[حبيبة سات]

بـــســــــــــــــــــــــــــم الله الرحمن الرحيم
عملنا هذة الصفحة للتواصل لهواة صيد السمك فى النيل والمياة العذبة ودردشة والاستمتاع بالصيد والاماكن المخصصة او الادوار التى يتواجد بها نوعيات الاسماك وكل فصيل من السمك لة طعم معين وكيفية التعامل معة ونرجو من الادارة الكريمة ومشرفى القسم التثبيت لهذة الصفحة وانا هتبرع للمنتدى العظيم مــــــصراوى سات للمتابعة اليومية انا والاخوة الزملاء

[حبيبة سات]

سمكة الانوم

سمكه الانوم بتتواجد من بدايه الموسم شهر 4 لحد نهايه شهر 9
فى معظم الاماكن فى النيل
الطعم بتاعها : دود الارض
السن : سنه 7 و 8 و 9
الخيط او الشعر : من اول خيط 30 لحد 40
والترميل 25 و30
التطعيم بتاعها بطريقه العنكبوت افضل وحنزلها بلشرح وتابع معايا باذن الله
معلومات عن السمكه : السمكه دى هاديه جدا فى صيدها وفى تطليعها وضربها على الحداف بيكون بسيط مش زى البياض طبعا بس ودى تعتبر كل المعلومات عن السمكه لو فى اى سوال تحت امرك فى الرد عليه

[احمد يوسف الكنج]

فكره رائعه والله ياابو حبيبه

[احمد العنانى]

فكره رائعه
علشان كل هواه الصيد يتواصلو مع بعض
تسلم ايدك ياغالى
ونرجو من مشرفين القسم تثبيت الموضوع
ليكون مرجع كامل لكل انواع الاسماك والصيد باانواعه

[حبيبة سات]

طريقة عمل العجينة
اولا عجينة العيش
ودي بتكون عبارة عن لبابة العيش الفينو( الجزء الداخلى من الرغيف الفينو- الصامولى ) ومعجونة بماء فقط كل ما تحس انها ناشفة اديها مية لغاية ماتبقة عجينة لينة ومتماسكة . بس ولما تخلص حط نقطتين زيت وبس , واعجنها تاني , وبكده تكون جاهزة .
الطريقة دي بنسميها العجينة البارده لانها مش بنستخدم النار فيها , وكمان العجينة دي مش بتنفع لكل الاسماك يعني ممكن تنفع للبطاطا والشراغيش والموزة لكن لا تنفع لاصطياد سمك البورى .

ثانيا عجينة الدقيق
وهى نوعين :-
الاول : عجينة ناشفة
وبتكون عبارة عن كوب دقيق تحطة في طاسة وتقلبه على نار هادية لغاية لما الدقيق لونة يتغير بيبقى كريم كده بس خلي بالك متخليش الدقيق يتحرق منك
بعد كده ضيف المية مرة واحده وقلب لغاية ما تنشف وتلاقيها كتلة واحده ولو حسيت انها ناشفة زود مية بس شوية صغيرين .
فيه بعض الصيادين بيحطوا مية بسكر وبيسموها عجينة بسكر ودي بتنفع كتير مع البوري
الثانية :عجينة سايحة
وطريقتها نفس الطريقة اللي فاتت بس بتزد المية شوية , ومتسيبهاش كتير على النار علشان متنشفش منك وبرضه ممكن تعملها بسكر .
وعجينة الدقيق تنفع لكل الاسماك اللي بتاكل عجين وخصوصا طبعا البوري
بس مش المهم انك تعرف تعمل العجينة ,المهم انك تعرف تطعمها في السلاح لانك لازم تستخدم فمك بحيث انك تاخد حتة عجينة في فمك وتكورها بلسانك وتحط السلاح في فمك وتلف العجينة على السلاح , مش سهلة في الاول بس بعد كده بتعملها وانت مغمض

[احمدخالدالحداد]

الله ينور عليكم

[حبيبة سات]

