نقاش حول اسعار التركيبات والصيانة

[الفارس الاوحد]

الله المستعان سبحانك الله وبحمدك لا له لا انت نستغفرك اللهم ونتوب اليك

[KaMoOoNa]

امبارح جالى زبون روحت معاه نشترى طبق وعدسة وسلك ورسيفر كانت الحسبة 650 جنيه وسالنى هتاخد تركيب كام قولتله 100 قالى ليه ان شاالله انت هتعمل ايه يدوب هتربط مسمارين هما 50 جنيه حلو اوى


الله يباركلك ودا الحال مع الجميع
ربنا يسترها علينا _ كله يغلى الا البنى ادم
patch_no:::

[عطار2011]

بصراحة لا ١٠٠ ولا ٥٠ جنية مهنة زى عدمها فى ظل اسعار اليوم تركيب طبق كبير كان زمان اول للزمان ارجع يا زمان وكثرت العمال فيها كتير اوى اذا قلت للزبون ١٥ ج وواحد تانى قلة ١٠ ج هيروح لة حتى لو كان قليل الخبرة و بعدين بتركب الان طبق كبير اشك فى السنة مرة
انا اسف مختلف معاك لان الناس الغلابة اللى كان عنده وصله وقال اشترى جهاز يدوب يفتح القنوات العادية ( يعنى مش عايز مشفر ولا **** ) وطبق صغير يعنى الراجل معاه يدوب من 200 الى 250 جنيه تيجى تقوله 100 تركيب معلش ايه ادوات التركيب اللى سعرها غلى معاك .

[هيثم سعيد عبد الفتاح]

