@@ هـــــــــذة الصفحة مخصصة لهوات صيد السمك فى النيل والمياة العذبة @@

[حبيبة سات]

تسلم يا ابو روضة ولنا لقاء فى رحلة صيد مع بعض وياريت تحدد انت لوقت الى يناسبك ونجيلك الجيزة لكى نتعرف على حضرتك وتم تحميل الصورة الخاصة بك

[ٱحےـمد اسےـماعيل]

تسلم يا ابو حبيبة وان شاء الله تشرفني

[ٱحےـمد اسےـماعيل]

لو سمحت يا استاذ احمد ازاى اخلى الصورة ظاهرة زى ماحضرتك عدلتها دا

اسف للتأخير

ادخل هنا

&& ((شرح شامل لأحتراف عمل المواضوعات والشروحـــات المصورة)) للاستاذ عمرو شهوان && (http://www.masrawysat.com/vb/showthread.php?t=96602)

[حبيبة سات]

حان دور صيد الاسماك فى الشتاء وهو ثعبان السمك لازم يكون لة دور خاص لهواية صيد سمك الثعبان وهو من الذ الصيد والاكل شوفو الفيديو دة من هنااااااااااااااااا (http://www.youtube.com/watch?v=ETvOv0hXCqc)

[ٱحےـمد اسےـماعيل]

انتهى موسم البلطي

وللأسف كان من أسوء مواسم الصيد في حياتي كلها

ربنا يرزقنا في موسم التشميط طوال فترة الشتاء

[saad beckham]

فعلا يااستاذ احمد السنة دى الموسم كان تعبان خالص

[حبيبة سات]

انتهى موسم البلطي

وللأسف كان من أسوء مواسم الصيد في حياتي كلها

ربنا يرزقنا في موسم التشميط طوال فترة الشتاء

هتشمط فى القناطر ولا فين بالضبط

[scorpionsat]

التشميط بدا فى مكن الرفع وسحارات السلام
بس مفيش اوزان بتطلع لسه

[حبيبة سات]

التشميط بدا فى مكن الرفع وسحارات السلام
بس مفيش اوزان بتطلع لسه

يا مسهل ابقى طمنة على الدور دة وقولنا اية الاخبار

[يوسف ماضى]

موضوع اكثر من رائع انا بحب الصيد اقوى فى النيل

[حبيبة سات]

اهلا بكم نجوم ومحترفى الصيد انا اسف جدااا لقلة دخولى على الموضوع لاننا فى فصل الشتاء وانا مش من هوايات الصيد فى الشتاء المهم موضوعنا هو التشميط وفى ناس بيسموة التلطيش
http://im81.gulfup.com/R7tP1.jpg

بمناسبة حلول الشتاء والتاكيل بيكون ضعيف شويا قلت اعمل الموضوع دة وهو الصيد بطريقة التشميط
والتشميط عبارة عن طريقة للصيد زى الغماز والحداف ودة بيكون من غير طعم طيب لما هو من غير طعم السمكة هتيجى ازى انا اقولكم التشميط اوما يسمى ( بالتلطيش ) من اسمة بتشمط حاجة او بتطلطش فى حاجة ودة بيكون عن طريق عمل سبحة والسبحة دة عبارة عن وش طويل نازل منة اكثر من صنار لا يقل عن 10 صنانير فوق بعض ورملهم عادى زى مبنرمل اى وش والصنار بيكون مقاس كبير اسمة صنار تشميط والرصاص بيكون من فوق السبحة عادى جدا وبدخل السبحة فى خية بردة عادى اكنك بتركب وش عادى جدا وبعض الناس ممكن تضيف فى اخر السبحة رصاصة بلية صغيرة بس دة مش لازم برحتك انت وبتريحها فى المياة حوالى دقيقة وبعدين تنتش مرة واحدة اكنك معاك اكل وبتشكم وانتا وحظك ممكن الصنار يدخل فى سمكة وممكن لا ولو شبك ممكن يشبك فى ديلها بطنها ظهرها هى وحظها المهم الصنار بيدخل فى جسمها
بس ناس كتير بتقول انة حرام واللة اعلم وبيعللوا ذلك لئنك بتاخد السمكة غصب عنها ودة فعلا لو فى سمكة فى المكان لازم هتشبك وتجيبها انما حرام ولا حلال اللة اعلم مفتيش بس انا شخصيا مش بحبة ولا بستخدمة للاسباب الاتية:

