[نور المصطفى]

الخطيب كاريزما زي التتش والمايسترو وأسطوره في الكوره زي بيليه ومارادونا
محسن صالح رمز كبير وعودته للقلعه الحمراء اسعدتني كثيرا وشابو مجلس بيبو
أفريقيا في الجزيره وأي قرار غير تتويج الاهلي وليفربول بالدوري مصيبه
فشل التجربه الالمانيه يعني نهايه الرياضه ولو لقاح كورونا مظهرش مبكرا هتبقي" كارثه"
عاشور لازم يعتزل وسليمان يستاهل الـ11 مليون .. وصالح ربنا يهديه ..وفتحي زعلني جدا
فايلر مدرب عالمي ..وبيفكرني بجوزيه.. والسايس عندي احسن من الجوهري
الوحش ظلمني.. وحسن حمدي رئيس نادي بفكر أوروبي
جوزيه كان يعشق الصخره وتريكه ..ولكن بركات كان عنده حاجه تانيه خالص
مصطفي شوبير حارس مصر القادم ..وعوده شريف وناصر وعمار واكرم مفيده
كينو و سيرينو وموليكا ثلاثه سوبر ستار ..وحجازي وصبحي نجوم من العيار الثقيل
البدري الاحق بتدريب المنتخب ..والتوأم اخواتي و اهلاويه متعصبين
ديانج قصه وحكايه ..وساسي فاكهه الزمالك ..والسوليه احسن لاعب في مصر
فاروق جعفر وصفوت "ادارجيه كوره "و عبدالحميد والتوأم ومنصور فرقوا كتير في تاريخ الزمالك
رئاسه ايهاب الخطيب لقناه الاهلي قرار صائب ..مرجان جندي مجهول في النادي
اسامه نبيه خانه التعبير في ازمه التفويت ..والابيض مع كارتيرون حاجه هايله
الفانله الحمراء تمنها غالي ..والعمل في الاهلي في اي منصب شرف وحمل تقيل
يعد من أفضل المواهب والأساطير الكرويه في مركزه كلاعب وسط في تاريخ الكره المصريه والنادي الأهلي أطلق عليه القاب عديده كان أبرزها بلاتيني مصر و علاء موهوب بدأ حياته بالمشاركه في مونديال العالم للشباب عام ٨١ وكان أحد نجوم المنتخب الوطني الحاصل علي بطوله كأس الأمم الأفريقية 86 إلي أن ختم حياته الكرويه بالصعود والمشاركه في مونديال 90.
حصل علي 20 بطوله بواقع 19 بطوله مع النادي الأهلي 7 دوري عام و5 كأس مصر و2 دوري الابطال الافريقي و3 كأس الكؤوس الافريقيه وبطوله افرواسيويه والدوره التنشيطية عام 90وبطوله امم افريقيا مع المنتخب الوطني 86 بالإضافه لحصوله علي العديد من الجوائز كافضل لاعب خط وسط في مصر من خلال اختياره عبر العديد من الاستفتاءات الرياضيه في فتره الثمنينات فضلا علي كونه كان أحد هدافي مباريات القمه بين الاهلي والزمالك.
فلااحد ينسي من جماهير الكره المصريه هدفه التاريخي بقميص النادي الأوليمبي في مرمي احمد شوبير حارس الأهلي الأسبق والذي ابكي به الملايين من الجماهير الحمراء
تواصل سوبر كورة مع مع أيقونه المارد الأحمر في حقبه الثمانينات علاء ميهوب فكان هذا الحوار الحصري والمختلف
بدايه أين كابتن علاء ميهوب في زمن الكورونا ؟
موجود الحمد لله في منزلي زي اغلب المصريين مع اسرتي وملتزم بشكل كبير بكل التعليمات والاحترازات الطبيه المطلوبه.
ماذا عن هواياتك المفضله منذ إيقاف النشاط الرياضي ؟
القراءه و مشاهده بعض المباريات القديمه وبعض البرامج والمسلسلات وأداء بعض التمارين والمواظبه علي رياضه المشي خلال فتره الصبح .
