[Hossam Mokhtar]

السلام عليكم، كان نفسى اعرف حد غيرى ملاحظ ومخنوق من تغطية قنوات beIN للـ NBA؟ انا اقولكم ايه المشكلة وازاى رياضة مثيرة ودورى عظيم زى ده متعته بتبوظ عليا كل ليلة!!

1. التعليق العربى
   
   تعليق فى منتهى السوء، فيه فرق رهيييييييييب بين المذيعين العرب والمذيعين الامريكان. الفرق بالظبط بينهم عامل زى الفرق بين واحد عنده 7 سنين بيعلق على ماتش وواحد.. اقول ايه.. خبير ممكن يألف كتب فى السلة. كل اللى المذيع العربى بيعمله انه بيوصف اللى هو شايفه وبجمل مكررة يخليك تزهق اصلاً من الماتش. وياريته اصلاً بيوصف صح!! فلان معاه الكورة اداه لعلان وبيشوط ياسلااااااام الله ع الثلاثية .. ولو ضاعت يقول والمتابعة الدفاعية. ولو خرجت او حصل خطأ يقول خطأ يستوجب دخول الكورة من الحد الجانبى.. (لا والله؟!). لو الحكام بيستخدموا نظام الاعادة مثلاً عشان يشوفوا حاجة معينة، مبيبقاش فاهم اصلاً هم عايزين يحددوا ايه لانه للاسف معندوش دراية ببعض القوانين! وبينطق اسماء اللعيبة غلط: يعنى صانع الالعاب الواعد جيف تيج خلاه تياجو، وبييلس خلاه بايلص! يعنى بدل ما بتدخل على ويكيبديا عشان تجيب معلومة ان بوسطن واخد 17 بطولة وتتحفنا بيها كل ليلة، اتعب نفسك شوية ولو مش متأكد من طريقة نطق لاعب خش على موقع Forvo عشان تعرف. انا مش بعيب فى المذيعين العرب فى العموم.. بالعكس انا بتفرج على كورة بالعربى ومذيعين فى منتهى الثقافة والفهم فى امور اللعبة وخفة الدم كمان لو عايز. وكنت بتفرج على تنس بتعليق السنهورى واخوه.. حاجة اخر جمال.. بيتكلم فى كـــــــل حاجة وبيعرفنى حاجات ومعلومات وبيحكى لقاءات شخصية عملها مع اللعيبة. مذيع الفورمولا 1 برضه تقريباً اسمه ايمن.. برضه حاجة فى قمة الروعة بيتكلم فى كل حاجة واصلاً هو اللى حببنى فى اللعبة.
   من الاخر المذيع المريكى او الـ2 بقى لان بيجيبوا واحد بيوصف لعبة بلعبة ودايما بيقول احصائيات فى منتهى الجمال اثناء الماتش ومن الدورى عموماً يعرفك ايه اللى بيحصل، والمحلل الفنى اللى معاه بيحلل طرق اللعب وخلافه وكل استحواذ اصلاً مختلف عن التانى بالنسبالهم ومتعة فى حد ذاتها انك تعرف ان كل الابعاد دى موجودة فى السلة وهم بيتكلموا فيها.. حاجات عمرى ما اتخيل ان المذيع العربى عمره عرفها ولا هيعرفها اصلاً فى حياته!! ناهيك عن الهزار طبعاً اثناء التعليق والشخصيات اللى بيستضيفوها .. يعنى وجبة دسمة..
   