1- مش ممتع ومفهوش فن زى التاكيل
2- اضرارة كتير ممكن وانتا بتضرب بالسبحة تموت اسراب من السمك الصغير تصادف مرورة لئن السبحة والنتشة بتكون شديدة فبتفرتكة
3- ممكن تجرح سمكة ومتشبكش كويس فبالتالى مش هتيجى معاك وبعد كدا هتموت

الغزل المستخدم :
الماكينة مش اقل من 60
الرمال مش اقل من 50
علشان ممكن يوقع سمك ثقيل فوق ما تتصور لئنة عامل زى الشبكة بيجيب الموجود فى المكان

ملحوظة :1- هذة الطريقة من الطرق الممنوعة والى بيعاقب عليها القانون ياعنى لو صادف مرور لنش للمسطحات وشافك ممكن يكون فيها قضية

2- الموضوع محتاج حرفنة شويا واختيار ارض اودور سالك مفهوش حوش كتير علشان الغشم ممكن يؤدى الى كسر العود


واللة الموفق

[حبيبة سات]

بسم الله الرحمن الرحيم مجمع للافادة

ادوار مجربة ممكن تختار منها الاقرب ليك وربنا الرزاق
وضف الادوار او الاماكن الجيدة التي تعرفها لنكمل المجموعة

