[aiman noor eldein]

- المشـــهد الأول :
بعد إنتهاء من يوم عمل شاق ، وبدء أجازة عيد الفطر المبارك ، يخرج الاستاذ من مكتبه ، وقد بدا على وجهه السعادة البالغة ، وبدأ يصافح الجميع متمنيا لهم قضاء أجازة سعيدة .
- وأثناء نزول الاستاذ من الجريدة ، يدق جرس الموبايل ، ويدور الحوار التالى :
الاستاذ : أيوه يا ام محمد ، خير ؟!
أم محمد : ما تنساش يا محمود تجيب معاك 2 كيلو فسيخ ، من الفسخانى اللى جانب الجرنال .!
الاستاذ : يا ستى هو ده وقته الجو حر والشمس سخنه نار ، ابعتى اسماعيل البواب يجيب اللى انتى عايزاه .
أم محمد : اسماعيل خد العيال و سافر يعيد فى البلد , وبكره العيد كل سنه وانت طيب، العيال جايين يعيدوا معانا ، وياكلوا معانا الفسيخ .!
الاستاذ : حاضر يا ستى ، هفوت عليه دلوقتى ، اياك يكون فاتح ؟!
يغلق الاستاذ الموبايل ، ويحدث نفسه : الجو نار الله يخرب بيت امك يا إسماعيل ، يعنى حبكت تسافر البلد النهارده داهيه لا ترجعك .!

