|
|
#1
2010/08/12, 02:26 PM
|
||||
|
||||
ســل صيامك مع محســن أفنــدى :
أود أن انوه الى حضراتكم بأن هذه القصه مستوحاه من وحى خيالى ، ومن بنات أفكارى ، كتبتها دون أية اعداد مسبق ، واستلهمت احداثها مما قد يدور داخل البيت المصرى ، وفى الشارع المصرى البسيط من احداث يوميه معتاده، ارجوا ان تنال رضاكم وتحوز على اعجابكم ، وسأبدأ بسرد أحداث الفصل الاول ، فاذا ما استشعرت رضاكم عنها ، واصلت عرض فصولها الاخرى ، وانى لمنتظر تعليقات كم حكاية محسن أفندى الفصــل الاول  الاستاذ محسن جارى العزيز يعمل بوظيفة حكومية بسيطه ذات دخل محدود، لا يكاد يكفى احتياجات اسرتة الاساسية ، ولكى يزيد من موارد الاسره ، فأنه يعمل مساءا باحدى المحلات التجاريه - السوبر ماركت - القريبه من منزله . وذات يوما من ايام الصيف الخانقه ، رجع من عمله ووجهه يتصبب عرقا وقد بدت عليه أثار الشمس الحارقة 0 بادرته زوجته المصون السيدة عواطف قائله : يا محسن ما تنساش تجيب التموين الليلادى لأن الزيت خلص ومش عارفه بكره هقلى البطاطس بايه ؟!! السيد محسن : حاضر أن شاء الله . السيده عواطف : انت رايح المحل النهارده ؟ محسن : ايوه بإذن الله . عواطف : طيب حاول ترجع بدرى ، علشان سناء بنت خالتى ولدت وعايزة اروح ابارك لها ، انا ما نقتهاش ساعة فرحها . محسن : طب وانا ارجع بدرى ليه ، انا ايه علاقتى بسناء اللى ولدت . عواطف : يعنى هاروح وحدى ، ولما جوزها يسأل عليك ابقى أقول له ايه ؟! محسن : ما تقوليش حاجه ، ولا ابقى قوليله جوزى بيكد ويشقى علشان يوفر لقمة العيش للعيال . عواطف ( بتهكم وسخريه ) : لقمة العيش ولا لقمة القاضى ، اللى يسمع الكلام ده يقول انك مهنينا و مبغددنا ، دول كلهم مائه و خمسين ملطوش عمى اللى بتاخدهم من المحل..!! محسن : طيب لمى يومك وخللى ليلتك تعدى على خير . عواطف : حوش يا حواش وان ما لمتش يومى هتعمل ايه ؟! محسن : انت هتوجعى دماغى ليه ، انا سايبلك البيت مخدر . يفتح محسن الباب وقبل ان يرزعه بشده فتنكسر الشراعه ، طفل صغير يصرخ : بابا بابا رايح فين يا بابا؟ محسن : رايح فى ستين داهيه !! الطفل : طيب ما تنساش تحمللى لعبة الفيفا من السيبرعلى الفلاشه !! محسن : جاتكو ستين نيله...!!  وما أن ينتهى محسن من نزول السلم ، حتى تجرى عواطف على التليفون ، وتتصل بوالدتها وهى تولول : الحقينى يا ماما ، المنيل نزل من غير ما يسيب لى فلوس علشان أبارك لسناء. الام : أخص عليه ، هو مش فاكر لما ولدتى مصطفى ، مش سناء جاتلك ورمت فى حجرك عشرين جنيه ، ساعة ما جبتيلنا بيها انا و ابوكى عيش فينو ولانشون وجبنه رومى وقعدنا نتعشى معاكم ، هوأيه نسى خلاص.. اما صحيح قليل أصل ..!! عواطف : يا ماما مش وقته الكلام ده ، انا مش عارفه اعمل ايه فى المصيبة دى ؟ دلوقتى هجيب فلوس منين علشان أنقط سناء ؟ الام : مش عارفه ، حاجه تحير أكيد أمه وزاه ، ما هو جوز سناء يبقى ابن عمتها وأكيد عرفت منه ان سناء ولدت . اقولك ... استنى لما اسأل ابوكى ؟! الام موجهه كلامها للأب الجالس يقرأ فى احدى الجرائد القديمه : معاك فلوس علشان عواطف تبارك لسناء ؟ الاب : سناء مين ؟ الام : سناء بنت خالتها الأب : ما لها سناء ؟ الام : انت ما عرفتش مش سناء ولدت ؟ الأب : يا دى المصيبه ، هى سناء دى مش لسه والده ؟ واحنا مباركين لها من حوالى اربعة شهور، لما أخدتنى منى عشرين جنيه ورحتيلها ، هى ايه ارنبه ؟!! الام ضاحكه : اوه جتك ايه دى مش سناء دى اختها سعاد ، انت يا راجل بقيت بتنسى ولا ايه؟! . اثناء الحوار الدائر بين الاب والام ، لا زالت عواطف على سماعة التليفون تردد آلو... آلو ، ولكن لا حياة لمن تنادى. وفجأة يدق جرس الباب عواطف : افتح يا مصطفى الباب يقوم مصطفى من امام شاشة الكمبيوترقائلا : يوه بأه هو مفيش حد فى البيت ده غيرى؟!! حاجه تقرف .! يفتح مصطفى الباب فيجد جارتهم الست عنايات ، يدور بينهما الحوار التالى: الست عنايات : امك فين يا مصطفى؟ مصطفى : بتكلم تيته فى التليفون . صوت الام ياتى من بعيد : مين ياواد يا مصطفى؟ مصطفى : دى تانت عنايات يا ماما . الام : انا جايه حالا اتفضلى يا عنايات ، تترك الام سماعة التليفون والخط معلق ، وتذهب لبدايه حديث جديد مع الجاره الست عنايات ، وطبعا لن يخلو الحديث عن عمايل ابو مصطفى السوده ، وبعدين تتفرج على الكام كومبليزون اللى جابتهم عنايات من الموسكى فى اسبوع الفضل النهارده ...الخ ..!! يتبقى السؤال هنا :  1- كم سيدفع السيد محسن قيمة فاتورة التليفون عن المدة الحاليه ؟!! 2- هذا السيناريو وما شابهه ، كم يتكرر فى بيوتنا فى عصرنا الحالى ؟؟؟ 3- هل سينجح محسن فى تحميل لعبة الفيفا لمصطفى فى هذا اليوم العاصف ، واذا لم يستطع بدعوى أن الفلاشه مفيرسه ، ما ذا تتوقع أن يكون رد فعل مصطفى تجاه ابيه ؟!! 4- اذا كانت الست عنايات اشترت التلات كومبلوزونات بخمسة و ثلاثون جنيها ، فى اسبوع الفضل ، بنسبه خصم 40 % ، فكم يكون ثمن الكومبيليزون الواحد قبل الخصم ؟ دمتم بألف خير و سعاده ...!! حكاية محسن أفندى الفصـل الثــانى وصلنا لغايه لما الست عواطف بدأت الحوار مع جارتها العزيزة عنايات ، لكن ماعرفناش الاستاذ محسن عمل ايه بعد ما رزع الباب ونزل جرى على السلم ، اقولك يا سيدى اللى حصل : بمجرد ما خلص محسن السلم وخرج من باب البيت وهو يسب ويلعن اليوم ..!! هب اتشنكل فى غطاء البلاعه اللى موجوده امام باب البيت ، وكاد أن يقع على الارض . الست ام رمضان اللى فارشه جنب الباب بتبيع الجرجير والخضره ضاحكه : اسم الله عليك يابنى ، ما قلنا لكوا تلموا من بعض وتغيروا الغطا ده ، انتم مش خايفين على عيالكوا ..!! محسن ينظر اليها ، ولا يتكلم ويستمر فى طريقه مهرولا ، بعد ما يخلص محسن الشارع ويطلع على الميدان محسن يحدث نفسه : والله ما انا عارف أروح فين دلوقتى ، لسه بدرى على ميعاد المحل ؟ الله يجازيكى يا شيخه ..! رجل محسن تاخده على قهوة مكتوب عليها ( بورصة كتكوت ) لصاحبها الحاج منصور الخشن وبمجرد ما يقعد على الكرسى ييجى الصبى ( القهوجى ) ويبدأ الحوار القهوجى : تشرب أيه يا استاذ محسن : شويه . القهوجى : شوية ايه ؟ الماتش هيبتدى ومشه نبقى فاضيين ..!محسن : هو فى ماتش النهارده ؟ القهوجى : أيوه محسن : ماتش مين ؟ القهوجى : ماتش الاهلى والفريق الافريقى محسن بينه وبين نفسه .. كويس اهى حاجه تسلينا لغايه ميعاد المحل ..!! محسن : طب روح حط لى كرسى فى الصف الاول قدام التلفزيون . القهوجى : طب ها تشرب ايه ؟ محسن : هات لى شاى القهوجى : ماشى واثناء ذهاب القهوجى لاحضار الشاى ، محسن ينده عليه محسن بقولك ايه : عندك بقسماط صوابع . القهوجى : نعمين . محسن : طازه ؟ القهوجى : أى نعم . محسن : طب ابقى هات لى كيس مع الشاى القهوجى : اوك . القهوجى منصرفا : وعندك واحد عروسه علىميه بيضه ومعاه كيس قراقيش ..!! القهوجى بعدما يجيب الشاى : سيادتك هتقعد فين؟ محسن : ما قلت لك هقعد قدام التلفزيون . القهوجى : قدام التلفزيون يمين ولا شمال ؟ محسن : يعنى ايه يمين ولا شمال ، قدام التلفزيون وخلاص ، هتفرق ايه ؟! القهوجى : انت بتشجع ايه ؟ محسن : انا اهلاوى القهوجى : يبقى تقعد يمين . محسن : ليه ومين اللى هيقعد شمال ؟ القهوجى : اللى بيشجع الفريق الافريقى . محسن : هو فيه سياح جايين يشجعوا الفريق الافريقى هنا ؟ القهوجى : ايوه الزملكاويه .!! .محسن : أه..!! تمتلئ القهوة عن آخرها وتتعالى الصيحات ما بين مشجع للنادى الاهلى ومشجع للفريق الضيف ، ولا يخلو الامر من تهديدات من المعلم منصور الخشن بغلق التلفزيون اذا لم تلتزم الجماهير بالروح الرياضية ومبادئ القهوه العريقة وتعاليمها السامية . .!! وما أن ينتهى الشوط الاول حتى يتعالى صوت القهوجى : المشاريب يا افنديه.!! احد الجالسين : مشاريب أيه ؟ ما شربنا خلاص ، هى شغلانه ولا ايه ؟! مش كفايه الماتش الزباله ده ؟ القهوجى : يا افنديه كل شوط بمشروب ، نظام القهوة كده ، وتعليمات الكومندا كده.! المشجع : يا سلام ، ولوكان الماتش فيه اكسراتايم او ضربات جزاء ، يبقى كل واحد هيبلبعله صندوق حاجه ساقعه ، هيه ايه العباره ؟ استغلال ولا أيه ؟ .. ألخ..!!. وما بين تمتمات وهمسات الجالسين واعتراضهم ايضا ، يقرر محسن الانسحاب ، قبل ما يدفع ثمن مشروب تانى والعمليه مش متحمله ، خصوصا وان الماتش يقرف ..!! القهوجى : رايح فين يا استاذ . محسن : ماشى عندك مانع ؟ القهوجى : دفعت الحساب ؟ محسن : طبعا ، يعنى هامشى من غير ما ادفع؟!! واثناء خروج محسن من القهوه المعلم منصور : يا واد يا شنكل شنكل : نعم يا قياده المعلم : الافندى اللى ماشى ده دفع الحساب ؟ شنكل : حصل يا كومندا المعلم مرتابا : هو كان طالب ايه ؟ شنكل : عروسه وصوابع يا قياده المعلم : و الشوط التانى ؟! شنكل : الشوط التانى لسه ما ابتداش يا قياده.! يخرج محسن من القهوة ولا يجد بدا من الذهاب الى المحل بدرى شويتين مش اشكال يمكن الراجل يصرفله اوفر تايم ولا حاجه ، يمضى محسن ليلته فى المحل بين بعض المصطلحات التى ملت ودانه من سماعها ( ربع قديم - تمن لانشون - لتر ساقع - صابونه بريحه ... الخ . حتى يأتى موعد الانصراف . وفى طريقه للعوده الى المنزل , يجد محسن السيبر فاتح . محسن محدثا نفسه : كويس السيبر فاتح لغاية دلوقتى ، لما ادخل أحمل اللعبه لمصطفى ، يدخل محسن السيبر ويبدء الحوار التالى : محسن : السلام عليكم الشاب الجالس : وعليكم السلام ، اتفضل يا عم محسن محسن : ازيك يا حماده وازى ابوك ؟ حماده : بخير والله محسن : عندك فيفا الفين وسبعه ؟ حماده : مش عارف , استنى لما اسأل : ينده حماده على علاء الجالس بغرفة الصيانه المركزيه بالسيبر و - المكتوب على بابها ممنوع الدخول - ..!! يا علاء عندك فيفا الفين وسبعه ؟ ، يمر زمنا كالدهر على الاستاذ محسن خوفا من الاجابه بالنفى ! ، واخيرا يرد علاء من الداخل : أيوه حماده : طيب خد الفلاشه من عم محسن وحملها له ، يخرج علاء وياخذ الفلاشه ويدخل الى الغرفة ، وقبل ما يبدء عملية التحميل ، حماده يصرخ بصوت عال : استنى يا علاء ، وينظر الى محسن قائلا : أوعى تكون الفلاشه مفيرسه يا عم محسن ؟!!. محسن متنفسا الصعداء : عيب يا حماده انا مش تلميذ ده انا مسطب اقوى انتى فايرس وعامله آبديت من عالنت . حماده : طيب اتفضل اقعد لغاية ما علاء يخلص ، تشرب ايه يا عم محسن ؟ محسن : شكرا يا حماده لسه شارب . حماده : وازاى مصطفى ؟محسن : بخير والحمد لله . حماده : يعنى مش باين ؟ محسن : المذاكره بقى ، الامتحانات على الابواب . حماده : ربنا يساعده ، هو فى سنه كام دلوقتى ؟ محسن : يفكر قليلا قبل أن يتمكن من الاجابه ، فى سنه ثالثه ، وثالثه دلوقتى بقت شهاده - لاحظ أن محسن يردد ما يسمعه من خلال حوارات عواطف التليفونيه فقط - ، ولا يعلم يقينا اذا كانت سنه ثالثه اصبحت فعلا شهاده أم لا ..!! حماده : ربنا معاه يخرج علاء من غرفة الصيانه ، ويعطى الفلاشه لعمه محسن قائلا كله تمام يا عم محسن ،يشكر محسن علاء ويسأل : حماده كام الحساب يا حماده ؟ حماده : حساب ايه يا عم ابو مصطفى ، عيب الكلام ده ، الحساب يوم الحساب ، ابقى سلم لى على مصطفى . يخرج محسن من السيبر مسرعا وهو يردد الف شكر , متمنيا أن يرجع البيت قبل أن ينام مصطفى .  بمجرد أن يصل محسن اللى باب الشقه يتذكر خناقة الظهيرة مع عواطف ، يفتح محسن الباب فيجد عواطف جالسه امام التلفزيون ، يدور الحوار التالى : محسن : السلام عليكم عواطف : وعليكم السلام محسن : ازيك يا عواطف ؟ عواطف ( متدلله) الحمد لله محسن : امال فين الواد درش ؟ عواطف : اتعشى ودخل ينام محسن : خساره انا حملتله اللعبه اللى عايزها ، كان نفسى يشوفها قبل ما ينام ..! تنظر عواطف الى محسن ولا تعلق ، فى الوقت الذى يدخل محسن غرفة نوم مصطفى لعله ما زال مستيقظا ، فيجده مستغرقا فى النوم ، يطبع محسن قبله على وجنه مصطفى الرقيقه ويترك الفلاشة بجوار السرير لعلها تكون أول ما يراها عندما يستيقظ صباحا . يدخل محسن غرفته ويبدء فى خلع ملابسه وارتداء ملابسه المنزليه ، يخرج من الغرفه سائلا عواطف : فين بنطلون البيجامه ؟ عواطف : اتغسل طلع واحد غيره ..! يرجع محسن الى غرفة النوم عواطف : مش ها تتعشى ؟ محسن : فى أيه ؟ عواطف : اعملك جبنه بالطماطم ؟ والا اسلقلك بيض ؟ محسن : لأ ، اعملي لى ساندوتشات جبنه بالطماطم يسحب محسن الكوفرته و المخده الصغيره ويفرشها فى البلكونه ، فى الوقت الذى تأتى فيه عواطف بالسندوتشات ، وتجلس جواره فى البلكونه . عواطف : مش هتبطل عادة النوم فى البلكونه دى ، الجو بيبرد بالليل والشمس تطلع عليك الصبح ... الخ ..!! يتناول محسن العشاء صامتا وهو يفكر فى مدى السعادة التى ستنتاب مصطفى عندما يجد الفلاشه فى الصباح ، وبعد ان يستغرق محسن فى النوم يأتيه صوت عواطف عاليا من داخل الحجرة : يا محسن : انت ما جبتش التموين ليه ؟ محسن بينه وبين نفسه : والله ما نا رادد ..!! عواطف : طيب ابقوا شوفوا بقى هنقلى البطاطس بإيه ؟ يستغرق محسن فى نوم وثبات عميق حتى تسطع الشمس على وجهه الكريم ..!! دمتم بألف خير...!!
----------------------------
مشاهدة جميع مواضيع aiman noor eldein التعديل الأخير تم بواسطة aiman noor eldein ; 2010/08/12 الساعة 02:35 PM 
|
|
#2
2010/08/20, 04:39 PM
|
|||||
|
|||||
|
----------------------------
مشاهدة جميع مواضيع نۨــٰا̍صــر ؏ــڶــۍۧ
|
 |
|
المواضيع المتشابهه
|
||||
| الموضوع | كاتب الموضوع | المنتدى | مشاركات | آخر مشاركة |
| أخــــيرا.. شيكابالا يعـــتذر لحســن شحـــاتة وللجماهـــــــير ... | السيدعبدالعزيز | نادى الزمالك | 4 | 2012/07/13 01:02 AM |
