[مصطفى حسين احمد]

موضوع حلو ولذيذ وجميل ومهم جدا لكل الناس اللى شغالة فى مجال ضبط الاقمار الصناعية اللى لسة مبتدئين
اللى بيعانوا واحنا كنا بنعانى زيهم فى الماضى من البقاء فوق السطح ساعات وايام وليالى وكنا بنفشل فى التقاط النايل سات حتى
الموضوع دا وبفضل الله بعد ما تخلصه هتكون قادر على ضبط اى طبق فى اقل وقت وبأقل مجهود
اولا هنقول ايه هى الادوات المطلوبة وطريقة استخدامها وكيفية تحديد موقع القمر وضبط الطبق على مداره
اولا الادوات المستخدمة :-
1-ريسيفر ميني معالج ali متوفر عندى ببيعه فى القطاعى ب 150جنيه (عشان تجيب اسهل قناة فى التقاط الاشارة وتدوس info يجيبلك نسبة الاشارة ع الشاشة بتاعة الريسيفر)
2-مشترك سلك طويل جدا من 30 متر وانت طالع (هيبقى مصدر للكهربا من شقة الزبون لفوق السطوح)
3-سلك اشارة قصير يوصل بين القطعة اللى فى الطبق والريسيفر الميني اللى معاك من متر ل3 متر مثلا
4-طقم المفاتيح بتاعك اساسى فيهم 10/11 عشان الاطباق الصغيرة ومفتاح انجليزى وعدة كاملة عشان الاطباق الكبيرة
5-مفكات واحد عادى والتاني صليبة
6-بنسة وقصافة وبلاستر
حاجات بقى اضافية تكون معاك فى الشنطة كقطع غيار تستخدمها لو احتاجت ليها وتاخد حسابها بعيدا عن اجرة ايدك :-
1-كونيكتور اشارة . 2-قطعة. 3-لفات سلك بآحجام مختلفة. 4-كابلات 3×1 و3×3
كدا معانا كل حاجتنا وكل عدتنا تقريبا وهنبداء بقى نشتغل على نضيف واحنا واثقين ان مفيش حاجة هتعطلنا
اولا بقى لو الطبق لسة جديد ولسة هيركب فى فيديوهات كتير على النت بتعلمك ازاى تجمعه وكدا كدا انت هتعرف تجمعه لأن مفيش حاجة هتركب مكان التانية
بعد تثبيت القاعدة وتركيب الطبق فى مكانه هنيجى بقى لطريقة ضبط الطبق سواءا انت اللى ركبت او روحت لقيته ثابت وراكب من قبل كدا بس مهزوز ومتحرك من مكانه
اولا هنوصل السلك تحت ونطلعه لعندنا عشان يكون مصدر كهربا
هنركب فيه الادبتر بتاع الريسيفر ونوصل الريسيفر بالطبق عن طريق سلك الاشارة القصير جدا اللى احنا مجهزينه وندوس رقم 1 هيجيب قناة المجد اللى هنظبط الاشارة عليها لأن هى الوحيدة اللى ترددها مش بيتغير وثابتة فى مكانها علطول (طبعا هتكون اديت الجهاز ملف قنوات حديث واللى معندوش الكلام دا متوفر عندى) لما تجيب قناة المجد او اى قناة تكون متأكد انها شغالة وسهلة فى ضبط اشارتها هتضغط على زرار الانفو info هيجيبلك نسبة الاشارة 5% مثلا او اقل او اكتر انت هتحاول تعليها على قد ما تقدر
هتروح شمال ويمين وشرق وغرب لغاية ما الاشارة تتظبط وتعليها على قد ما تقدر تشوف هتوصل لأقصى حاجة معاك كام واثبت على كدا وافضل قلب فى القنوات هات 2 ودوس info وبعد كدا 3 ودوس info ثم 4 وهكذا جرب كام قناة عشوائيا وتكون متأكد انهم شغالين عندك وتمام واربط على اعلى حاجة وثبت واقل نسبة فى الاشارة هتكون 45 بالميت خالص عشان ميكونش فى تقطيع
ملحوظات
لو مفيش اشارة خالص والدنيا ميتة ع الاخر غير القطعة وجرب لو عيب قطعة لانه استحالة يكون عيب سلك لان السلك بتاعك وانت واثق منه وكدا كدا القطعة معاك
لو لقيت الاشارة جاية معاك فوق ومش جاية تحت يبقى تركب الريسيفر بتاعك بدال ريسيفر الزبون اشتغل يبقى المشكلة فى الريسيفر مشتغلش تحت مع انه كان شغال فوق يبقى فى مشكلة فى السلك وهتغيره
لو حد عنده اى اضافة او عنده اى معلومة يحب يفيدنا بيها هكون شاكر جدا
ولو حد عنده اى نقد هحترمه وهقدره واستفيد منه طبعا
وقريب جدا فى طريقة اجمل هتوفر دوشة سلك المشترك دى


اهداء من
مصطفى حسين جروب

لروساء الأقسام فى منتدانا العظيم والعريق

مصراوى سات
ولكل اعضاء المنتدى
نسألكم الدعاء

[ماجد الديرى]

اللة ينور

[أحمد ربيع بكرى]

بارك الله فيك اخي

[الشوبى]

بارك الله فيك اخي