عم اسماعيل البواب

المشــــهد الثانى :
- بمجرد أن يضع الاستاذ المفتاح فى باب الشقه ويدخل ، يأتيه صوتا كالصاعقة من داخل المطبخ :
- محمووووووود جبت الفسيخ يا محمووووووود .!
الاستاذ : أيوه يا ستى ، قلت لك ميت مره ، استنى عليه لما أريح من السكه ، و بعدين إبقى اتكلمى براحتك .
- تخرج الفاضلة ام محمد وتنظر الى يدى الاستاذ ، إمال هو فين ؟
الاستاذ : هو ايه ؟
ام محمد : الفسيخ يا محموووووود .
يفكر الاستاذ لثوانى : ياااااااه نسيته فى شنطة العربيه ، ابعتى اسماعيل يجيبه .
ام محمد : اسماعيل مين ؟
الاستاذ : اسماعيل البواب .!
ام محمد مندهشة : انت يا راجل ما بتفهمش ، مش قلت لك اسماعيل خد العيال وسافر يعيد فى البلد .
الاستاذ : خلاص ، خلاص ، هنزل أجيبه وأمرى لله .
أم محمد : وبعدين إيه اللى خلاك تشيله فى شنطة العربيه ، ما حطتوش قدامك ليه علشان ما تنساهوش ؟
الاستاذ :الزفت جمال هليل كان معايا ، ولو كان شم ريحته ما كنش هيبطل تريقه .!!
أم محمد : طيب إتصرف ، علشان الجو حر ، و أنا مش ناقصه خنقه ، الله يخرب بيت أمك يا إسماعيل .!!
- يفتح الاستاذ الباب و أثناء نزوله من على السلم لإحضار الفسيخ ، يتمتم محدثا نفسه ببعض الكلمات :
انت ما بتفهمش ، صحيح الملافظ سعد أما وليه خرفانه بصحيح الله يخرب بيت امك يا اسماعيل .!
المشــــهد الثالث :
- بعد أن يصعد الاستاذ ، ويعطى الفسيخ للحاجه أم محمد ، يقرر أن يأخذ حمام بارد ويتوضأ لأداء صلاة العصر ، وأثناء إستمتاعه بالحمام ، يدق جرس التليفون ، الحاجه أم محمد من خارج باب الحمام : إرفع السماعه اللى عندك يا محمووووود .
الاستاذ : مين ؟
ام محمد : مش عارفه واحد من الجرنال عايزك .
يرفع الاستاذ السماعة : أيوه مين ؟
المتحدث : أنا فتحى يا استاذ ، بكلمك من المطار ، ليك عندى مفاجأه كده ؟
الاستاذ : خير ؟
فتحى : عارف مين لسه نازل من الطياره دلوقتى ؟
الاستاذ : مين ؟
فتحى : مستر مانويل جوزيه .
ارتسمت على وجهه الاستاذ علامات الرعب ، ووقعت الصابونه من يده من هول المفاجأة ، وأثناء نزوله لتناولها من البانيو .
فتحى : يا استاذ يا استاذ ، رحت فين يا استاذ ؟!
الاستاذ : أيوه يا زفت ، بتقول مين ؟
فتحى : بقول مستر مانويل جوزيه لسه واصل المطار حالا .
الاستاذ : وده جى يهبب إيه ، متأكد انه هو ؟
فتحى : هو يا استاذ بشحمه ولحمه ، يعنى أنا هتوه عنه ، وكمان فى جماعه من النادى الاهلى مستنياه ، الجدع الطويل أبو دقن ده اللى بيدرب الإجوان ، و الدرندلى وشويه كده مش عارف اساميهم .
الاستاذ : طيب يا فقرى ، إقفل دلوقتى وحاول تعرف لى من بعيد لبعيد الجدع ده جى ينيل إيه ؟ .
- يخرج الاستاذ من الحمام مهرولا .
- الست حرمه : ايه ده يا بو محمد ده ، طالع من الحمام و الصابون على جسمك ، ايه الحكايه ؟ التليفون ده قلب كيانك ليه ؟!
- الاستاذ : مش وقته مش وقته، سيبينى فى حالى والنبى ، الله يرضى عليكى .
يدخل الاستاذ الى غرفة مكتبه بالمنزل ، وما أن تيقن بإتصالاته من صحة الخبر وقدوم مسترمانويل جوزيه فعلا ، فى زيارة مفاجأة لقضاء أجازة العيد بين أحباءه وأصدقاءه فى القاهرة ، حتى إرتعدت فرائصه و إرتعشت مفاصله وأصبح يقطع الحجرة ذهابا و إياب وهويضرب أخماسا فى أسداس .
- الاستاذ محدثا نفسه بصوت مسموع :
اجازة العيد !! جى يقضى أجازة العيد ؟ ؟ لا لا أكيد الموضوع فيه سر ؟ يادى الواقعه ليكون الجدع اللى اسمه حسن حمدى بعت له علشان يمسك الفريق من تااااانى ، يا دى المصيبه السوده ، ما كنا نسيناه ونسينا أيامه السوده ، يا دى الكارثه اللى حطط على دماغ إبنك يا أمه واشمعنى افتكر يقضى العيد الصغير فى مصر ؟ ما جاش ليه فى عيد الضحيه ؟ ده احنا ما صدقنا ان حسام البدرى إبتدى يلوش ، وقلنا نخطف لنا بطوله من ولاد الهرمه .!!
-لأ لأ وحياة أمه ما انا عاتقه وهكون لابه حتة مقال يطلع من نافوخه ، يقلب عليه الخلق و يولع الدنيا و يوقع فى بعض ، الله يخرب بيت امك يا فتحى انت و الجزمه اسماعيل .!!
- ويبدأ الاستاذ فى كتابة المقال اللى نشر فى الجريدة أمس والذى تفضل الأخ السيد عبد العزيز بعرضه عليكم .
- وأثناء إنشغال الاستاذ بكتابة المقال ، يأتيه صوت أم محمد من خارج غرفة المكتب :
- المغرب أذن يا محمود ، مش هتقوم تفطر ؟
الاستاذ : مش هتنيل ، لما أخلص اللى فى إيدى .!
الحاجه أم محمد : والله اللى ياكل على ضرسه ينفع نفسه ، انت حر .!
يخرج الاستاذمن غرفة المكتب بسرعة قبل ما الحاجه أم محمد تفوت فى الصدر و تسيب له الورك الاستاذ وهو يجلس على السفرة : اللهم إنى لك صمت و على رزقك أفطرت ، اللهم لا تسلط علينا من لا يخافك ولا يرحمنا ( يقصد مستر مانويل جوزيه ) الله يخرب بيت امك ياللى قى بالى ( يقصد اسماعيل ) .!

- وبعــــــــــــــد :

هذه مقتطفات من مقالة الاستاذ ، نعرضها عليكم ، مع بعض التوضيح ، لتعلموا ما وصلنا اليه من اعلام متردى منحاز ، ونترحم جميعا على رموزنا التى ستظل شامخة فى عالم النقد الرياضى المحترم .!