بسم الله الرحمن الرحيم

صيد السمك والطعم المناسب لكل نوع من السمك ونوع الصنار والخيط
- البلطى
نوع الطعم دود الارض - الريم الاخضر – مقاس الخيط 20 او 25 – رقم السنارة 10
2- الشيلان
نوع الطعم دود الارض - مقاس الخيط 35 – رقم السنارة 16
3-البياض
نوع الطعم دود الارض او مصران الفراخ الرفيعة او حشرة الصرصار المنزلى – مقاس الخيط 30 – رقم السنارة 16
4- الثعبان النيلى
نوع الطعم الدود الارض لكن يوضع كامل او سمك الراى الصغير – مقاس الخيط 35 – رقم السنارة 15
5- الانومة
نوع الطعم دود الارض – مقاس الخيط 35 – رقم السنارة 10
6- البنى
نوع الطعم ثمار العنب البناتى لكن الصغير جدا او العجين (خبز نصف سوى مخلوط بزيت الطعام وتكون متماسك) – مقاس الخيط 30 – رقم السنارة 10
7- القراميط
نوع الطعم مصران الفراخ او عجينة اتلسابق زكرها مخلوطة بالدماء - الخيط حرير 4 فتلة – رقم السنارة 16
8- الشلباية
نوع الطعم العجينة – مقاس الخيط 25 – رقم السنارة 10
اتمنى ان تستفادو معنا

[ٱحےـمد اسےـماعيل]

واضح انك مجنون صيد مثلي

موضوع جميل وانا كنت منتظر واحد يعمله ليكون همزة وصل ما بين محبي هذه الهواية المجنونة

عزرا للتأخير بسبب انشغالي بموسم الصيد

الموضوع مثبت إن شاء الله ولي عودة

بالدور المفضل لدي والطعم والسمك وكل شيء

[حبيبة سات]

المشاركة الأصلية كتبت بواسطة ٱحےـمد اسےـماعيل

واضح انك مجنون صيد مثلي

موضوع جميل وانا كنت منتظر واحد يعمله ليكون همزة وصل ما بين محبي هذه الهواية المجنونة

عزرا للتأخير بسبب انشغالي بموسم الصيد

الموضوع مثبت إن شاء الله ولي عودة

بالدور المفضل لدي والطعم والسمك وكل شيء

وانت شرفت هذة الصفحة بجد وياريت يتم التواصل مع بعض الاصدقاء ونعمل رحلة صيد لكى يتم التعارف اكتر وشكرا لتثبيت الموضوع

[حبيبة سات]

هناك دور شغال فى القنطرة بلطى وقراميط وشيلان بالطعم

[saad beckham]

بارك الله فيك ياباشا على الموضوع وفعلا موضوع فى محله انا بعشق الصيد

[حبيبة سات]

الطريقه الاولي
اولاً نجهز وعاء التربيه من الخشب تكون ابعادة على الاقل 65 سم طول * 65 سم عرض * 35 سم ارتفاع
قم بثقب الوعاء من الاسفل والجوانب بانتظام بابعاد منتظمة كل 1/2 سم , مع تغطية الجوانب بخيش حتى لا تخرج الديدان وكذلك السقف , واحتفظ به بعيداً عن الشمس وفى مكان رطب جيد التهويه .
عمل الفرشة عن طريق خلط مواد عضوية مثل قش الرز – التبن – اوراق الاشجار الجافه – ثم تنقع فى المياة لمدة يوم كاملثم قطع ورق جرائد الى شرائح وورق كرتون وانقعها فى الميه ويخلط مع الفرشة
قم بملء الوعاء حتى نصف ارتفاعة , قم بإضافه الطينه واخلطها قليلاً
قم بإضافة المياة الى الفرشه بس ما تزودش بحيث انها ما تعجنش يعنى تكون رطبه
ثم اضف 1/2 كيلو دود او اقل , قم بإضافة الغذاء من بواقى اكل بشرط ان لا تحتوي على ” سمن – زيت – منتجات البان ” , والغذاء المفضل هو قشر البيض المسلوق
بعد 6 الى 8 اسابيع ستنخفض كمية الفرشة وتمتلء بمخلفات الديدان
يتم تغيير الفرشة كل 6 شهور

الطريقة الثانية
عن طريق فرم قش الارز وجعله شبيه بالتراب و نقوم بوضعة فى وعاء كبير من الالومنيوم ( طشط كبير ) أو أي مادة ونقوم بوضع قش الارز المفروم ونحضر شوية طعم ( دود ) ونضعهم فيه ونرش كل يوم شوية مية باردين شوية ونحطه في مكان رطب أو بارد شوية بعيد عن الشمس والقش المفروم منه عملنا التربة ومنه يأكل الدود وبعد أسبوعين ستظهر لك النتائج .