حدثنا عن إيجابيات وسلبيات تلك الفتره ؟
بصراحه مفيش إيجابيات يكفي اغلاق المساجد في كل العالم العربي ده أمر صعب جدا بصراحه عشان كده من وجهه نظري السلبيات اكتر بكتير من اي ايجابيه فبجانب الحرمان من صلاه الجماعه في المسجد اتحرمنا بردو من حاجات كتير ومن أهمها الذهاب للجيم وزياره الاصدقاء والمقربين لي في مقر النادي الاهلي بالجزيره بالاضافه الي والدتي واخواتي في الحوامديه.

رايك في عوده الحياه الكرويه في بعض دول أوربا وعلي رأسها المانيا ؟
شئ إيجابي طبعا واتمني نجاح التجربه خصوصا أن المعايير والترتيبات اللي بتحصل مش سهله خصوصا وأن هناك انديه عديده في اوربا تلقت بعض الصدمات بشأن اصابه نجوم لديها.
وهل تعتقد أن أي فشل للتجربه الالمانيه سيكون لها أثر سلبي علي عوده النشاط في مصر؟
بكل تأكيد ومش في مصر بس في كل دول العالم اللي عندها امل في عوده نشاطها الكروي والرياضي فربنا يستر
وماذا لوتم الغاء الدوري الالماني مثلا بعد أسابيع من اقامته ؟
هتبقي كارثه ورساله مرعبه لكل رياضي في العالم مفادها أن مفيش كوره ولارياضه تاني مادام لم يظهر أي لقاح او مصل أو علاج رسمي يقضي علي هذا الوباء اللعين.

هل انت مع عوده الدوري باحترازات طبيه ام مع الالغاء؟
طبعا..أي رياضي يتمني عوده النشاط ولكن باحترازات طبيه وتنظيم وترتيبات علي اعلي مستوي من الاحترافيه والحمايه لكل عناصر اللعبه وعشان كده بتمني نجاح التجربه الالمانيه لأنها هتفرق كتير قوي في مستقبل الكره في العالم
تعليقك لو تم إصدار قرار بإلغاء النشاط ةحرمان الاهلي من الدوري ؟
طبعا الغاء الدوري وكافه المسابقات وارد لان هناك دول عديده مثل هولندا وبلجيكا وفرنسا والكاميرون وفنزويلا وانجولا وكينيا قررت إلغاء مسابقاتها اما بالنسبه للقرار الذي ارفضه بشده فيتلخص في حرمان الاهلي من لقب الدوري طبعا لان هيبقي قرار ظالم وغير منطقي.
فهل يعقل مثلا أن الاتحاد الانجليزي يرفض منح ليفربول لقب الدوري لو قرر إلغاء المسابقه ؟!فضلا عن اغلب الدول اللي قررت الإلغاء أعلنت عن بطل مسابقه الدوري.

رايك في الحملة التي يتعرض لها الأهلي من أجل حرمانه من الحصول علي درع الدوري ؟
مع احترامي للجميع الحمله غير منطقيه وشكلها بايخ قوي بصراحه خصوصا وأن اللي بيتكلموا علي حرمان الاهلي من الحصول علي درع الدوري مش مقتنعين بكلامهم زي ماهما بردو مقتنعين تماما بأن الاهلي هو نمبر وان في مصر والشرق الأوسط.
كيف تري مستقبل الكره المصريه حال اتخاذ قرار الإلغاء من الدوله ؟
طبعا اي رياضي في مصر هيكون زعلان وهتبقي خساره فادحه للانديه وكل العاملين في المجال الرياضي لكن لازم نكون راضيين باي قرار يتم اتخاذه من الدوله وبالتحديد من المسؤولين في وزارتي الصحه والشباب والرياضه لأنهم الأدري بالمصلحه العامه والحاله الصحيه للشعب المصري
تعليقك علي فتح مسؤولي الزمالك ملف نادي القرن التاريخي؟
قولا واحدا النادي الاهلي بالارقام والنقاط والتاريخ.. النادي الاهلي هو نادى القرن الماضي والحالي ده غير أن الاهلي يعد بالبطولات أكثر انديه العالم حصولا علي البطولات حاليا وأعتقد أن الموضوع ده قتل بحثا بقالوا ٢٠ سنه سواء من مسؤولي الكاف أو الفيفا.