اولا :بعد الحمد لله وماشاء الله لاقوه الا بالله احب اوجه الشكر لاخواتنا الفنيين ولطارح هذا النقاش ولمنتدانا العظيم .
ثانيا: المهنه زى اى مهنه ليها ايجابياتها وسلبياتها ولكن يحكما فى الاطار العام مراعاه ربنا فى اكل العيش دون ان َتظلم او ُتظلم او دون النظر لحاله الزبون الظاهريه فممكن يكون دكتور ولكن الكشوفات ضعيفه عنده او حد شارى شاشه ب8000ج بس قسط فليس الظاهر دائما يعكس الحاله الماديه للعميل.
ثالثا :واذا كنت بتطبق النقطه رقم 2 لا يجب مناقشه الزبون فى الاسعار او تخلى الزبون يفاصل معاك .لانه فى الغالب مايفهمش شغلك الفنى الا الفنى اللى زيك انما الزبون شايف بعنيه جزء بسيط جدا من الصوره الكليه زى مثلا انك ربط مسمارين وركبت بنتين والصوره تشتغل كويس فمايفهمش الفنيات الا لما يجرب اللى اقل منك فى الشغل ويعمله مشاكل او يجرب يعملها هو ويبقي مكانك يمكن ساعتها بس يفهم ويقدر تعبك فى ( انك مكلف جهاز وعده تظبط بيها بدل ما تبهدل الشاشه والرسيفر عنده مع ان اقل جهاز ظبط دلوقتى غالى جدا بالنسبه لاسعار التركيب الحاليه او مثلا تختارله خامه سلك نظيفه ماتعملش مشاكل معاه فى الاشاره بعد كده او الطبق يقرفك لانه صدى والمسامير جنزرت علشان تظبط اشارته بس او انك تحدث الجهاز قدامه فى بيته بدل ما يفكه ويركبه +مواصلات + تمن التحديث او تروح مشوار متعب والجو صعب خصوصا على السطح صيف وشتا او من واقع خبرتك كفنى بترشحله رسيفر كويس سهل يتعامل معاه ومايقرفهوش فى الاشاره والتحديث بعد ماتبهدلت من الملفات الغلط للاجهزه الضعيفه اللى مشاكلها كتيره اللى ممكن لاقدر الله توصل لشحن فلاشه على حسابك الخاص بعد ماخد ملف غلط ولا الصيانه اللى ممكن تخليك تلف حوالين نفسك بسبب مقاومه صغيره او ترنزستور طبع ضارب ......وغيره كتير مما لا يراه الزبون من تعب ومشقه ومجهود فى هذه المهنه ) واختزاله جزء من الصوره الكليه فى ربط مسمارين او توصيل طرفين سلك او ربط مسمارين شاشه او تحديث بالفلاشه او تركيب مكثف صغير فهو يرى ماعملته يدك فقططط دون مراعاه المجهود العقلى والبدنى او انجازك ليه بالعده اللى معاك بدل مايجيب حد تانى زى الكهربائي مثلا يعديله السلوك تكلفه فوق التكلفه او يستلف عده وهكذااا ومش كل زبون هتشرحله كل ده وتفهمه الصوره دى كلها .
رابعا :حساب التكلفه ليها اختلافات كتير جدا حسب اللى شغال فى المهنه (مثلا ممكن موظف بيشتغلها جانب شغله او حد متخصص فيها هى دى بس شغلانته او غيره شغال فىها مع الكاميرات او محل مفتوح بالبضاعه كتجاره فقط لشخص ولما العميل يطلب حد فنى يديله رقم ممكن يكون فنى او حتى سواق توكتوك او حتى موظف او كهربائي يجى يركبلك الطبق بسسس )ده غير طبعا لو متجوز وعنده اولاد او عازب فطبعا كل واحد فيهم بيحسبها حساب تانى خالص مختلف عن التانى وليست متقاربه حتى عن الشخص التانى واللى يقدر يتحمله شخص منهم لا يتحمله الاخر.
خامسا: طريقه التركيب والشغل تختلف جدااا فى حساباتها زى مثلا (تركيب الطبق )ممكن تركب طبق بس وترمى السلك من الشباك او المسقط وخلاص و يتوصل بالرسيفر او تركب طبق قديم مصدى كان راكب قبل كده واتنقل من مكان لمكان يغلبك وممكن تدكك سلك او تمشيه على الحيطه فى الشقه بكليبسات او فى عماره كبيره وطالع يجى 150 طرف سلك على السطح وانت عليك تحدد انهى سلك للشقه اللى شغال فيها ولو سلك فيه مشكله شوف الدوخه والويل ...ودى حاجه بسيطه بتدخل تحت بند تركيب الطبق ولكن لكل نقطه منها تعبها ومجهودها ووقتها وشغلها...وبرده الزبون يسالك تركبلى الطبق بكااام؟.... وممكن فى (تركيب الشاشه) تركيب شاشه 32 بوصه عاديه غير 43 او55 سمارت بتحتاج اعدادات وبرمجه وممكن تدوخ على ماتعمل ليها ملف قنوات ده غير الحامل ثابت ولا متحرك ومساميره جاهزه ولا لا فكل هذا يندرج تحت بند واحد بيسالك عليه الزبون بتركب الشاشه بكام ؟ وهكذا__________________
ومما سبق يتضح اختلاف الاسعار والاراء والشغل كل حسب مكانه ونظرته للشغلانه من موقعه ومكانته وثقافته ورأيه الشخصى وعلمه وتعبه ومجهوده ولذلك يصعب وضع تكلفه محدده للاسعار بين الاخوه الفنيين لاختلافتهم واختلاف الاماكن والاسعار المعيشه وتقديرات الزبون ولكن يمكن وضع متوسطات فى الشغل العادى الطبيعى المباشر(مع مراعاه اسعار التوكيل فى التحديث عندهم وتركيب وبرمجه الشاشات +هامش بسيط لما يسمى توابع او متابعه الشغل زى مثلا انك تركب طبق وتمشى وكله شغال تمام ولكن بعد يوم او اتنين تحصل حاجه بسيطه تفصل الاشاره ومش ناتجه عن شغلك انت ولكن ممكن عن جهل الزبون فى التعامل مع الرسيفر والشاشه مثلا او بعض الجيران المنحطين فى تصرفاتهم انو ممكن يشيل السلك من طبق ويوصل سلكه هو او فنى سئ النفس والخلق يفصل السلك من الطبق ويسيبه ويمشى ساعتها الزبون يرن عليك ويقولك تعالى شوف شغلك وتلف وتدور على ماتوصل العيب فين وفى الاخر بعد تعب ووقت ومجهود ومواصلات الزبون يحسبه عليك انو تبع شغلك اللى لسه عامله ومتتحاسبش عليه وهكذا .................فممكن حضرتك من خلال التعليقات السابقه تحط رينج متوسط للاسعار حسب مجهودك ومنطقتك والحاله العامه للناس والمعيشه فيها بما لايكلفهم زياده فوق طاقتهم لانه ملوش ذنب فى وضع السوق والاسعار وتكاليف المعيشه فالغلاء وتقلبات السوق على الكل ولا يقلل من تعبك ومجهودك ومصاريفك وبيتك واسرتك .
تركيب طبق صغير جديد مع توصيل السلك مباشره من غير ماتمد سلوك =
ظبط اشاره طبق صغير اعتيادى=
تركيب شاشه عاديه=
تركيب وبرمجه شاشه سمارت =
تحديث قنوات رسيفر=
تنزيل سوفت =
تركيب المتحرك (160او180سم)=
ظبط المدار=
وده فى الشغل العادى اللى مش محتاج مجهود زياده انما اى زياده او تعب او مجهود يحتسب تقديريا بناء على الوقت والمجهود والمعامله الحسنه مع الزبون(اللى مش هيفاصلك)
وناسف للاطاله وربنا يوفقنا جميعا ويسترها معانا دايما

[tvhany]

طيب ممكن اعرف رنج ترتيب رسيفر بلتى ان مهما كان نوع الشاشة

[abdulsattar]

لماذا لا نناقش هذا الموضوع فى ظل الغلا فى الاسعار هذه الايام يعنى تركيب نايل سات بكام صيانة الطبق كام صيانة رسيفر ملف القنوات
انا بركب نايلسات 50ج على طبق70سم وصيانة اشارة 30ج وتركيب شاشة 50ج وبرمجة شاشة سمارت 50ج وبرمجة الرسيفر 15ج عادى او HD فى صهرجت الصغرى أجا الدقهلية