[السيدعبدالعزيز]

هدينا؟ نتكلم كورة بقى.

١- موسيماني: باختصار، المعلم مبسوط منك قووووووي وبيقولك متجيش تاني. أما إذا أردنا الاستفاضة، الرجل بالنسبة لي شئت أم أبيت واحد من المدربين التاريخيين للأهلي، بس أنا مش من هواة عبادة الأصنام. وفي الوقت الحالي، بقاء موسيماني بقى ضرره أكبر من نفعه. هو الغلط كان اعتباره مدرب مشروع وهو لا يزيد عن مدرب مرحلة على أحسن تقدير. للأمانة هو فعلا نفذ المطلوب منه في مرحلة ما، بس للأسف معندوش أكتر من كده. بعد خسارة الدوري، الراجل طلب لعيبة جداد من المفترض انهم يناسبوا فكره وكل طلباته أجيبت. يعني دلوقتي عنده أدوات أفضل ينفذ بيها فكره والاسكواد بشكل عام بقى نظريا أقوى. فالمنتظر منه هو اللي المفروض يتعمل بفرقة زي دي. دوري وكاس وأفريقيا وسوبر وما هو أفضل من برونزية كأس العالم. كون ده محصلش ده معناه ان فكره اتحفظ أو مش مناسب للعيبة اللي معاه أو مش عارف يسيطر عليهم أو هما مش مقتنعين بيه أو مش عارف يلاقيلهم دوافع أو أو أو، مش مهم. النتيجة واحدة، وهي إنه على ما يبدو احنا كنا ماشيين بالقصور الذاتي من ساعة ما فايلر (الله يهديه أو يهده، أيهما أقرب) مشي.

٢- الشناوي: انت مش سليم يا شناوي، وبانت من الكورة الأولانية اللي في العارضة. كورة الهدف الأول في متناولك تماما لو كنت سليم. وبما إنك حارس مرمى مبتفتحش اسبرينتات مثلا، فإصابتك بنسبة ٩٠٪ على الأقل لأسباب تتعلق بالثبات الانفعالي. انت اتخضيت *بصوت كتكوت*.

٣- معلول: من ساعة ما رجعت من الإصابة وانت مش قاااااادر وشكلك في الملعب يصعب على الزملكاوية. هل ده عدم تركيز، ولا سوء إعداد بدني، ولا تشبع عشان خلاص جددت آخر تجديد، ولا إيه الحكاية بالضبط؟

٤- عبد القادر: شوف يا ابني، جمهور الأهلي زي ما بيرفعك ويشيلك فوق الراس، في ثانية بيقلب وبيخسف بيك الأرض. جو الكورة الشراب اللي بقالك كام ماتش عايش فيه ده مبيأكلش عيش عندنا، كان نفع عفروتو ولا شكري ولا حتى وليد صلاح الدين نفسه. ازبط كده لتلاقي نفسك في فاركو.

٥- أيمن أشرف: أهو ده عيب التقييم بالرجولة، ولعن الله من ابتلانا بمصطلح "الجرينتا" اللي لا يصلح إلا كصنف أيس كريم. يعني احنا مضطرين كل ماتش مهم نبقى حاطين إيدينا على قلبنا لاحسن تتطرد في كورة غشيمة من بتوعك، فتيجي انت النهاردة تعلي عليا بأداء يخليني طول الماتش باتمنى تتطرد؟ لنا الله.

٦- تاو: ما هو العيب مش عليك، العيب على اللي جابك. إمكانياتك الفنية لا يمكن إنكارها. بس يبدو والله أعلم إنك منتهي بدنيا، بالإضافة لإنك متعالي على الكورة وعلى الفريق وعلىّ أنا شخصيا. فياعم الحاج، روح بلدكم اتنّك هناك مش ناقصين والله.

٧- حمدي فتحي وديانج: أنا بحبكم جدا، بس النهاردة انتوا الاتنين برة الفورمة تماما بحكم انكم راجعين من الإصابة. بدنيا مكنتوش جاهزين وده أثر كتير على قراراتكم في الملعب، بالذات ديانج. بالمناسبة، نلاحظ مع بعض للمرة الكام اتكلمت عن المشاكل البدنية في البوست ده، ونرجع لنقطة ١.

٨- الشحات: شبح بالمعنى السلبي للشبحنة. شفاف ومش بالمفهوم الصوفي للشفافية. مطبق ورديتين كالعادة. مغلق أو غير متاح.

٩- ياسر إبراهيم: أنا مش عارف انتقدك قوي عشان انت في الظروف الطبيعية آخرك بديل شغال. حاولت هجوميا بكام رأسية، بس محاولاتك للخروج بالكورة من تحت أشبه بمحاولاتي لكتابة البوست ده باللغة السنسكريتية. حاجة مثيرة للشفقة والضحك في آن.

١٠- طاهر: بص يا ابني، انا عمري ما اقتنعت انك لعيب كورة أصلا، وما زلت على قناعتي. فكون انك تبقى النقطة الوحيدة المضيئة في الفريق النهاردة لمجرد انك كنت بدنيا واقف على رجلك ده في حد ذاته كارثة. عموما تستحق النهاردة اني اتخلى عن لقبك المفضل "طاجن محمد طاجن" واناديك باسمك عادي.

١١- البدلاء: لم يختبروا.

١٢- محمد هاني: إيه اللي جابه هنا؟ ما قلنا هنتكلم كورة!

[مصطفى علام محمد]

كلام يحترم