كيف رأيت قرار صالح سليم بالاعتذار عن المشاركه في بطولات افريقيا؟
بكل تاكيد لان الاهلي علي الاقل لو كان شارك مكنش الزمالك هيلعب في البطوله الافريقيه ابطال الدوري بصفته حامل اللقب المحلي وده طبعا فتح الباب لفوز الزمالك بأربع بطولات تقريبا في تلك الفتره بسبب هذا القرار غير الصائب خصوصا وأنه حرم الاهلي من الفوز بتلك البطولات واللي بدلناها بالبطولات العربيه
نخرج من أزمتي كورونا وملف نادي القرن..ونسالك عن تجربتك التدريبيه مع نادي الترسانه وأسباب رحيلك المفاجئ ؟
تجربه قصيره جدا وانا عن نفسي استفدت من تلك التجربه وفي إيجابيات وسلبيات وانا خرجت من النادي بكل احترام وعلاقتي طيبه بالجميع ورئيس النادي الحاج طارق السعيد وقدامي النادي
وهل تعرضت لمؤامره ؟
لا طبعا مفيش مؤامرات ولاحاجه خالص ولو كان في حد تآمر أو كان بيحارب شغلي فربنا يسمحه وهي تجربه وراحت لحالها بايجابياتها وسلبياتها ويكفي اني عملت فرقه في وقت قصير جدا بشهاده الجميع واعتذرت بشياكه وهدوء بعد اول مباراه مباشره بالدوري.

كابتن علاء..انت صاحب قرار الرحيل من منصبك كرئيس اللجنه الفنيه بالنادي الاهلي؟
نعم ..انا اللي اعتذرت للكابتن محمود والكابتن تفهم طلبي وكان لاخر لحظه متمسك بوجودي وده شرف كبير ليا خصوصا أن كابتن الخطيب بالنسبالي حاجه كبيره جدا ومثل اعلي
هل لو عاد بك الزمن هتاخد نفس القرار ام ستبقي في منصبك ؟
اي قرار بيتاخد بيبقي في توقيته ليه ظروفه ونصيب وان كان طبعا الخروج من النادي الاهلي بيخلي الواحد متضايق طبعا لانه زي الشخص اللي بيسيب بيته وبيسافر مثلا فالموضوع صعب بدون ادني شك
حدثنا عن كواليس رحيلك من النادي الاهلي ؟
كابتن محمود ده اسطوره وشخصيه قمه في الاحترام والاخلاق و انا شخصيا واي حد في جيلي كان حلمه يلعب بجوار الكابتن في الملعب فابيبو ده حدوته لن ولم يتكرر موهبته اللي تضاهي بيليه ومارادونا وبلاتيني وبشكش وشخصيه قمه في الادب والتدين وعلي فكره علي المستوي القيادي والإداري أحد أفضل من إدارة النادي عبر تاريخه فالكلام بخصوص اسباب رحيلي ومش رحيلي ليس له قيمه واحنا تربينا في النادي ان الاهلي فوق الجميع واللي بيحصل في الغرف المغلقه بيفضل سر ابدي ليوم الدين
وهل حدثت اي اتصالات مع كابتن خطيب ؟
كابتن محمود هاقولك تاني ده عشره عمر واخ غالي ونضيف ودايما في بالنا وعقولنا وقلوبنا وطول فتره مرضه طبعا بكلمه وببعتلواوعلي الواتس آب وبطمأن عليه وعلي أسرته الكريمه واسامه حسني زوج بنته شخصيه جميله ونجم كبير انا كمان دائم السؤول والاطمئنان عليه علي الكابتن
تعليقك علي كل ماكان يكتب عن توتر علاقتك بالخطيب؟
كلام غير صحيح بالمره ومن كان يروج لهذه الاخبار كان هدفه سئ وخبيث لأن الكل يعلم محبتي الكابتن ومحبه الكابتن لعلاء ميهوب أما موضوع القناه ده غلط. القصه ومافيها ان المرحوم خالد توحيد كان هيبدأ في تجديد البرامج وتوفي في نفس التوقيت ولهذا السبب رئاسه القناه اتغيرت وانا كنت في نفس الوقت اتعاقدت مع قناه أخري.

