[محمد بونجا 2]

طبعا بعد ظهور الاطباق صغيرة الحجم من 60 الى 100 سم اصبح الجميع يقوم بتركيب الاطباق على النايل سات واصبح وجود فنى محترف امر شبه مستحيل فكل الفنيين الموجودين حاليا فى معظم المناطق انحصر تركيب الاطباق لديهم فى النايل والاوروبى دون درايه بالاقمار الاخرى كاموس وعربسات ويوتلسات w2و w3 وهيسباسات واقمار الشرق والخخخخخ......... كدهوك والازربيجانى وغيرهم .......وعشان يخلع الفنى يقولك مش هينفع الطبق الفلانى لازم طبق اكبر

طبعا عايزين حل يساعد الاعضاء على تركيب باقى الاقمار مثل فيديوهات توضيحية للتركيب من الالف الى الياء وليس بعد انتهاء التركيب واظهار الاشارات فقط او طريقة استخدام برامج ضبط الاطباق باستخدام الايفون او اى طرق اخرى وشكرا

ملحوظة ممنوع وضع ارقام تليفونات لاى فنى اوعناوين طبقا لقوانين الادارة
يريت الناس تشارك برايها

[kemo_tweety]

والله انت كلامك صح جدا بس قلى انا انا شيفه ان الموقع مصراوى سات من افضل المواقع وفى ناس ربنا يكرمهم بيسعدو ناس كتير فى التركيبات من خلال الصور وبعدين الربامج حضرتك كلها موجوده فى سوق بالاى على النت بتاعت ظبط الاقمار وفى مواقع تدعم الرددات مثل fly sat وده من اهم المواقع عليه درجات الاقمار الصناعيه والترددات على مستوى العالم

[ahmed jamal]

من هذا المنتدى اتعلمنا منه الكثير
من شرح وافى من الاساتذه الكبار فى مجال التركيب
أ/ عادل عامر
أ/طارق السقا
أ/ابراهيم مصراوى
أ/احمد انور
أ/خالد ستار
أ/حماد
ودى كانت مشاركه ليا لما كنت لسه مش فاهم اى حاجه فى التركيب

المشاركة الأصلية كتبت بواسطة ahmed jamal

انا روحت اركب الازرى والتركى والاكسبريس
الفنى قالى مش هاينفع يشتغل على طبق متر
وركبلى الهوتبيرت ونايل سات w3
ومعرفش يركبلى امووووووس قالى ماينفعش
هوه فعلا كلامه صح ولا ايييييه

ودلوقتى الحمد لله بقدر استقبل اى قمر بكل سهوله وليا كذا موضوع شرح هنا لاستقبال الاقمار
وكل ده بفضل ربنا ثم شرح الاساتذه الكبار كل الشكر والتقدير ليهم
انت بس ركز فى الشروحات وعرف اتجهات الاقمار
وحاول مره واتنين وتلاته فى استقبال الاقمار
ومحتاج فى الاول صبر شويه
وبعدين هتلاقى الموضوع بقا سهل بالنسبالك
وتحياتى ليك اخى الكريم

[السودانى]

بالفعل معظم التركيبات الان نايل والسلام

[محمد بونجا 2]

مفيش تفاعل فى الموضوع

[فتحي الجارحي]

تركيب النايلسات عموما الاكثر طلبا ولسهولته تركيب الدش اصبحت شغلانه اللي ملوش شغلانه

المهم في الفني الصح انه يطور نفسه والوصول الي ما هو ابعد بكثير

[ahmed2007h]

السبب الحقيقى ان الناس كانت زمان تسعى لاصطياد الاقمار البعيدة ذات القنوات المنوعة لاجل الافلام والمسلسلات الجديدة لكن كما تعلم بعد التطور العجيب فى الانترنت والمنتديات والسيرفرات التحميل التى يرفع عليها كل جديد وقديم ومترجم وخلافه عربى اجنبى حتى البرامج الترفيهية تجدها دوما ع اليوتيوب فقدت الاقمار المميزة اهميتها تماما لدى ناس كثيريين انا منهم كنت اسعى دوما وافشل فى الحصول على اشارة لقمر استرا 2 وواحد والهسبا وكنا بنجرى ورا الفنيين ونطاردهم ونتعب وبعدين شوية هوا يطيروا المجهود كله منا لكن الان لا داعى ابدا لهذا اطلاقا كل ما تتخله ولا تتخيله متاح على الانترنت بشكل مخيف فلا داعى لان نتعب فقط اشتراك باحدى ********* وانترنت 4 ميجا مثلا وتجيب الدنيا كلها عندك

[klinsman]

فعلا كلامك صح و انا قعدت شهر ادور على فني دش يركب الهيسباسات و ملقتش و كله بيقول لازم طبق كبير او مش بيركب غير النايل سات وكلام من ده!
دول مش فنيين دش لان فني الدش اللي بجد هو اللي يقدر يركب اي قمر مدام في المتاح زي الناس اللي بنشوفهم في المنتدى هنا، دول فنيين دش بجد!