2. طريقة النقل من القمر الصناعى عموماً
   
   طبعاً السلة بتقف كتيرعشان الاوقات المستقطعة وخلافه.. ومن اللحظة دى بقى بيبتدوا يفسدوا عليك المتعة. يعنى بيقطع البث خالص، تمام؟ بس مش طالما بيرجع لما الماتش بيبدأ يبقى كويس، صح؟ لأ لاااااااازم دايمـــــــــأ يرجع متأخر بعد 20 30 ثانية مثلاً. ماشى طب وايه المشكلة يعنى، جات على شوية الثوانى دى؟ انا اقولكم بقى ايه المشكلة.. فى السلة عموماً لما وقت مستقطع بيتطلب، على الاغلب الماتش بيستكمل بتنفيذ Set Play يعنى لعبة او جملة متفق عليها، والجمل دى بتبقى من احسن اللعب فى الماتش اصلاً.!!! يرجعلك الارسال بقى على رميتين حرتين بيتشاطوا مثلاً والرمية التانية كمان بيتابع عليها.. يعنى لعبة اتلعبت واتعمل فاول واتشاطت شوطة وده كله وهم جايبين فواصل وبروموهات ملهاش اى 60 لازمة. ضيف على كده ان انا متابع المذيع الاجنبى اصلاً (اومال انتو عاملين قناة مخصوص للإنجليزى ليه؟؟؟!!!!) يرجعولى الارسال وهو بيقول نص جملة مثلاً.. "...وعشان كده كوبى براينت احسن من ليبرون جيمس"... يعنى الراجل كان بيقول حاجة مهمة.. ناهيك بقى عن الاحصائيات اللى بين الفواصل اللى بيضيعوها عليا والمقابلات مع المدربين والـHighlights يا نهار اسود .. دى تغطية كارثة والله!!
   
   
3. قناة الـ NBA TV
   
   بسبب ان الماتشات بتتذاع فى وقت متأخر عشان فرق التوقيت، فانا متأكد ان معظم الناس حتى فى قارة اوروبا بيتفرجوا على الماتشات معادة.. لكن فى الوقت اللى قناة NBA TV بتسيبلك الارسال خالص بقى ونادراً ما بيقطعوا، يعنى تغطية ممتازة على الهوا، لكن الاعادات بتاعتهم كارثة برضه!! مخصصين ساعتين بالظبط للاعادة.. ومش مهم بقى الماتش ياخد اكتر من كده. بين الشوطين لو لقيتهم جابوا فاصل كبير (10 او 15 دقيقة) افهم على طول ان الماتش ده هيخلص فى الوقت الاصلى.. حاجة فى منتهى الغباء. لو جابوا فاصل دقيقة او 2 يبقى على الاغلب فيه وقت اضافى.. ولو فيه بقى وقتين اضافيين تبقى وقعتك سودة!!! لانهم هيقطعوا اجزاء من الماتش ويجيبولك صوت كده "ودلوقتى هنروح للدقيقة الفولانية فى الربع التانى..." ياخرابى ...!! يعنى مش بس قطع عليا لقطات ممكن تكون مهمة، لأ وكمان حرقلى الماتش وفهمنى انه هيخلص بعد وقت اضافى واحد على الاقل!!!!!!
   
   
4. ولسة كمان لما السنة الميلادية الجديدة تبدأ وموسم التنس يبتدى، التنس بيحتل القناة الـ12 طول النهار تقريباً. تيجى تشوف الماتش معاد فين، تلاقيه معاد على قناة 9 بتعليق عربى بس.. وميتعادش خالص بالانجليزى طول اليوم.. مش مهم.. إشرب من البحر.. طب هيجرى ايه يعنى لو خليتوا التعليق الاجنبى متاح على القناة الصوتية التانية؟؟!! اقسم بالله السنة اللى فاتت لما كنت بلاقى ماتش معاد بالعربى كنت بقفله وادخل احمله من على النت!! اد كده التعليق العربى فقير.
   
   
5. تيجى تحمل ماتشات من ع النت تغلب بقى على ما تستقر على ابلودر كويس متكونش ماتشاته بتقطع ولا فيها اى مشاكل وبجودة زبالة طبعاً عشان احجام صغيرة مع سرعات النت اللى موجودة فى مصر. غير انها بتبقى ماتشات محروقة برضه لانهم بيذكروا الحجم ومدة الماتش اللى انا ببقى بحاول اتفاداهم على اد ما اقدر!!!
   