المشاركة الأصلية كتبت بواسطة السيدعبدالعزيز

1- جاء إلي مصر لإفساد فرحة أهلها بالعيد.
- كيف تفرح مصر بالعيد وهناك الألاف من الامريكان المتعصبين الذين يهددون بحرق المصحف الشريف بين عشية و ضحاها فى ذكرى أحداث الحادى عشر من سبتمبر ، ؟!
2- حضوره في هذا التوقيت أفسد فرحة العيد علي البعض من أبناء الأهلى .
- ( يقصد الكابتن حسام البدرى ) نقول : كل أبناء النادى الاهلى تحترم و تقدر الكابتن مانويل جوزيه ، وتسعد بوجوده داخل القلعة الحمراء .
3-واعتبر معروف مدرب الأهلي السابق شخصاً غير مرغوب فيه ، مضيفاً "هذا المدعو مانويل جوزيه سب الشعب المصري كله وقال فيه إنه شعب أعمي ، المبصر منهم أحمق .
- هذا تحريف لتصريح الكابتن مانويل جوزيه .
4- وهو الذي رفع حذاءه مراراً في وجه الإعلاميين والصحفيين".
- صورة مفبركة بالفوتو شوب تناولتها وسائل الاعلام و المواقع الالكترونية الحاقدة ، ولو تأملت هذه الصورة لتيقنت للوهلة الاولى إنها مفبركة بإحترافية رديئة جدا ، من حيث الوضع الفسيولوجى ( التشريحى ) للقدم ، أو مقاس الحذاء الذى ربما تخطى مقاس 98 !!
5- وحتي زوجته كانت تكره مصر وترفض أن تعيش فيها إلا فترات منقطعة .

- الكل يعلم مدى عشق مستر مانويل و عائلته الكريمة لمصر وأهلها .
6- ويعيش هو مع الزجاجة وحده في غرفته يشرب لينسي .!

- تجريح شخصى ، لم يكن الرجل يوما مدمنا للخمر ، وكان أول من يذهب الى النادى الاهلى منذ الصباح الباكر ، وآخر من يغادره من الجهاز الفنى .
- ربما كان الاخ محمود معروف يقصد الكابتن هينرى ميشيل المدير الفنى السابق لنادى الزمالك ، المعروف بإدمانه للخمر ، وإنه كان لا يستحى من شرب الخمر على الملأ ، وفال عنه لاعبى نادى الزمالك إنه كان يذهب الى المران مخمورا .!
7- فهو يحب الفلوس اكثر من الأهلي ومن حياته ولا تصدقوا انه يعشق مصر والأهلي كما يردد .
- ما لكش دعوه ، خليك فى ناديك ..!!
8- ويسكته ياسين منصور بشيك بمبلغ كبير يرسله في الخفاء إليه.
- كــــداب كبيــــر : وإذا كان الاستاذ ياسين منصور قد ارسل اليه الشيكات فى الخفاء فكيف وصلت اليك المعلومة يا أبو العريف ؟!!
9- أحمد ناجي عضو جهاز حسام البدري الذي ذهب ليستقبله في المطار دون إذن من مديره الفني".
- محاولة خبيثة للوقيعة بين الكابتن حسام البدرى و الكابتن احمد ناجى ، وأبناء النادى الأهلى أكبر من أن يقعوا فى مثل هذه المحاولات الدنيئة .
- ذهاب الكابتن المحترم أحمد ناجى الى المطار لإستقبال صديقه مستر مانويل ، هو تصرف شخصى لا يستوجب الإستئذان من أحد حتى لو كان الكابتن صالح سليم رحمه الله ، وليس للكابتن حسام البدرى شأن فى ذلك.!
10-هل الأهلي سيدفع له هذا المبلغ ويخسر العلاقة مع ناد عربي شقيق هو اتحاد جدة؟
- محاولة خبيثة أيضا للوقيعة بين النادى الاهلى و الأشقاء فى إتحاد جده ، ولو كان النادى الاهلى فى حاجة للكابتن مانويل جوزيه لدفع الغرامة طبقا لشروط العقد ، وطبقا للقاعدة القانونية المعروفة :

