصريحاته على الحكم فى مباراة سابقة اضراربالامن القومى ولا لاء؟

[رجب نوكيا]

حت علية شوي سكر بملح

[plh]m]

الاختلاف في الراي لايفسد من الود قضية وانا احترم كل الاراء حتي لو اختلفنا

هذا هو الحل اخي الكريم بعد ثورة التحرير وشكرا علي حسن الرد

[- ايمن منصور -]

اتفق معك اخى السيد

والاختلاف فى الراى لا يفسد للود قضيه

طالما نتناقش باحترام

والاخ صاحب الموضوع تناقش بكل الاحترام فمن الطبيعى ان نبادله بنفس الاحترام

مش زى اخينا دا
MR_ZIZO76
موقوف لمخالفة قوانين المنتدى

[sherif2010]

اكثر من رائع

[jaber alking]

حسام مشروع مدرب كويس ولكنة لم يرقى الى المستوى الاحترافى ابدا

[منصوراوى]

المشاركة الأصلية كتبت بواسطة - ايمن منصور -

اتفق معك اخى السيد

والاختلاف فى الراى لا يفسد للود قضيه

طالما نتناقش باحترام

والاخ صاحب الموضوع تناقش بكل الاحترام فمن الطبيعى ان نبادله بنفس الاحترام

مش زى اخينا دا
MR_ZIZO76
موقوف لمخالفة قوانين المنتدى

[aiman noor eldein]

- بلا شك مقال رائع للاستاذ plh]m
تناول جميع الجوانب الإيجابية التى لا يختلف عليها الكثيرين فيما حققه الكابتن حسام حسن من إنجازات كبيرة مع نادى الزمالك فى ظروف إدارية غاية فى الصعوبة .
- ولكنى أعتقد إنه أغفل الجوانب السلبية للكابتن حسام حسن ، والتى أعتقد إنها ليست خافية على الجميع وبالتالى لا داعى لأن نخوض فيها .
كل الشكر و التقدير لكاتب المقال و نتمنى المزيد

[منصوراوى]

زمان واحنا فى الاعدادية فى منتصف التسعينات وبعد يوم كروى شاق مع فريق المدرسة لما الطالب فينا كان بيجوع ومعاة 10 جنية كان ممكن يجيب نصف فرخة ولو كان معاة 3 جنية كان ممكن يجيب رغفين حواوشى ولو ومفيش معاة غير 25 قرش كان بيوظف ال25 قرش دول ويروح يشترى " رغيف وطعميتين وببريزة سلطة" يعنى بيرضى جوعة على قد امكانياتة وبيوظف ال25 قرش صح رغيف 5 قروش وطعميتين 10 قروش وببريزة سلطة






انا كان مصروفى الشخصى عشر قروش

[hussien1776]

الاخ صاحب الموضوع
تناقش بكل الاحترام فمن الطبيعى ان نبادله بنفس الاحترام
الف شكر علي التحليل الرائع

[مجدى التليتى]

تحيه لصاحب الموضوع الاكثر من رائع وكل التقدير والاحترام للعميد حسام حسن على ماقدمه للزمالك
والف الف مبروك للاهلى الذى يستحق لقب بطل الدورى عن جداره