[sheko fun]

( بــــــــســــــم اللّه الرحمــــــــــــن الرحــــــــــــــيم )

طبعا كلنا عارفين ان مصر من أسوأ الدول في العالم من حيث خدمة الإنترنت ..
ومعظمنا بيسئل كتير نفسه ايه السبب وايه المشكلة .. فأنا حبيت اوضح لحضراتكم التفاصيل اللي أعرفها .. لأني بحب دايما لو عندي معلومات افيد بيها الناس ( لعل الله يجعلنا ممن يفيدون الناس ولو بالقليل ) .

أولا : ( سرعة الإنترنت ) :-
ــــــــــــــــــــــــــــــــــــــــــــــــ

سرعة الإنترنت بتتحدد من كذا عامل ( أهم عامل فيهم ) :: المسافة بينك وبين السنترال اللي حضرتك تابع ليه :: طب ليه

* لأن كل مازاد طول السلك بينك وبين السنترال زادت المقاومة داخل السلك
بمعني ان كل ماكنت بعيد عن السنترال .. كل ما هيبقي فيه مقاومة علي السلك اللي واصل بينك وبين السنترال .. كل ما هيأثر سلبا علي السرعة اللي هتوصل لحضرتك .

- لو بيت حضرتك اللي ساكن فيه بعيد عن السنترال بأكتر من 1400 متر .. أعرف ان ماينفعش توصلك سرعات عالية .. يعني لو أشتركت علي سرعة 8 ميجا مثلا ( مش هيوصلك منهم غير 2 ميجا او اقل ) .. لاكن لو مشترك علي سرعة 2 ميجا او 1 ميجا هتوصلك بشكل سليم ..

- طب واحد ساكن بعيد عن السنترال اللي تابع ليه بأكتر من 2500 متر مثلا ... ( يبقي يعرف ان اكتر سرعة هتوصلو 512 ) مهما حاول يعللي سرعته من أي شركة مشترك فيها .. مش هيوصللوا غير 512 ...( وهيبقي باين في الشركة اللي هو تابع في السيستم ان مفيش مشكلة عندهم وواصلوا السرعة اللي هو متعاقد عليها مثلا 2 ميجا من جانبهم بشكل سليم ) لاكن حضرتك حقيقي مش هتستفيد غير بسرعة 512 بس .. ومش بتوصلك اكتر من كدة .

(((( طب دة سببه إييه ؟ )))) : المشكلة كلها في الأسلاك بتاعت المصرية للإتصالات اللي تحت الأرض المتوصلة من السنترال لغاية بيت حضرتك ..

والمشكلة دي في البنية التحتية لمصر ( لأن من ساعة ما المصرية للإتصالات فتحت في مصر من زمان وهي هي نفس الأسلاك اللي تحت الأرض ماتغيرتش ) .

((( طب دلوقتي بيعملوا كابلات فايبر يبقي المفروض السرعة تزييد ؟؟ ))) :
فعلا دة بيحصل دلوقتي في بعض المناطق لاكن اللي بيتغير لفايبر السلك اللي في السنترال بس اللي في المناطق اللي تم التغير فيها لفايبر .... وهما بيحاولوا دلوقتي انهم يغيروا أسلاك جميع سنترالات القاهرة الأول ودة طبعا هياخد وقت كبير شوية ... وبعد مايتغير الأسلاك اللي في السنترالات هيبدئوا يغيروا الكابلات الللي تحت الأرض بقي من النحاس للفايبر . ودة ممكن ياخد من 8 سنين لعشر سنين قدام .

يبقي عرفنا ان أهم سبب رئيسي للسرعة ان يكون بيتك قريب من السنترال .


* طب فيه ناس هتقولي انا ساكن في وش السنترال والسرعة تعبانة بردوا .

