[NOOR SAT]

بسم الله الرحمن الرحيم

كتير مننا بتقف دراسته او عمله او سفره ..

على موقفه من الخدمة العسكرية .. او الاعفاء

الموضوع ده باذن الله هيكون مرجع لمعرفة كافة الاوراق والاجراءات والتكاليف .. المطلوبة .. عشان ناخد الاعفاء .. ومن غير محامى او اى حد يستغلك ..

طبعا الكلام للناس اللى تعدت سن الـ 30

يعنى كانوا مثلا فى دراسة او جامعة وتجاوز الحد الأقصى لسن تأجيل

التجنيد (28سنة) بالتالى يتم وقف القيد (مؤقتا) من الكلية حتى

تأتى بموقفك من التجنيد بان تؤدى الخدمة العسكرية .. او ان هناك سبب طبى أو تنتظر حتى سن الـ 30 وتطلب محاكمة عسكرية وتدفع غرامة ..

((طيب احنا هنا كلامنا عن اى حد تجاوز سن الـ 30 مهما كان))

وحابب يعرف اجراءات المحاكمة العسكرية ..

اولا : تجهيز مبلغ فى حدود 3500 جنيه
ثلاثة الاف وخمسمائة جنيها
الى 6000 جنيه
ستة الاف جنيه

الأرواق المطلوبة

1- اصل البطاقة
2- شهادة ميلاد كمبيوتر
3- صحيفة الحالة الجنائية " فيش و تشبيه "
4- شهادة تاكيد بيانات (من السجل المدنى بالعباسية)
وممكن لاتحتاج لها ان كان الرقم الثلاثى موجود فى شهادة ميلاد الكمبيوتر

التوجه الى الهايكستب .. بالأوراق السابقة

التوجه الى شباك 9 .. وهيطلب ملف من نفس المكان ملف بـ 75 جنيه

والعودة مرة اخرى الى شباك 9

والانتظار حتى يعطيك اخطار بموعد ومكان محاكمتك ..

(التخلف عن حضور هذا الموعد والمحاكمة يصدر عليك الحكم غيابيا)

التوجه الى المحكمة العسكرية باكرا ( متواجدة فى الحى العاشر - مدينة نصر - بعد سوق السيارات ) .. وان كانت اول المحاكمة تبدأ فى حدود الظهر او 11 صباحا .. ولكن حتى تأخذ على الأجواء هناك ..

يفضل يكون مظهرك طبيعيى جدا وغير متكلف .. (يعنى من الاخر انت رايح محكمة عشان تدفع غرامة هتقول انك جاى من سفر او شغال شغل عالى او واضح عليك الغنى .. هتاخد غرامة عالية)

هذا اليوم اجراءاته طويلة .. بمعنى انك مثلا ستتوجه الى المحكمة من

9 صباحا .. وتنتظر حتى السماح بالدخول لقاعة المحكمة العسكرية

حدود الساعة 11 وقد تبدأ المحاكمة فترة الظهيرة .. ودفع الغرامة حدود الساعة 2:30 او 3

اجراءات المحاكمة سريعة وحازمة جدا .. ومعاك فى القاعة حوالى 50 زيك ..

بمعنى مفيش كلام كتير ..

اول شئ تسمع اسمك .. تتوجه لسيادة القاضى ..يطلب منك البطاقة
ويسألك سؤالين فقط ..
1-(مجيتش الجيش ليه يا كذا )
ردك يكون سريع ومقنع واياك تقول انك جاى من الخارج .. ممكن غرامتك توصل لـ 10000
2-تانى سؤال شغال ايه ومرتبك كام ؟..
ياريت وطبعا اغلبنا شغال فى شغل من الطبقة الادنى او المتوسطة .. يعنى تقول بقال او محل عطارة او انك شغال صبى او صنايعى فى اى حتة .. ومرتب فى حدود 1200 جنيه احيانا لايسأل عن المرتب

بعد الانتهاء من استجوابك من سيادة القاضى العسكرى ..

تننظر سماع حكمك مع بقية المتواجدين ..