العقد شريعة المتعاقدين

11- هل جاء لقضاء العيد عندنا في القاهرة أو في شرم الشيخ؟ بأمارة إيه؟
- شيء بارد هو حر يا أخى يقضى الأجازة مطرح ما هو عايز ، إن شالله حتى يقضيها فى 000 ؟؟ ولا بلاش اللهم إنى صائم السته البيض ..!!
12 - وإذا كان في إجازة لماذا لم يذهب إلي البرتغال لزيارة عائلته ؟
- محاوله عبيطه للوقيعة بين مستر مانويل وزوجته المصون ، يمكن أن نصفها و ندخلها تحت بند ( كيد نسا ) .!!!
13- في كل الأحوال زيارة مرفوضة فلا أهلا ولا سهلا بك في بلدنا
- فى كل الاحوال أهلا وسهلا بمستر مانويل جوزيه فى النادى الاهلى وبين كل جماهيره العاشقة للرجل .

عيــــــــــد سعيــــــــــــد و كل عام وحضراتـــــــــكم بخيــــــر

[ٱحےـمد اسےـماعيل]

ههههههههههههههههههه

إسماعيل ذنبه ايه ؟؟؟؟؟

العيب على الخرونج

[ابوناجى]

يا معروف أعمل معروف وخليك فى حالك - ومن حق مين اللى لقبك بمعروف فكلنا يعلم أن للمرء من اسمه نصيب ويبدو انك تنازلت عن نصيبك -

[م/السيد منطاوى]

والله ام محمد دى ميه ميه نكدت على الى خلفوه والضحيه اسماعيل

[aiman noor eldein]

المشاركة الأصلية كتبت بواسطة ابوناجى

للمرء من اسمه نصيب

لكم خالص الشكر حبيبى ابو ناجى

[السيدعبدالعزيز]

لو كان بايدى لارسلت هذا المقال لجميع الصحف والمواقع الرياضيه وارسلته تلكس له هو شخصيا لعله يعتبر
اللى انا فاكره ومش قادر انساه انه كان حالف يمين بالله العظيم انه لن يسمح بدخول جوزيه البلد مرة اخرى وقال لو دخل البلد ده على جثتى
والان دخل جوزيه البلد بترحاب ومحبه من كل الناس.. الا هو .. ولم يستطيع فعل ما قاله..

المهم فى النهايه تسلم ايدك فعلا استاذ ايمن ان تتحف المنتدى بمقالاتك الممتعه

[aiman noor eldein]

أنا مش عارف شفت الخلقه دى فين ؟ الجدع ده بيطلع فى مودرن سبورت ؟؟!!

[السيدعبدالعزيز]

الجدع ده بيطلع فى مودرن سبورت ؟؟!!

هههههههههههههههههههههههههههه

[aiman noor eldein]

لأ ده أنا عارفه كويس ، ده صاحبنا بعد النيو لوك ( كووووول )

[batista_cena]

المشاركة الأصلية كتبت بواسطة aiman noor eldein

لأ ده أنا عارفه كويس ، ده صاحبنا بعد النيو لوك ( كووووول )

رووووووووووووووعة استاذ ايمن
تحياتي

[محمدزكريا59]

مشكور بارك الله فيك

[زكريابكر]

رووووووووووووووعة استاذ ايمن
تحياتي

[اشرف الجوهرى]

تسلم ايدك اخى الغالى
بارك الله فيك

[eng_aea]

المشاركة الأصلية كتبت بواسطة aiman noor eldein

لأ ده أنا عارفه كويس ، ده صاحبنا بعد النيو لوك ( كووووول )

مقال رااااااااااائع مثل صاحبه
سلمت يمينك اخى العزيز ايمن
و بخصوص الصوره يخلق من الشبه اربعين

[السيدعبدالعزيز]

المشاركة الأصلية كتبت بواسطة aiman noor eldein

لأ ده أنا عارفه كويس ، ده صاحبنا بعد النيو لوك ( كووووول )

ههههههههههه
اكيد انت سافرت ليبيريا قبل كدة وعارف اصول الناس دى
لان صعب حد يعرفه قبل التعديل
هههههههههه