- هنا بتبقي المشكلة في اجهزة شركة الإنترنت الموجودة في السنترال اللي حضرتك مشترك فيها ( لأن بيبقي منطقة حضرتك مثلا معروف ان عدد سكانها قليل .. فشركة الانترنت جابت للسنترال اجهزة تساعي عدد بسيط شوية من العملاء ... فاللي حصل ان المنطقة زاد فيها عدد السكان بشكل كبيير جدا في وقت قصير ومعظمهم اشترك في نفس شركة الانترنت اللي حضرتك تابع ليها فعمل ضغط علي اجهزتهم اللي هي اصلا مش بتستحمل غير عدد بسيط فعمل مشكلة في السرعة اللي وصلا لحضرتك ) ... ودة حصل بشكل كبير في مناطق زي ( حدائق الأهرام - العاشر من رمضان ) وفيه مناطق كتير تانية .. بس دول علي سبيل المثال يعني .

--- طيب دي حلها ايه ( ان حضرتك تشترك مع شركة تانية في الانترنت ) يعني لو كنت مثلا فودافون أشترك مع اتصالات .... او لو كنت TE Data غير واشترك في فودافون ... دة علي سبيل المثال .


فيه مشكلة تانية بتأثر سلبا بشكل جاااااااااااامد علي الإنترنت وللأسف ملهاش حل ... ( لو حضرتك ساكن في عمارة وفيه جنبك عمارة علي السطوح بتاعها معمول برج استقبال شبكة موبايلات ) .. للاسف دي ملهاش حل ولا حتي علي المدي البعيد ... الا ان حضرتك تعزل .


* فيه بعض مناطق جديدة في القاهرة تم انشائها قدرت الحكومة انها تعمل ليها بنية تحتية كويسة لأن كانت المناطق دي صحرا من قريب ولما جوم يبنوها كان مشروع كبير واتصرف عليه كتير وعملوا ليه بنية تحتية كويسة ... زي ( مدينتي - القطامية هايتس ) وفيه مدينة كمان تقريبا معاهم بس مش متذكرها .... المناطق دي ليها سرعات خاصة واشتراك خاص في شركة الانترنت بيوصل سرعة الانترنت عندهم الي 100 ميجا بت .


-- كدة عرفنا مشكلة السرعة --

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــ

ثانياَ : ( عدم ثبات خدمة الانترنت ) :-
ــــــــــــــــــــــــــــــــــــــــــــــــــ ــــــــــ

عندنا بردوا مشكلة ان كتييييييييير جدا بنلاقي الراوتر لمبة ال ADSL اللي فيه فصلت مرة واحدة ... وتبدا تنور وتفصل وترجع تشتغل ... وبعدين تعمل الموضوع دة تاني وتالت ورابع في كذا وقت ....

((( طب ايه السبب ؟ ))) :

* هنا فيه اسباب كتييير هقول لحضراتكم اهمهم :

- اول حاجة لازم نعرف الطريقة السليمة في التوصيل من البورت بتاع خط التلفون اللي في العمارة بتاعت حضرتك لغاية شقة حضرتك فوق .. معظم الناس عرفاها طبعا .. لكن بعض الناس ماتعرفهاش .

( السلك الرئيسي الي جي من بوكس التلفون تحت لحد شقة حضرتك بيكون منتهي عند حضرتك بكليبس اللي هو RJ 11 )

بنجيب سبليتر ( شكل الاسبليتر فيه 3 منافذ ) ناحية فيها منفذ واحد مكتوب عليها Line ... وفيه ناحية فيها منفذين مكتوب عليهم Phone و Modem .. ( او مرسوم علي فتحة سماعة تلفون والفتحة التانية شكل راوتر )

--- السلك الرئيسي الي طالع لنا من البوكس اللي تحت في الشارع ( بنحط طرف السلك دة في فتحة Line اللي في الاسبليتر )

وبنجيب سلكين تانيين بتوع سلك التليفون اللي هما RJ 11

وبنحط طرف السلك في فتحة Phone اللي في الاسبليتر والطرف التاني من السلك دة في عدة التليفون اللي في الشقة ...

و السلك التاني بنحط الطرف بتاعه في فتحة Modem اللي في الاسبليتر والطرف التاني في الراوتر .

****** لو عكست اي حاجة غير اللي انا قلتها دي الانترنت مش هيشتغل معاك ******

* طب ايه وظيفة الاسبليتر ( وظيفتوا ان السلك اللي جي لحضرتك من السنترال بيكون فيه Data و Voice ...... فالاسبليتر دة بيقدر يفرق بينهم ويددي ال Data للراوتر بس و ال Voice للتلفون بس ) ..