1- منطقة محاجر ابو زعبل سمك بلطى كفافى سريع وقرموط بحجم كبير و السمك هناك كبير و المياة عميقة جدا جدا جدا من 7 متر و فى حتت تيج 12 متر دة كدة و بتصقط امامك وليس بالداخل . 2- منطقة دير الميمون قبل بنى سويف وبعد الكريمات جميع الاسماك وخاصة الرعاد
3- الترعة التى امام البلاجات فى فايد قرموط سريع جدا
4- ترعة الصحافة تروح لها من ابو زعبل تركب عربة باتجاه بلبيس وتنزل الصحافة وتمشى شوية فى الزراعة بلطى سريع
5- ترعة معرفش اسمها تروح لها من شبين تركب عربية بتقول الشرابية وممكن تنزل الشرابية او كفر عبد النبى بلطى حلو
6- ترعة القلج خلف السجن بلطى كفافى
7- أبو الخاو على الهدار طريق الخطاطبة كفر الزيات جميع أنواع السمك بلطي في النهار (ريم) وف الليل قرموط و بياض وأفضل موسم لها يبدأ من شهر مايو و حتى شهر يناير وأفضلهم شهر أغسطس و سبتمبر
8- المنصورية و النجيلة ( كفر الزيات ) جميع أنواع السمك بلطي في النهار (ريم) وف يالليل قرموط و بياض وأفضل موسم لها يبدأ من شهر مايو و حتى شهر يناير وأفضلهم شهر أغسطس و سبتمبر
9- كوم شريك ( كفر الزيات ) جميع أنواع السمك بلطي في النهار (ريم) وف يالليل قرموط و بياض وأفضل موسم لها يبدأ من شهر مايو و حتى شهر يناير وأفضلهم شهر أغسطس و سبتمبر
10- قناطر بولين (كفر الزيات ) لطش من على البغلة طوال أيام العام
11- فى منطقة فى حلوان اسمها ركن فروق (و هى مرسى للسنادل الخربانا) اخر طريق الكرنيش فى اتجاة حلوان لحد متلاقى مصنع لمواسير البترول (طعم و عجين ) حداف و غماز ( فلاش باشا )
12- القناطر هتروح القناطر و تسئل عن سجن القناطر و انزل بعدها عند المطافى و اول يمين قبل الكبرى الى علية الكامين تدخل يمين لحد اللسان و انزل هتلاقى جزر على فكرة الدوار حجارة (طعم ) غماز
13- غمازة الصغرى بعد حلوان على الكورنيش هناك ثلاثة ترع موازيين... آخر ترعة أدخل يمين حتى تجد هيش... بلطي جميل أحمر كفافي حجاري بالطعم الموسم من شهر 5 لكن ممكن يشتغل من4
أولا - البحري :
14- ابتداءا من المناشي - منشأة القناطر - ساعات بيقع فيها غلطات محترمة تشتغل صباحا ( بالريم ) و مساءا بالطعم و لو الجو هادي باليل و مافيش زحمة ممكن ترموا حداف بسن 6 أو 5 و طعم محترم ( معنكب ) و تلعبوا على البياض.
15- اتجاه الباجور : بالترتيب كدة : صروة - أو السبع روس و ده دور حداف و غماز
16- بير شمس - و ده دور غماز بالأساس و ساعات الحداف بيشتغل فيه لكن عيبه إنه بعيد شويه
17- الباجور نفسها - و فيها عدة أدوار على الحجر على كيف كيفك بلطي و رعدات
18 - اتجاه نكلا : نكلا نفسها - ولكن أنا ما بفضلش الصيد فيها أولا علشان المية هناك حامية جدا و ما ينفعش فيها غير الحداف و من على البغال مش من البر.. و ثانيا .. علشان الريحة..!!!!
19- أبو غالب : و فيها دورين حلوين جدا عند المجزر و تقدر تشتغل فيهم غماس و حداف و البلطي بتاعها يفرح
20- الحاجر : و هي بعد أبو غالب على طول و فيها كذا دور و أنا بفضل دور المدرسة و سمكها زي أبو غالب تمام
21- الخطاطبة : وهو دور مسلي سواء عند الجامع اللي على الطريق أو قدام على الحجر... و لكن عيبه إن سمكه صغير و الراي فيه كتير ( بالمناسبة الدور ده في يناير تشيل منه تعابين زي ما إنت عايز(
22- كفر داود - دور ريم و طعم و سمكته أكبر شوية من الخطاطبة بس المية فيه حامية و علشان كدة هو دور بالأساس غماس.
23- الدلنجات و دمشق - زي كفر داود بس سمكتهم أكبر و لكن مشوارهم أبعد بكتير.

