[إبراهيم داود]

مره شاب كان المفروض يدخل الجيش

فـ عمه كان حاجه كبيره و كان هيخلي جيشه بدل 3 سنين , سنه واحده , بيقول : انا بدرب نفسي ع التوكل و قبلة قلبي تبقى لله وحده , فـ أهلي عمالين يقولو لي كلم عمك كلم عمك , و أنا مش راضي , و يضغطوا عليا , و انا برضه لأ , انا توكلت ع الله وحده , قمت حالف منا رايح له , و يوم الكشف الطبي الصبح , رحت و كل ال حواليا ال معاه كارت , و ال معاه تليفون بيكلم الدكتور , ف لما جيه الدور عليا قالي الدكتور : ها ؟ معاك كارت ؟ قولت : لأ , طب هتكلم حد ؟ قولت برضه : لأ , قام بصلي باستغراب , و قعد يتفحص فيا كده , و كتب الصدمه : لائق ( 3 سنين ) , صعقت ! و الشيطان بدأ يدخلي , يارتني كلمت عمي ! , و بعدين قولت لأ لأ انا متوكل ع الله وحده , و خلاص زي ما تيجي , بيقول و انا خارج من الباب , بقيت الدكتور بيقولي : أستنى كده !!!
بصيت , قالي : لف بجنبك , لفيت بجنبي , قام بص كتير كده و قام فجأه كاتب : أشتباه في تقوس في العمود الفقري ( إعفاء ) .. !!!!

سبحاتك يارب .. هو كان عايز بظبط قلبه مع ربنا .. و كان أخر حاجه يتوقعها اعفاء ده عمه كان هيجبله سنه بدل 3 , فأتخذه وكيلا = )) !!

_____

- عمرك عملت توكيل لحد ؟
لو معملتش .. تعالى أقولك التوكيل بيحصل أزاي :

أول ما هتدخل الشهر العقاري .. هتروح للموظف تقوله عايز أعمل توكيل لفلان ده.. هيقولك : عام ولا خاص ؟ .. تقوله : يعني ايه ؟ .. يقولك : عام يعني كل حياتك و فلوسك و كله .. و الخاص : حاجه واحده بس .. فـ تقوله : لأ عام ! .. فـ يبص لك و يقولك : أنت متأكد ؟؟
فـ تقوله : أه متأكد .. فـ يقولك : خلي بالك هيتحكم في كل فلوسك .. مسوؤل عن تصرفاتك ..
فـ ترد تقوله : ايوا .. أنا واثق فيه جدا .. عمره ما هيضيعني .. فـ يقولك : تمضي ؟
تقوله : اه هات .. يقولك : متأكد .. تقوله أه .. و تمضي ..

(( هو انت علشان توكل واحد زي ده توكيل عام على حياتك كلها محتاج منه 3 صفات :
1- تثق فيه / 2- عنده خبره / 3- بيحبك و مهتم بيك ))

== ايه رأيك لو تبص للوكاله دي مش على بشر , لأ على رب البشر , توكله ؟ , تمضي؟==

تعالى الاول اوريك أزاي طمنك بـ 3 صفات دول علشان تتوكل عليه و تمضي ع توكيل عام لحياتك كلها معاه و أنت طمنك = )) :

- لو ركزت في القرآن .. هتلاقي دايماً قبل ما يقولك توكل .. يكلمك عن قدرته و قوته .. ( خبره - ثقه ) .. شوف الايات كده :

(( وَلِلَّهِ غَيْبُ السَّمَاوَاتِ وَالْأَرْضِ وَإِلَيْهِ يُرْجَعُ الْأَمْرُ كُلُّهُ فَاعْبُدْهُ وَتَوَكَّلْ عَلَيْ ))
= بيعرفك مين ال هتتوكل عليه , له الملك الأعظم , و كل الامور بترجع ليه هو .
.
(( رَبُّ الْمَشْرِقِ وَالْمَغْرِبِ لَا إِلَهَ إِلَّا هُوَ فَاتَّخِذْهُ وَكِيلًا ))
= هل أحتياجاتك بره المشرق و المغرب ؟ براهم علشان تدور على وكيل غيره ؟ كل ده عشان أما تقول وكلتك يارب , تطمن أنك مع العظيم ال أمور الكون كلها في يديه .
.
(() وَتَوَكَّلْ عَلَى الْعَزِيزِ الرَّحِيمِ (217) الَّذِي يَرَاكَ حِينَ تَقُومُ (218) وَتَقَلُّبَكَ فِي السَّاجِدِينَ ))
= عالم بيك , مطلع عليك , بيحبك , بيريحك و يطمنك .

........ الحمدلله أنك أنت الله .......

- يعني تعمل كل أسبابك .. يعني تكشف لما تتعب .. يعني تروح لأكبر محامي .. يعني تحط الـ cv بتاعك في كل شركه .. يعني تجيب اخرك في الاسباب .. و جواك تبص على الدكتور .. و المحامي .. و رئيس الشركه .. و كل سبب .. تبص لهم و تقول : ربنا الـ بيخلص .. مش أنت يا سبب .. هي باذن الله وحده

القصه ال فوق تبين لك أزاي الوكيل ساعات يقفل معاك السكك علشان يجيلك النصر من عنده علشان تبقى عبد الوكيل , التوكل : هو ترك تدبير النفس و الانخلاع من الحول و القوه بعد ما تعمل كل حاجه عليك .
.
التوكل يعني اذا فزع الناس أنت مطمئن .. لأننا ببص للأسباب فـ نهتم فـ نغتم .. معتقدين ان هي ال بتنفع أو تضر ,, زي الطفل ال ماسك طياره ورق .. معتقد انه هو ال بيحركها .. ميعرفش ان الرياح هي ال بتحركها .. فـ توكل على مالك كل شئ .. و أعلم ان من توكل على الله كفاه ..

(( وَمَن يَتَوَكَّلْ عَلَى اللَّهِ فَهُوَ حَسْبُهُ )) : حسبه يعني كافيه .

أمضي على توكيل عام لكل أمور حياتك .. فأتخذه وكيلا = ))

الوكيل
إنه_ألله

[جلال العسيلى]

بارك الله فيك
وجزاك الله خيرا