***** في ناس بتعمل تفريعة من السلك اللي جي من البوكس تحت وتطلع منه سلك للراوتر وسلك للتليفون والكهربائي اللي عملهالهم يقولهم دة بدل ماتركب اسبليتر وكدة ... الكلام دة غلط جداا وهيسبب مشاكل للانترنت عندك .

--- طيب لو حضرتك بتوصل عن طريق فيش في الحيطة ::

* لو هتعمل فيشة واحدة بس اللي في الحيطة يبقي بدخل السلك الرئيسي عليها عادي من جوة الحيطة .. وبتاخد سلك من بره الحيطة توصلوا باسبليتر في فتحة ال line وتعمل نفس اللي قلنا عليه فوق .


* طب لو هتعمل كذا فيشة في الحيطة .. بحيث هتعمل كذا عدة تليفون في كذا حتة في الشقة .. ((((((( في الحالة دي السلك الرئيسي اللي هتدخلوا من جوة الحيطة هتركبلوا الاسبليتر من جوة الحيطة وتطلع المخرج بتاع الراوتر من فيشة لوحدها تكون خاصة بالراوتر بس ... والفيش الاخري خاصة بالتلفونات ))))))) .

--- طيب كدة عرفنا التوصيلات الصح --- ليه بقي بيحصل انقطاع في خدمة الانترنت ؟؟؟؟

* لو السلك عند حضرتك الرئيسي ماشي علي الارض او ماشي علي الحيطة ..... تأكد انو مش ماشي موازي لسلك دش ... او تكيف ... او مش قريب من جنب تلاجة ... او غسالة ... او ميكرويف ... او مش قريب من لمبة نيون .... كل دول بيأدوا لتوليد ممجال مغناطيسي مع التيار اللي جوة السلك الرئيسي عند حضرتك وبيقطع الخدمة .

لان فيه ساعات كهربائية بيجمعوا كل الاسلاك اللي عند حضرتك ويربطوهم بابزام مع بعض ويمشوهم مع بعض بحيث ماياخودش شكل وحش للشقة ... لاكن الحقيقة ان دة هيضر حضرتك في الانترنت .


* فالحل ان حضرتك تبعد السلك الرئيسي عن اي حاجة من الحاجات اللي قلنا عليها دي .... او نمشي السلك الرئيسي بشكل قطعي علي الاسلاك التانية مش موازي .


---- في حاجة تانية ان لو السلك طالع من بلكونة حضرتك وفيه علي طرف البلكونة سماعة مكبرة لجامع تحت حضرتك ... والسلك معدي من جنبها .... فأول ما السماعة هتشتغل هيتقطع الانترنت بردوا ...

فلازم حضرتك تبعد السلك عن اي سماعة مكبرة زي كدة ....

--- ونفس الكلام في ناس بيبقي ساكن مثلا في الدور التاني او التالت وفي وش البلكونة بتاعتة عمود نور ... فبيربط السلك الرئيسي في عمود النور ويدخلوا من البلكونة علي طول ... ودة بردوا هيعمل نفس المشكلة ...لأن من بعد المغرب هيبدأ ينور عمود النور فهيسبب انقطاع في ال ADSL عند حضرتك ..

---- وطبعا لو فيه لحامات في السلك الرئيسي عند حضرتك .. هيتسبب ان ممكن مع مرور الوقت هيدخل للسلك هوا وممكن يدخل مياة المطر .. فهيسبب جنزرة للنحاس اللي في السلك وطبعا هيعمل شوشرة علي الحرارة وهيفضل يفصل الخدمة عند حضرتك .


--- طيب لو كل دة عندنا سليم واتاكدنا مننوا ... والخدمة بتنقطع بردوا ... بنوصل الراوتر بالسلك الرئيسي علي طول من غير سبليتر ... لو لاقيناه استقر ومفيش انقطاع ... يبقي المشكلة ان الاسبليتر باظ او السلك اللي من الاسبليتر للراوتر فيه مشكلة ... فبنغيرهم .

--- فياريت ناخد بالنا كويس جدا من الحاجات دي .. لأنها حاجات صغيرة لاكن بتعمل مشاكل للأسف زي ما ذكرت لحضراتكم .