24 - اتجاه قبلي : الصنادل - دار السلام - و ده مكان قدام شرطة المسطحات و بنروحله بالمعدية و ما تستهونوش بالمكان ده لأن سمكته لو اشتغلت بتطلع منه سمك محترم خصوصا على الحداف .
25- كوتسكا - دور تسلية ( لتعليم الصيد ) بصراحة ما شفتش منه خير.
26- الإخصاص : دور حلو جدا بس لو المية واطية في النيل و بناخد بلطي حلو منه.
27- ميت القايد : دور رائع لصيد الريم صباحا و الطعم في الليل ( الحداف ما ينفعش علشان الحجارة هناك كبيرة و المية سريعة(
28- نزلة عليان (غمازة) - و من هنا نخش على الجد - يعنى عدة نضيفة و خيط جديد و سنون محترمة و ده دور بلطي و رعدات و شيلان و بياض و أنوم.
29- جرزا - زي نزلة عليان بالظبط و هي في الجهة المقابلة منها.
30- من جرزا إلى بني سويف ممكن تعد أكثر من 100 دور على الناحيتين و معظمهم أدوار تقيلة و زي الفل
ودا شرح من صياد محترم جدا للقناطر و الادوار التمام جزاة الله كل خير:
ان القناطر صعب تلم بكل ادوارها كلها لان القناطر فيها فرع رشيد ودمياط والتفرع بيبقى في القناطر وفيها حوالي 4 رياحات(المنوفى ، التوفيقى ، البحيري , الناصري) من اجمل الرياحات قي القناطر المنوفي ميته شديدة جدا فالحداف افضل الطرق وارضه حجارة
الطعم / دود الارض عادي وعنكبوت للبلطي والراي و البياض و الانومة و الدقماق وغلطات شيلان , العجينة للراي و للبني والبلطي و غلطات مبروكة وممكن تطعم للمبروكة من البوص النامي على الجوانب بس تكون حاضرة في المية
الرياح البحيري من الرياحات القوية وهي الممتدة على طريق الخطاطبة وفكرته نفس فكرة المنوفي
والرياحات في القناطر كلها او اغلبها ميتها شديدة لان القناطر هي منطقة الهاويس لهذة الرياحات فبتبقى المية في بداية إندفاعها اما التوفيقي والناصري فمعرفش عنهم اي معلومات بصراحة
فرع رشيد في القناطر فحدث ولا حرج فية عندك ياسيدي الكوبري القديم ودا في الصيف شغال طعم وعجين ... وطول السنة تقريبا التشميط كويس
الجرف بين الكبريين ودا دور ممتد بطول المناشي ويقع ما بين الكوبري القديم والكوبري الجديد ودا طعم وريم حلو جدا في الصيف وتشميط طول السنة تقريبا والسمك بلطي وبياض وانوم وقليل جدا من البني وشيلان نادرة جدا
نطلع بعد كدة على الكوبري الجديد والرمي من فوق الكوبري ناحية قبلي غير بحري الكوبري قبلي هيبقى زي الجرف والكوبري القديم
اما الرمي من من نفس الكبري بس على بحري بكون على المشاية الملحقة بالكبري
من فوق العيون مباشرة ودي بتكون ميتها شديدة جدا جدا فية مواسم المبروكة بتاكل من عليها في المية الحامية بالطعم (عنكبوت) او ريم او البوص (قصب الفار) وهو البوص النامي على حواف النيل
المواسم دي عادة بتكون في شهر 6 , 7 ,8
الطعم التاني المميز العجينة بس دي عايزة حرفنة شوية في تجهيز العجينة وحرفنة في الصيد بيها
علشان العجينة ما تسيبش من السنارة من شدة المية
والعجينة دي من الطعوم السحرية إللي كتير من الناس بيتجاهلها بسبب صعوبة الصيد بيها
انواع السمك الراي - البني - القراميط - البياض - الشيلان إن وجدت و البلطي والمبروكة تأكلها لكن بالصدفة ويفضل في حالة توجية الطعم لصيد البياض تزفير العجينة بوضع زفارة سمك عليها لانها جاذبة للبياض
الطعم الدولي (مصارين الدجاج) ودي للقرموط رقم واحد وصدف ثعبان في الشتاء وصدف مبروكة
العنب البناتي للقراميط والبني في شهر 7,8
والصيد بالسمك زي انك تطعم راية صغيرة جدا او جلمانة ودي ممتازة للبياض والشيلان والرعاش
القرموط والبني الكبير جدا بيدخل عليها بس دي عايزة يكون معاك سنارة تطعمها وتنساها بس الغلطة فيها بإذن الله بحاجة محترمة زمان كنا بنجيب بيها قشر بياض بس دا إنقرض
ننزل من فوق المشاية على الجرف البحري ودي ادوار مبروكة ممتازة بس لما المية تكون عالية وبلطي في موسم الريم , وبالطعم في الشتاء التعبان بياكل كويس وادوار القراميط كتير نظرا لوجود البوص ودي صيدها بالطع الدولي
نطلع بعد كدة على منطقة السد او الشلالات ودي منطقة ممتازة لهواة الصيد بالفلة (الغماز) بالريم وبيقع فيها بلطي محترم بس لازم مركب وتنزل على الهدار او الشلال او كما نسميها في القناطر الدشم والراي والبني بياكل كويس في الصيف على العجينة والطعم .....والمبروكة والدقماق والبياض والتعبان و الشلباية كل الاسماك دي هناك بس انت ورزقك ..لانهم مبيكلوش بالساهل وعايزين صبر وحرفنة