   
6. تيجى تتفرج على سكاى الايطالية تلاقيها بتقطع ومشاكل ******* الخ.. القنوات البولندية مبتقطعش بس بيذيعوا بتعليق بولندى.. انا بيجيلى صداع اصلاً لما بتابع ماتشات من عليها. والقنوات بتاعت اموس جودتها زبالة (300*600 دى باين؟) يسيبلك التعليق الامريكى ويقوم يدخل زى الخازوق كده فى اللقطات المهمة ويحلل بالعبرى.. ايه ده؟!!!؟؟؟

يعنى الخلاصة عشان اتابع واستمتع بماتشات الـNBA لازم يا اما اسافر امريكا.. يا اما اقعد سهران بالليل لغاية 4 الفجر عشان اتابعهم على الهوا من على قناة NBA TV بس!!!!!

[waelnomaan]

هاقولك علي فكره حلوه اقفل التليفزيون ونام هتقرفنا معاك ليه

[DmgRoxx]

المشاركة الأصلية كتبت بواسطة waelnomaan

هاقولك علي فكره حلوه اقفل التليفزيون ونام هتقرفنا معاك ليه

الكلام يكون احسن من كده

وللاسف الرياضه ملهاش جمهور اوى بالمقارنه مثلا بالقدم والتنس والمصارعه فمش بيصرفوا عليها اوى
و Sky مش وحشه اوى زى م انت موضح فتعتبر هى الحل الامثل

[رامى محمد رضا]

انا بصراحة بحب اللعبة دى بس تقريبا كل فين وفين لما اتفرج عليها

[alkholy]

ملحوظة كويسة وفعلا لو كدة يبقى عندك حق وكدة بيعملوا ملل للمشاهد

[spacetiger]

الباقة موجهة للمستخدم العربى بالأساس فطبيعى يكون التركيز على الرياضيات الشعبية و الأكثر انتشارا بين الشريحة المستهدفة اللى هى زى كرة القدم و التنس .. الخ
كرة السلة ملهاش جمهور كبير بين المشاهدين العرب الا ما ندر .. فطبيعى انها متكونش بمستوى الرياضات الشعبية فى التغطية و الاهتمام ...

العرض و الطلب بيحكم كل حاجة تقريبا .. و كرة السلة و الرياضات المختلفة عموما مش استثناء ...

[روبينيو بس]

sky sport تعمل الان HD بدون تقطيع مستمر بالعكس ممتازة تعتبر كالباقي تقريبا بالنسبة لكلامك اوفقك تماما التغطية ضعيفة خصوصا القطع في التايم اوت اهم الاحصائيات والمقابلات واللقات لانشاهدها خصوصا في امريكا كل مباراة قناة مختلفة تنقل اللقائ وليس مصدر واحد في اشياء تنافسية بين tnt و espn و fox sport وnba
ينتج عن تغطية رهيبة بسسسسسسس الله ينعل bein sport

[محمود يوسف 1974]

المشاركة الأصلية كتبت بواسطة waelnomaan

هاقولك علي فكره حلوه اقفل التليفزيون ونام هتقرفنا معاك ليه

عفوا اخى الفاضل
الاستاذ يقول على حاجات هو شايفها غلط فى القناة دى وينتقدها نقد ايجابى فبدل ما نتريق عليه ونتهمه بالقرف مثلما حضرتك تفضلت وقولتها فى تعليقك نتناقش معاه بموضوعية
ثم حضرتك لو انت شايف انه بيقول كلام فاضى فبلاش تحرجه ومتعلقش
هدانا الله واياك الى مايحب ويرضى
والسلام عليكم

[DmgRoxx]

احب اضيف امبارح لقيت قناه Canal+Sport على Hotbird ناقله لماتش سله بس مش عارف اذا كانت البطوله دى ولا لا لانى مش من عشاق السله بس حبيت افيدك يمكن تنفعك ودى قناه ثابته جدا على الشيرينج وكانها قناه مفتوحه

[PremierUA1995]

اتفق معاك تماما

انا اعانى مثلى مثلك

[mostafa]

اسهر واتفرج علي بالتعليق لانجليزي احسن يا حسام

الحاجات المعادة مش بيبقي ليها طعم

[samehzein]

قنوات بين الفرنسيه علي الاسترا كويسه في السله التعليق فرنسي جميل مع اني مش بافهم حاجه