الطريقه الثالثه
المستلزمات
1-مستطيل خشبي بابعاد متر ونص في متر مقفول من الواجهه بسلك حديدي فتحتاه صغيره جدا ده عند اي نجار مش هيكلفك حتي 10 جنيه
2-التربه 3/4 طمي+1/4 رمل
3- متر مربع نجيله صناعيه
4-سبله واوراق شجر صفراء
5-وقطعه خيش لتغطيه المربع من الخارج
طريقه التنفيذ
1نضع المربع الخشبي اتجاه السلك للاسفل
2-نضع التربه ونخلطها جيدا مع قليل من السبله
3-ونحضر كمله الدود المطلوبه تقريبا ربع كيلو
4- نقوم بتنديه التربه بقليل من الماء ونرش قطعه الخيش ماء باردوة
5- ثم نقوم بوضع الدود علي التربه وفرزه جيدا من الدود المقطوع والميت
6نقوم بتثبيت النجيله ووضع اوراق الاشجار عليها
ونضعه في مكان ضل ويستحسن يكون فيه تيار هوا مستمر
مع مراعاه الحفاظ علي الخيشه دائما رطبه وبارده والتربه باستمرار بهاء ماء ومرويه وليست غرقانه
الطريقة الرابعه
- قم بشراء باسكت بلاستيك (جردل) وقم بعمل ثقوب صغيرة جداً في الأسفل عن طريق ابرة كبيرة الحجم او مسمار صغير بتسخينه عاى النار.
2- قم بملئ الجردل بورق الجرائد المقطع على شكل شرائح بعرض 1 سم .
3- قم بترطيب الورق برشة ببخاخة ماء .
4- قم بقسمة الورق إلى نصفين ضع نصف في أسفل الباسكت .
5- قم بشراء نصف كيلو من الدود مع الحرص أن يكون مظهره الصحي جيد (يعني دودة صاحية بتلعب) وضعه فوق الورق المفروش .
6- أضف نصف الورق الباقي فوق الدود .
7- أضف بقايا طعام من المطبخ (أي طعام) وتجنب الطعام المحتوي على زيوت أو سمن .
8- ضع باقي كمية الورق فوق الطعام .
9- قم بتغطية الباسكت بغطاء بلاستيك مثقوب .
9- قم بوضع الجردل في مكان مظلم رطب .
بعد شهر قم بحصد أول كمية من الدود بالطريقة التالية :
1-قم بمنع الأكل لمدة ثلاثة أيام .
2- في اليوم الرابع ضع كمية من الأكل .
3- انتظر لمدة ساعتين ثم قم برفع نصف الورق على مفرش بلاستيك .
4- قم بالتقاط الدود ثم أعد الورق إلى مكانه وهكذا كلما رغبت في الحصول على كمية أخرى .

[saad beckham]

سمكة الرعاد هى سمكة تحمل شحنات كهربائية قد تصل قوتها حتى 550 فولت وهى غالبا ما تعيش بين الحجارة وطعمها الطعم العادى ( دود الارض ) او مصران الفراخ واغلب صيدها يكون من بعد ازان المغرب وبالليل وهذه هى صورة توضيحية لها...

[saad beckham]

لو سمحت يا استاذ احمد ازاى اخلى الصورة ظاهرة زى ماحضرتك عدلتها دا

[حبيبة سات]

المشاركة الأصلية كتبت بواسطة saad beckham

سمكة الرعاد هى سمكة تحمل شحنات كهربائية قد تصل قوتها حتى 550 فولت وهى غالبا ما تعيش بين الحجارة وطعمها الطعم العادى ( دود الارض ) او مصران الفراخ واغلب صيدها يكون من بعد ازان المغرب وبالليل وهذه هى صورة توضيحية لها...

مشاركة رائعة تسلم اخى الغالى