[Mahmoud Galal.1]

موضوع جديد بيعمل مشكلة لناس كتير و هو ال Resolution أو تحليل الصورة

ناس كتير بتكلمني و بيسألوني ليه صورة كاميرا 2 ميجا احسن من 5 ميجا من نفس البراند و ساعات بسمع كلام كتير ان المنتج مش جيد و انا اتفضحت قدام العميل بتاعي و و و و .
الموضوع ده بيخلي ناس كتير محتارة و بيبقى مش عارف يتصرف إزاي و يقلل و يزود ال resolution يمكن المشكلة تتحل مع إن في أغلب الأوقات المشكلة مش بتكون من الكاميرا أو ال DVR .
طيب المشكلة بتحصل ليه و ليه بشوف الصورة بتاعت ال 5 ميجا وحشة أو الوانها باهتة ؟
حضرتك فكرت مره قبل ما تعرض على العميل بتاعك كاميرات 3 أو 4 أو 5 ميجا تسأله الشاشة اللي عنده ال resolution بتاعها كام؟
90% بتكون المشكلة أن الشاشة عند العميل أو الشاشة اللي حضرتك بتعرض عليها 1080 FHD اللي هي عرض 2 ميجا و حضرتك عايز الشاشة المسكينة تعرض 3 أو 4 أو 5 ميجا اللي هي أعلى من قدرتها على العرض أصلا و نبدأ نشتم في البراند و كفآته مع إن المشكلة إننا ما فكرناش إننا عايزين نحقق حاجة مستحيلة.
الموضوع ده مش مقتصر على كاميرات المراقبة فقط و لو سألنا أي حد من الناس بتاعت ال gaming اللي بيلعب بعض ألعاب الفيديو هاتلاقية لما بيجيب لعبة 4Kبيروح يشتري شاشة 4Kو كابل 4Kو يغير كارت الشاشة علشان يستمتع بتفاصيل الألعاب دي و يشوف الفيديو بدقة و جوده أعلى.
نبسط الموضوع شوية و نشوف أبعاد كل resolutionعلشان نفهم الفرق
1MP resolution (720p) = 1280x720
2MP resolution = 1920x1080
3MP resolution = 2560x1080
4MP resolution = 2560x1440
5MP resolution = 3440x1440
8MP resolution = 3840x2160

و هنا هانشوف أن الأبعاد دي هي عبارة عن عرض x عدد خطوط طول ، يبقى لما حضرتك تطلب من الشاشة ال 1080 FHDانها تعرض صورة أكتر من 2 ميجا الشاشة المسكينة غصب عنها بتضغط خطوط الطول و العرض علشان تعرف تحتوي الكادر و ده بينتج عنه صورة رديئة و مالهاش علاقة بالواقع و كمان لما بنعرض صورة اكتر من 2 ميجا و الكابل المسكين مش مجهز لده فبرضو الصورة هاتطلع رديئة و طبعا مش هاتكلم عن الناس اللي بتعرض حتى 2 ميجا على شاشة اللابتوب أو شاشة كمبيوتر علشان الكلام ده عيب و حرام.
يبقى لما نعرض بعد كده على العميل بتاعنا أو العميل يطلب كاميرات اكتر من 2 ميجا لازم نفهم منه الشاشة اللي عنده طبيعتها ايه و كابل ال HDMIاللي عنده نوعه ايه علشان في النهاية العميل تواصل مع حضرتك علشان دي شغلتك مش شغلته يعني دورك توضحله و تفهمه ان كل مواصفه ليها متطلبات علشان تتحقق.
مرفق الصور للتوضيح
مع تحياتى للجميع

[EspOO]

شكرا على المعلومة المفيدة والمهمة

[basem shapan]

تسلم ايدك يا استاذ محمود علي المعلومات المفيده جدا دي فعلاً في مشاكل كتير بتقابلنا في جوده صوره الكاميرا

[احمد العنانى]

تسلم ايدك ياغالى
بالفعل اغلب الفنين بتقع فى المشكله دي
تحياتى