وهل حصل اي لوم من اي مسؤول في النادي ؟
احنا في النادي الاهلي اسره واحده وعندنا مبادئ وقيم ومفيش لوم ولاذعل مع حد وعلاقتي بالجميع في النادي والمجلس وأعضاء النادي فوق الممتازه فهما كلهم اخواتي طبعا
ماذا لو طلب منك كابتن الخطيب العوده مره اخري ؟
طبعا هوافق بدون تفكير لان كابتن في النادي الاهلي وعلي رأسهم كابتن خطيب علمونا أن النادي الاهلي لما يطلبك علي الفور تلبي الندا بدون نقاش ولاتفكير
رايك في اختيار الاهلي لكابتن محسن صالح ؟
انا اول حاجه عايز اشكر كابتن الخطيب بصراحه علي حسن اختياره للكابتن محسن صالح لرئاسه اللجنه بعد اعتذار كابتنا الشيخ طه وانا علي المستوي الشخصي كنت في غايه السعاده
بعوده كابتن محسن لبيته وهو كابتنا وكان لعيب كبير ومدرب ومحلل فني ذكي وعظيم صاحب فكر واخلاق ومحترم وعلي فكره كابتن محسن اداري كمان محنك وشاطر ومعاه طبعا كابتن زكريا وخالد بيبو اتنين نجوم وأصحاب فكر. فبصراحه شابو لكابتن الخطيب ومجلس الاداره في قرارهم ده.

وهل انت راضي علي إدارتهم لملف التجديد الثنائي فتحي ووليد سليمان ؟
بكل تاكيد اللجنه أدارت الملف باحترافيه و عملت اللي عليها طبعا
اما بخصوص رحيل فتحي فده عرض وطلب اللجنه بشهاده فتحي أشاد بها وبطريقتها في التفاوض فالناس عرضوا مبلغ ومده تعاقد واللاعب رفض وبهدوء فأين المشكله والتقصير من الكباتن ؟!
رأيك فى رحيل فتحى وهل وليد سليمان يستحق هذا المبلغ واكرامي كان محق فى قراره ؟
بالنسبه لفتحي فانا علي المستوي الشخصي بحبه جدا ففتحي لاعب راجل واهلاوي جدا بس رحيله عن الاهلي بالشكل ده خصوصا بعد العرض المادي المحترم اللي اتعرض عليه
ذعلني جدا لاني كنت اتمني إنهاء مشوار فتحي الكروي عندنا في النادي. اما بالنسبه لوليد فطبعا يستحق تقدير النادي ليه أما عاشور فقرار اعتزاله ده قرار خاص بيه بس انا بشكل شخصي أتمني أن يختم حياته في النادي أو الاحتراف أما اكرامي فخرج من الباب الكبير وبشكل احترافي وشيك
هل تري أن الثلاثه الكبار في حقبه التسعينات بنفس تعامل مسؤولي النادي الحاليين مع عاشور ؟
لاء طبعا كابتن خطيب وكابتن محسن تعاملوا باحترافيه وانسانيه وتقدير اكبر مع عاشور بعكس ماحدث معنا
رايك في هجوم مجدي عبدالغني ومصطفي يونس هم اداره النادي ؟
لاتعليق ..ولكن انا علي المستوي الشخصي بذعل جدا من اي هجوم علي النادي واي مسؤول فيه خصوصا لو كان الهجوم من ابن من ابناء النادي وكباتنا وأصدقاء غاليين ليا
وجهه نظرك في قرار رحيل ازارو والابقاء علي جيراردو ؟
وجهه نظر تحترم طبعا وفي النادي الاهلي اتعلمنا أن المدير الفني هو صاحب القرار الأول والأخير وانا شايف أن مستر فايلر أزمته مع ازارو في طريقه لعبه وهو حتي شرحها باستفاضه في حواره مع كابتن شوبير وسيف زاهر واعتقد أن جيراردو مع الإعلان عن نهايه الموسم هيتم إعارته اوبيعه