* وبردوا موجات ال AM الخاصة ب ابراج استقبال شبكة المحمول لو البيت اللي حضرتك ساكن فيه لو جنبه فيه برج استقبال شبكة بيأثر للأسف بردوا في انقطاع الخدمة عند حضرتك ..


ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــ
ثالثاَ : ( كارت الNETWORK ) او NIC وكابل الانترنت :
ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــــ

* كارت النتورك اللي عند حضرتك في كيسة الكمبيوتر لازم تكون متأكد ان حضرتك معرفوا علي الوندوز وشغال بشكل سليم ومعمول له Enable مش Disable من الايكونة Local Area Connection


* ونتأكد كويس جدا جدا جدا من سلامة كابل النتورك ( RJ 45 ) الواصل بين الراوتر والكمبيوتر ... من حيث ان مايكونش فيه اي تانيات في السلك ... ونتأكد من سلامة التأريج من الطرفين ...

**** نفس الكلام .. كابل النتورك لازم مايكونش موازي لسلك دش او تكيف او لامبة نيون او الحاجات الي ذكرناها فوق ....... عشان مايتولدش طاقة كهرومغناطيسية تفصل التيار اللي في السلك ... وبالتالي هيفصل الانترنت علي الكمبيوتر الخاص بحضرتك وتروح للراوتر تلاقي لمبة الADSL شغالة ثابتة وسليمة ومفيش اي مشكلة والواي فاي شغال معاك عادي ... وتفضل تقول طب اش معني الكمبيوتر دة ... ويطلع في الأخر الكابل الي رايح للكمبيوتر موازي للحاجات الي ذكرناها .

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــ


في النهاية اتمني من كل قلبي ان اكون افدت ولو القليل من الناس بهذا الموضوع المتواضع .. وأسف جدا لو كنت أطلت علي حضراتكم .. واتمني اني اكون وصلت المعلومات لحضراتكم بصورة سهلة للجميع .



مع تمنياتي للجميع بالتوفيـــــــــــــــــق

[حمدي محمد شمس]

استاذ | شيكو فن لكم خالص تحياتي علي هذا الشرح المتميز

[حمدى مندى]

شرح ممتاز ومجهود رائع بارك الله فيك

[sheko fun]

المشاركة الأصلية كتبت بواسطة حمدي محمد شمس

استاذ | شيكو فن لكم خالص تحياتي علي هذا الشرح المتميز

شكرا لحضرتك يا أستاذ حمدي .


واتمني يارب ان يكون الموضوع مفيد ويستفاد مننوا الناس .

ربنا يجعلنا من المفيدين للناس يارب

شكرا لحضرتك مرة تانية .

[sheko fun]

المشاركة الأصلية كتبت بواسطة حمدى مندى

شرح ممتاز ومجهود رائع بارك الله فيك

شكرا استاذ حمدي .. ربنا يبارك في حضرتك علي هذا الدعاء الغالي .

[SHERFFAHMY]

شرح وافى جزاك الله خيرا

[sheko fun]

المشاركة الأصلية كتبت بواسطة SHERFFAHMY

شرح وافى جزاك الله خيرا

شكرا لحضرتك استاذ شريف علي هذا الدعاء .

ربنا يبارك في حضرك .

[the...game]

شرح وافى جدا جزاك الله خيرا

[mai012]

جزاك الله خيرا

[masrysat]

طيب الشركات تريحنا و تشغلنا USB مثل اتصلات وخطوط مفتوحه ويريحو الناس وهم يوفرو الكبلات والكلام دة

[عبدالسلام شعير]

تحياتي علي هذا الشرح المتميز

[مرسليو]

شرح فوق الممتاز بارك الله فيك

[asembadran]

كلامك كله مظبووووط
والف شكر على الشرح
ولك تحياتى

[sheko fun]

المشاركة الأصلية كتبت بواسطة the...game

شرح وافى جدا جزاك الله خيرا

شكرا لدعاء حضرتك ... بارك الله فيك

[sheko fun]

المشاركة الأصلية كتبت بواسطة mai012

جزاك الله خيرا

ربنا يسعد حضرتك ... شكرا للدعاء