ارجو من جميع متصفحى الموضوع ذكر دور خاص بهم على نفس الموضوع فى صورة رد على الموضوع لكى نصل فى النهاية الى موضوع شامل الادوار كلها تقريبا والموضوع القادم هيكون الادوار بالبحر الاحمر و البحر الابيض بازن الله

[ٱحےـمد اسےـماعيل]

ما شاء الله مجهود روعة يا ابو حبيبة

على فكرة التشميط برضو كان سيء جدا السنة دي

مش عارف السمكة قلت ليه من النيل

في ليلة تشميط جبت فردة شبشب ونظارة

قولت اكمل باقي الليلة يمكن أطلع جاكيت جلد أو حتى صاحب الشبشب والنظارة بس قفلت الليلة على الشبشب والنظارة

[حبيبة سات]

ما شاء الله مجهود روعة يا ابو حبيبة

على فكرة التشميط برضو كان سيء جدا السنة دي

مش عارف السمكة قلت ليه من النيل

في ليلة تشميط جبت فردة شبشب ونظارة

قولت اكمل باقي الليلة يمكن أطلع جاكيت جلد أو حتى صاحب الشبشب والنظارة بس قفلت الليلة على الشبشب والنظارة
هههههههههههههههههه د رزقك يا ريس كويس انها جات على الشبشب والنظارة انا فى مرة طلعت شوال هههههههههه مرورك اسعدنى استاذ احمد

[SHARK_X]

السلام عليكم ورحمة الله
موضوع رائع وجميل تسلموا عليه
وزي ما قال اخونا ابوحبيبه سات "أدوار قبلي"
هو كتب عن دور غمازة والاخصاص وفعلا هما في منتهي الجمال
بعدهم بحوالي 5 كيلو فيه "أدوار الجزيرة" دور مصنع الطوب في الجبلاوي , ودور الرصيف وده رصيف حجر لهواة الحداف اولا وتسريح الفلة ثانيا .
بعدهم تبدأ ادوار الصف وهي : الميزانية , عملية المياه , السن , الميناء , الفنار , العمارة , رأس موسي شغال بني ورعاد وانوم وبياض طعم وعجين نهارا , وبالليل احلي بلطي لهواة الفلة والغماز بالطعم .
بعدهم أدوار الديسمي وابورحاب والحلف
عموما انا لسه مبدأتش الموسم بتاعي , انا غالبا بأبدأ في شهر 4
وكل سنه وانتم طيبين

http://www.masrawysat.com/vb/attachment.php?attachmentid=421429&stc=1&d=1394388487

http://www.masrawysat.com/vb/attachment.php?attachmentid=421430&stc=1&d=1394388487

http://www.masrawysat.com/vb/attachment.php?attachmentid=421431&stc=1&d=1394388487

[ٱحےـمد اسےـماعيل]

جايب الشال ده منين يا راجل يا طيب

[حبيبة سات]

مـــــــاشـــــــاء الله انا لسة قدامى شهر كدة الجو لسة برد ولا اية يا جماعة عالعموم استنو منى ادوار جديدة باذن اللهِِِِِِِِِِِِِِِِِِِِِِِِِِِِِِِِِِِِِِِ[

[ahmeddvd82]

تسلم يامعلم على الفن الجميل

[axaxz244]

انا ساكن فى امبابه ونفسى اجرب الهوايه ده
ايه اقرب مكان ليا اقدر اروحه عشان اجرب اصتاد ويكون امان

[حبيبة سات]

انا ساكن فى امبابه ونفسى اجرب الهوايه ده
ايه اقرب مكان ليا اقدر اروحه عشان اجرب اصتاد ويكون امان

اهلا بيك هو يعتبر اقرب مكان لحضرتك المظلات بها ادوار يعتبر كويسة
بالطعم تمنياتى لك بالتوفيق