هل توافق فايلر علي قراره الخاص برحيل ازارو ؟
مستر فايلر أكثر واحد يعرف يقيم لاعيبته لأن هو اكيد عايز يكسب فهو الأدري وهو صاحب القرار
مع رحيل مين من الأجانب ؟
انا شايف الأقرب جيراردو
تقييمك لبادجي وديانج واجاي ومعلول ؟
معلول من وجهه نظري خارج التقييم فهو افضل لاعب اجنبي في مصر واحسن باك ليفت في افريقيا ومعشوق جمهور الاهلي اما ديانج فاده قصه وحكايه وروايه ومستقبله هيبقي كبير وتسلم العين اللي اختارته في النادي اما بادجي لسه ملحقش يطلع اللي عنده
رايك في فكره التعاقد مع كينو اوسيرينو اوماليكا ؟
كلهم لاعبيه مميزه و سوبر واعتقد واحد بس اللي هيبجي من أحد الأسماء دي او لاعب آخر النادي ممكن يبقي عينه عليه وان شاء الله النادي يجيب اللاعب اللي هيطلبه فايلر
لو تختار لاعب بديل في مركز رمضان صبحي تختار مين ؟
انا اتمني أن ينجح كابتن الخطيب ولجنتي التخطيط والتعاقدات في الإبقاء علي رمضان لموسم جديد فأبو الفنانيين بقي لعيب مخضرم ومفيد للنادي جدا اما مين اللاعب اللي اختاره في لعيبه في قطاع الناشئين مواليد ٩٩ و٢٠٠١ و٢٠٠٢ هايلين. زي صالح نصر وشادي رضوان وشكري و عمار وعبدالمنعم
مين خليفتك في الملاعب اللي بتشوف نفسك فيه حاليا في الأهلي ؟
في احسن مني يعني بس انا اللي كنت بحب اشوفه في الملعب حسام غالي لما كان بيلعب كنت بحبوا وفي عمرو السوليه حاليا لاعب استايل و ممتع
المراكز اللي بيحتاحها الاهلي في الصيف ؟
مساك ارشح حجازي وفي وسط الملعب في من المعارين من ولادنا اكرم وناصر وشريف وعمار والباك رايت في بكار كويس
رايك الفني لفايلر ؟
طبعا مدرب هايل ومختلف وطموح ومقنع جدا وشايفه مذيج من مستر فايتسا وجوزيه وهيدكوتي وربنا يوفقه لانه مشروع مدرب كبير في اوربا مستقبلا
مع قرار التجديد ؟
طبعا واعتقد كابتن الخطيب وكابتن محسن وأمير بصدد الاعلان عن التجديد له في الايام القادمه
تعليقك علي تصرفات صالح جمعه ونصيحتك ليه ؟
صالح ندعيلوا ان ربنا يهديه الاول
ترشح مين للفوز بدوري الأبطال ؟
طبعا الاهلي ثم الاهلي ثم الاهلي بس الكوره ترجع بس
ترشح مين في انتخابات الاهلي القادمه ؟
معرفش امتي ومين اللي داخل بس لوكابتن خطيب خاض الانتخابات يبقي هو الاجدر خصوصا وأن المجلس الحالي عامل شغل عالي جدا سواء في الانشاءات في كافه فروع النامي أو الجانب التسويقي والرياضي والاسري كمان عجبني جدا دور العميد محمد مرجان مدير النادي بصراحه وبعتبره الجندي المجهول في النادي شخصيه تفتخر بيها وبكونه ينتمي للنادي الاهلي
رايك في هجوم بعض ابناء النادي القدامي علي اداره الاهلي وبالتحديد كابتن خطيب ؟
لااقبل ذلك طبعا مثلما اجبت في سوؤال سابق أن ارفض الهجوم علي اي شخص ينتمي للنادي فما بالك بالاسطوره بتاعتنا