[الباشا ابوعلى]

ياخساره الزمن الجميل انتها كان زمان اللى يجى يركب فنى ويركب با المتور ويظبط المدار كان فنين بجد دلوقتى اى حد بيعمل فنى لمجرد يجيب النايل سات

[adelmof40]

طيب اقولكم حاجة غريبه
جبت فني يغير ال LNB بوحدة جديدة بالإضافة الي تغير الدايزك بدلا
من القديم لان عندي كان قمرين نايل واوربي
طلع المعلم قعد قد ما قعد ............. ونزل ..... كله تمام يا باشا
طيب غيرت ال LNB
اه غيرتها
طيب والدايزك
ركبته عالقمر التاني
يعني معاليك ركبت اتنين دايزك
يارااااااااااااااااااااجل قلت لك غيره بدل القديم
طيب ازاي
قاللي عادي خدت من دايزك القمر الأوربي علي دايزك النايل
ونزلت لك السلك
معاليك عايز كام
70 جنيه بس
انت أصلا في التركيبات من زمان
لا انا أصلا محاسب وواخدها هوايه
روح الله يسامحك 20 جنيه والباقي لما تقفل ام ميزانيه البيت اللي مش عارف اظيطها ابقي اديك الباقي
واترحمت علي زمن جميل كان فيها العمالقة لا يبخلون عليك بالنصيحة والمشورة
كانوا محترفين بكل ما تعنيه الكلمة
فين زمان عشاق الحرفة بحق

[karimbo]

المشاركة الأصلية كتبت بواسطة adelmof40

طيب اقولكم حاجة غريبه
جبت فني يغير ال LNB بوحدة جديدة بالإضافة الي تغير الدايزك بدلا
من القديم لان عندي كان قمرين نايل واوربي
طلع المعلم قعد قد ما قعد ............. ونزل ..... كله تمام يا باشا
طيب غيرت ال LNB
اه غيرتها
طيب والدايزك
ركبته عالقمر التاني
يعني معاليك ركبت اتنين دايزك
يارااااااااااااااااااااجل قلت لك غيره بدل القديم
طيب ازاي
قاللي عادي خدت من دايزك القمر الأوربي علي دايزك النايل
ونزلت لك السلك
معاليك عايز كام
70 جنيه بس
انت أصلا في التركيبات من زمان
لا انا أصلا محاسب وواخدها هوايه
روح الله يسامحك 20 جنيه والباقي لما تقفل ام ميزانيه البيت اللي مش عارف اظيطها ابقي اديك الباقي
واترحمت علي زمن جميل كان فيها العمالقة لا يبخلون عليك بالنصيحة والمشورة
كانوا محترفين بكل ما تعنيه الكلمة
فين زمان عشاق الحرفة بحق

انا متابع الموضوع بشغف لأن فعلا الموضوع مهم جدا وبصراحة كده من الاخر بدون زعل .. التركيبات زيها زي اي حاجة بتظهر في مصر .. الناس تلاقيها بتجيب فلوس يروحوا يشتغلوها .. من اول شغلانة الصيدلي اللي ظهرت في السبعينات مرورا بمحلات البلاي ستيشن والسايبر وتجميع الكمبيوترات والسنترالات والموبايلات و و و لحد تركيب الدش .. الحاجة اللي الناس تلاقيها بتجيب فلوس تجري عليها وخلاص
الاطباق طبعا صغرها سهل جدا العملية .. يا راجل كفاية انك تبص على الاطباق فوق السطح وانت تعرف تركب ازاي .. لكن لو قمر مش معروف حلني بقى عشان تلاقي حد فاهم صح يركبهولك

من الاخر ياريت اقطاب المنتدى الكرام يجتمعوا كده ويركزوا معانا بقى عشان فعلا السوق بقى كارثة يا نعمل بقى موضوعات مختلفة بشرح بالتفصيييييييييل للمبتدأين من اول ما الطبق يجي لحد ما تظبط الاشارة على الاقل لأغلب الاقمار المهمة اللي كل الناس مهتمة بيها دلوقت .. يا بصراحة كده بقى نفتح باب التواصل مع الخبراء الكرام مدام بقى السوق كده ويتعمل قسم تواصل تبع المنتدى تحت اشرافه على الاقل للتركيبات فقط