سيادة القاضي العسكرى بيكون مقدر جدا لحالة الناس وشكلها
وهو امام امران .. التخلف عن اداء الخدمة العسكرية لوطنك
هى جريمة يعاقب عليها القانون .. والامر الاخر هو الحالة الاجتماعية
او الظروف المادية لمتخلف الخدمة العسكرية
وغالبا اغلبية الاحكام ان شاء الله بتكون الحد الادنى 3500 جنيه
او 4000 الاف .. ونادرا ماتتعدى هذه المبالغ .. الا لو ذكرت انك قادم من الخارج .. او عملك ومرتبك عالى ممكن توصل لـ 10000

بعد معرفة الحكم عليك ومعرفة الغرامة الموقعة عليك ..

تخرج الى المبنى بجوار المحكمة (شباك28 نيابات)

وتننظر حدود الساعة 2:30 وياريت لاتبعد اطلاقا عن مكان الاستراحة لهذا المكان .. لان فى اى لحظة ممكن يسمحوا بالدخول عشان تدفع الغرامة المقررة عليك .. من سيادة القاضى ..

ثم تدفع الغرامة .. وتاخد (وصل دفع احمر) يفيد بانك دفعت الغرامة
وتحافظ عليه جدا

وهيطلب منك الحضور بعدها بـ 15 يوم مرة اخرى للمحكمة العسكرية

حتى تأخذ صورة للحكم .. الذى صدر ودفعت به الغرامة .. وبعد ماتاخد صورة الحكم تروح تستلم بيه الاعفاء من الهايكستب

هتيجى اليوم ده متاخر شوية حدود الساعة 10 او 10:30

ومعاك
1- البطاقة الشخصية وصورة منها
2-(ايصال الدفع الاحمر) وصورة منه
2- اخطار موعد ورقم الملف (اللى معاك من الهايكستب + صورتين منه)

وتدخل نفس مبنى المحكمة اللى حضرته قبل كدة للمحاكمة ولكن تطلع الدور التانى نيابة شرق تسلمهم الورق اللى معاك للنظر فيه .. وبعدين هيقولك اطلع بالورق فوق نيابة شمال .. وتسلمهم الورق وتنتظر استلام
صورة الحكم ..
وهتدفع 30 جنيه وتستلم صورة الحكم

((استلام الاعفاء من الهايكستب))
تانى يوم هتروح بـ
1- البطاقة الشخصية
2-صورة الحكم
3-الوصل الدفع الاحمر
4-الاخطار اللى معاك بموعد المحاكمة ورقم الملف (وطبعا معاك منه صورة)

التوجه الى شباك 9 .. وتسليم الورق .. والانتظار
ودفع 30 جنيه واستلام الاعفاء .. ومبروك عليك ..

ارجو فقط اى حد يستفيد من هذا الموضوع
الدعاء لابى وامى رحمهما الله عن ظهر غيب

[abosozy]

الكلام ده للى قبل 2005 لكن اللى بعد 2005 لازم يوصل 36 سنه تقريبا

وايضا الكلام ده للى مقدمش فى الجيش اما اللى دخل الخيش وهرب موضوع تانى خالص

[MohamedYousri]

السلام عليكم جميعا


بإذن الله في نوفمبر القادم هيكون سني 30 سنه , و موقفي كان تأجيل موقت إعفاء المذكور مؤقتا من اداء الخدمه العسكريه و الوطنيه كونه العائل لشقيقه المؤجل لسن 28 مقيد بالسنه الخامسه ك طب جامعه عين شمس بعد والده المتجاوز سن 60 و عليه تقديم نفسه خلال 30 يوم من تاريخ زوال السبب و طبعا انا ما روحتش بعد زوال السبب و الشهاده اللي معايا هي تأجيل مؤقت ..

ف كنت عايز اعرف هل بعد ما اتم الـ30 هل الموقف زي ما هو و ابدأ في الاجراءات الخاصة بدفع الغرامة و الحصول علي الشهاده ام حصل اي تغييرات في الموقف ؟

شكرا جزيلا...