تعاملت مع حسام البدري لاعبا ومدربا هل تراه يستحق القياده الفنيه للمنتخب الوطني؟
لا طبعا لم اكن اتمني أن يتولي مدرب القياده الفنيه مع الاحترام للجميع غير كابتن حسام فهو الأحق بهذا المنصب في مصر بعد المشوار الطويل مع النادي الاهلي والبطولات التي حققها وتجربته الاداريه الناجحه في بيراميدز
وهل تري ايقاف النشاط في صالحه ؟
بالتأكيد التوقف ده مش في صالح أي حد في العالم
بالنسبه لنادي الزمالك تقييمك لفريق الكره وكارتيرون ؟
الفريق السنادي مختلف وكارتيرون نتايجه هايله والزمالك بيأدي بشكل مميز ونتايجه هي اللي بتتكلم وانا عن نفسي اتمني أن نهائ دوري الأبطال يبقي بين الاهلي والزمالك
وهل الزمالك كان يستحق السوبر المصري والافريقي ؟
الافريقي اه اما المحلي الأحق به كان الاهلي بصراحه وان شاء الله تتعوض في افريقيا
مين بيعجبك في الزمالك ؟
ساسي طبعا لعيب ذكي ممتع وعندو الحلول وفارق جدا مع الزمالك من اول ماتعاقدوا معاه وبن شرقي لعيب طبعا كويس جدت
احسن اجنبي ؟
فايلر
احسن لاعب؟
عبدالله السعيد وفي الاهلي معلول والزمالك ساسي
هل تلقيت اي عرض من الزمالك طوال مشوارك الكروي في الاهلي ؟
مرتين وكان عن طريق لاعب كبير في نادي الزمالك ومسؤول ووسيط
وماذا كان ردك ؟
قولتلهم شوفوا حد غيري ماينفعش هو في حد يقدر يغير أبوه أو والدته وقفلت الموضوع خالص سواء بجد أو بهزار !!
لدرجه ان في شخص محترم بدون ذكر اسمه صديق النجم الزملكاوي ده كان بيرن عليا في البيت فكنت كل ماسمع صوته اقفل التليفون
رايك في بركات وتريكه بصفتك كنت مدربهم ؟
تريكه ظاهره لن تتكرر في تاريخ الكره المصريه والعربيه والافريقيه اما بالنسبه لبركات فتريكه نفسه كان يقول بركات هو الرئه بتاع الفرقه حتي جوزيه كان رغم عشقه لتريكه وجمعه ومتعب وفلافيو الا انه كان عندو بركات ده حاجه تانيه خالص
بمناسبه وائل جمعه هل جوزيه فعلا مكنش بيحبه وغير مقتنع بيه ؟
وائل جمعه هو في حد في مصر ولاافريقيا عمل انجازات جمعه وبعدين جوزيه اصلا هو اللي جاب جمعه وطوال وجود جوزيه ف النادي وائل مقعدش ربع ساعه حتي علي الدكه في عهده هل لو جمال عبد الحميد وحسام وابراهيم حسن و ايمن منصور استمرواو في الاهلي كان أثر سلبا في بطولات الزمالك ؟
نادي الزمالك ناد كبير بس بالارقام هذا الرباعي اثرو جدا في تاريخ الزمالك وبالتالي وجودهم في الاهلي كان هيبقي مكسب للأهلي وخساره للزمالك بالطبع بس الكوره بقي نصيب
رأيك في مصطفي شوبير ؟
بالنسبه لمصطفي شوبير فهو موهبه كبيره وانا بتوقعلوا أنه هيبقي حارس مرمي منتخب مصر والنادي في وقت قصير جدا بل أنا بتوقع انو سيتخطي نجوميه وبطولات والده اما عن احتياج الاهلي لدعم في مركز حراسه المرمي فده قرار الاداره ومستر فايلر فقط
ماذا يمثل لك ايمن شوقي؟