ما هو مش معقول اني مثلا عندي في منطقة بحالها الاقي حتى الراجل المخضرم عندي جاي يركبلي النايلسات مع الاوروبي الاقي قنوات مش شغالة ع النايل سات!! اسأله على قناة معينة يقولي ده القمر اللي جنب النايل سات على نفس المدار بس مش النايل سات انا موجهلك الطبق على نايل سات!! اقوله يا باشا انت بس بتتكلم في ايه بس ما كلهم درجة واحدة وبعدين القنوات متقسمة عليهم!!! وفضلت وراه لحد ما شغلي الحزمة كلها بتاعة 7 غرب!!

ومرة تانية في محل تاني نزلت أسأل على طبق 120 لقيت الراجل بيقولي مفيش حاجة اسمها كده هو المتر وبعده الكبير المتحرك وده مبقاش حد يركبه خلاص .. قولتله ماعلينا انا عاوز ال 120 عندك ولا لأ .. قالي طب انت عاوزه في ايه يعني هتركب عليه ايه .. قولتله هركب عليه كذا قمر نايل سات واوروبي واموس و .. قالي هو انت عاوز تتفرج على ايه بقى؟؟ .. قولتله لا حول ولا قوة الا بالله يا عم انت مالك انا عاوز اتفرج على كورة على افلام على اباحة انت ايه دخلك وبعدين هقولك حاجة .. بلاها ام الطبق على ام التركيب مش عاوز من وشك حاجة!!
والله ده حصل مع محل عندنا في المنطقة

[hazzuma]

والله حتى النايل والأوروبى مايعرفوش يظبطوه كويس ويجيبوا كل الترددات على طبق متر,انا أخر مرة من سنة بالظبط جبت راجل كبير ركب الطبق المترنايل وهوتبيرد,وبعد فترة كبير خلص,ونزلنا تحت لئيت اشارة قناة الحياة {من اقوى الترددات على النايل}أقل من 60 بالمائة بعد ما كانت بتجيب حوالى 80 على ريسيفر كيوماكس جولد,قولتله الأشارة قليلة قالى معظم القنوات جاية,قولتله لأ انا متأكد ان الأشارة ضعيفة قالى السلك طويل يا بيه’لازم نقصر السلك اللفة ميت متر,قولتله بكل ثقة مش هتفرق على فكرة وبعد ما قص السلك الأبيض الأسبانى [اللى صاحب المحل اللى باعت مع الفنى بايعهولى غالى أصلا,]وصل الى 62 متر بعد 100 متر,وشفنا الأشارة لم تزيد واحد بالمائة حتى,الراجل وطى وشه ومافتحش بوئه لكن كان الوقت اتأخر وخد حسابه ومشى ومن ساعتها النهار رياضة حتى مش جاية,وطبعا مع الهوا الشديد دا ,القنوات المفقودة فى ازدياد,للأسف الناس بتسترزق,والموضوع اصبح سبوبة,,,,ربنا كبير

[HANYTITI]

ياخساره الزمن الجميل انتها كان زمان اللى يجى يركب فنى ويركب با المتور ويظبط المدار كان فنين بجد دلوقتى اى حد بيعمل فنى لمجرد يجيب النايل سات
كنت زمن استقبل قنوات artعلى استرا
وكان فى باقت قنوت اسمه k1 k2 k3على اسنرا فى ايام زمن الشغل الكويس

[adelmof40]

علي مصراوي سات

تحمل مسؤليته تجاه احياء تراث عباقرة الزمن الجميل
ويضع أعضائه في عينيه
ويقدم خدمة لاعضائه من خلال الاتصال بالفنين
الأعضاء المسجلين في سجله
الناصع


مطلب شعبي حرام فلوسي بتضيع

[محمد بونجا 2]

المشاركة الأصلية كتبت بواسطة adelmof40

علي مصراوي سات

تحمل مسؤليته تجاه احياء تراث عباقرة الزمن الجميل
ويضع أعضائه في عينيه
ويقدم خدمة لاعضائه من خلال الاتصال بالفنين
الأعضاء المسجلين في سجله
الناصع


مطلب شعبي حرام فلوسي بتضيع

التواصل ممنوع اخى الكريم ونحن نحترم قوانين المنتدى