ايمن شوقي ده اخويا وصديق العمر ونجم كبير ومهاجم فذ واتظلم بصراحه ومخدش حقه تماما
مين تأثرت بيه قبل وانت صغير في مركزك محليا وعالميا؟
الخطيب وصفوت عبدالحليم وفاروق جعفر وعالميا بلاتيني والرباعي دول كانوا ادارجيه كوره
علاقتك بالتوأم ؟
اخواتي واطيب خلق الله واتمني التوفيق ليهم واستغربت من الهجوم عليهم من الجانب الابيض بسبب تصريحاتهم الاخيره أنهم بيشجعوا النادي الاهلي ..اومال المفروض يشجعوا مين دول معجونين اهلي بس العصبيه بس السلبيه الوحيده عندهم
من افضل من رئيس للنادي الاهلي عبر تاريخه؟
ناس كتير طبعا الفريق مرتجي وكابتن صالح وكابتن عبده صالح الوحش اما من وجهه نظري كابتن حسن حمدي كان رئيس نادي بنكهه اوربيه بصراحه رغم ان الكابتن حسن وك صالح وك والوحش التلاته ظلموني في الكوره
كثيرون يقارنو بين المايسترو والخطيب ودايما الكفه ترجح كابتن صالح سليم ؟
طبعا كابتن صالح اسطوره وتاريخ كبير في النادي بس بردو كابتن خطيب اسطوره وكاريزما وشاطر ولايقل في النجوميه ومحبه الجمهور عن المايسترو أو حتي المرحوم مختارالتتش
هل تري ان الجوهري يعد من اساطير النادي ام تدريبه للزمالك إثر علي شعبيته ؟
طبعا رمز من رموز النادي الاهلي وقيمه كبيره وتاريخ عظيم وتدريبه للزمالك طبعا اثر بشكل كبير في علاقته بالجميع في النادي ولكن الاحتراف ساعات بيبقي شر مش خير
وهل اثر فيك كابتن الجوهري ؟
مع الاحترام لكابتن الجوهري وانا لعبت معاه في النادي والمنتخب وروحت كاس العالم ٩٠ معاه بس من وجهه نظري اللي اثر في حياتي الكرويه وشايفه مدرب عظيم مخدش حقه زي كابتن جوهري وكابتن انور سلامه والشيخ طه هو المرحوم الكابتن السايس شخصيه عظيمه بكل المقاييس
ومن افضل مدرب مصري في التاريخ ؟
كل الاسماء اللي ذكرتها عظيمه بس في كابتن شحته وكابتن طه بصري وحاليا كابتن مختار مدربين كبار طبعا
ولكن الانجازات والاعجازات والمدرب التاريخي واللاعب المميز فبدون تفكير المعلم حسن شحاته
تعليقك علي ازمه اسامه نبيه الاخيره؟
مع نادي غزل المحله وربط واقعه التفويت باحرازك هدف في النادي الاهلي وانت في نادي الأوليمبي ؟
اسامه شخصيه جميله ومدرب محترم وكان لعب مميز طبعا وهو بس خانه التعبير والناس ماصدقت ومسكت في الكلمه ودخلتوا في فيلم كبير وألفاظ صعبه زي التفويت وماشبه ذلك واعتقد أن اسامه اعتذر لجمهور الزمالك والمحله واتمني الناس متمسكش للناس علي الواحده
اخيرا تحب تقول ايه لجمهور الاهلي ؟
اقولهم انتوا أعظم جمهور في العالم وفانله نادينا تمنها غالي قوي وانا عن نفسي لحم اكتافي من خير النادي وخيركوا واي لاعب يمشي من النادي هو الخسران وبتمني ليكوا دوام الصحه والانجازات

[محب الخير]

جزاك الله كل خير أخى الفاضل لجهودك الرائعة
وكل عام وحضرتك وجميع أسرتكم الكريمة بكل خير يارب

ودائماً إلى الأمام