[عمران عمارة]

الناس اللي عندها شبكات دش مركزي سلوك لو عايز صورة كويسه توازي hd وتظبط مكبر الغرفة ومش عارف تظبط البندات والقنوات فيها واحدة صورتها كويسه والباقي وحشه او فيها ريجة او خطوط بالعرض او تنميلة بص يابرنس
اول حاجة هتعملها
هتعمل استاند خشب كويس وتحط الأجهزة فيه وتركب فيه بعدد قنواتك لكل جهاز علبة كهربا خارج وتحط في كل علبة بريزتين كهربة وتنظم العمل وترص الرسيفرات كويس ويثبتهم بحيث مافيش جهاز يتهز او يقع وتلم سلوك فيش الرسيفرات وتثبت المكبر بتاعك تخليه بعيد عن الاستاند اللي فيه الرسيفرات او الموديليتورات بحوالي متر ونص
صدقني تنظيم الغرفة اهم شيء هترتاح وهتدعيلي

تاني حاجه
تحط رسيفرات الrf او الموديليتورات بتاعتك لو كنت عامل الشبكة بمودليتور كلها من نفس النوع بالظبط متخليش جهاز مختلف عن التاني لأي سبب
يعني مايبقاش عندك جهاز موديليتور الكاد مثلا والباقي فيجا او اي نوع تاني كده عمرك ما هتظبط الشبكه كويس لازم توحد نوع اجهزة الrf اللي هتدخل علي مكبر الغرفة

تالت حاجه
هتنظم سلوك الإشارة اللي جاية من الأطباق
تخلي اطباق الإشارة للشبكة بس يعني ماتخدش سلك اشارة من اي طبق خاص بالشبكة للشقة عندك تحت او لأي تلفزيون مش تبع الشبكة لانه هيعمل معاك راجع خيالات وريجة بسبب الشاشة او الرسيفر او التلفزيون اللي عندك ابقي ركب طبق دش لأي تلفزيون عندك في البيت مايبقاش ليه دعوة بالشبكة
رابع حاجه
مكبر الغرفة بتاعك اي كان نوعه طالما مش بيقسم البندات هتوصل عليه قنواتك كلاتي
اول فتحة تحط عليها بند ٢١ و٢٣ و٢٥ و٢٧ و٢٩ و٣١ و٣٣ و٣٥ وبالترتيب اول جهاز ٢١ واللي بعده ٢٣ واللي بعده ٢٥ وهكذا ماتخلفش الترتيب
وماتزودش علي الفتحة اكتر من ٨ قنوات لو عندك قنوات كتير يبقي كل فتحة دخول للمكبر تاخد ٨قنوات بس وتكمل علي نفس الترتيب الفتحة التانية تبدأ من بند ٣٧ وتكمل بند ٣٩ و٤١ و٤٣و٤٥و٤٧ و٤٩ و٥١ خليك فاكر تعد ٨قنوات بس علي كل فتحة اظن بقي كده تقدر تكمل القنوات على الفتحة التالته لوحدك تبدأ بند ٥٣و٥٥و٥٧و٥٩و٦١و٦٣و٦٥ و٦٧ كده فاضل بند ال٦٩ واحد يسألني مثلا كده ملهوش مكان هقولك صح بس ده لو عايز تشغله علي المكبر ماهما تعمل هتوصل صورته ضعيفة علشان ده في اخر شريط UHF عشان تشغله يبقي انت تاخد الار اف بتاعه علي مكبر صيني صغير وماتعليش المكبر وتركبه مع اخر رسيفر في الفتحة التالته بند ٦٧ في الحاله دي اخر فتحة هتبقي مكونة من ٩ قنوات
الشبكات اللي شغالة ب كابينة تحط القنوات عادي جدا كلها من اول ال VHF لغاية بند ٦٩ في UHF وتحط القنوات ٢١ و٢٢ و٢٣ و٣و٢٤ و٢٥ و٢٦ وهكذا نظام الكابينة مابيسبش فاصل قناة زي شغل المكبر
لان الكابينة بتفصل الريجة ودخول صورة البندات والقنوات في بعض لأنها فيها فلاتر تصفية


اما لو عندك مكبر فيه فتحة دخول واحدة بس زي مكبر الالكاد ٧١١ يبقي تجمع عليها كل قنواتك ماهما كان عددهم ممكن واحد يسألني برضوا طب انا شغال بمكبر غرفة فيه فتحتين دخول بس في الحالة دي تحط برضوا اول فتحة ٨قنوات وتكمل باقي القنوات ع الفتحة التانية
طب لو عندي ٢٠ قناة والمكبر ٢فتحة دخول RF في الحالة دي هتقسم القنوات كل فتحة تركب عليها ١٠ قنوات وعموما دلوقتي معظم شبكات السلوك بتبقي ٥قنوات ٦قنوات مبقاش حد بيشغل قنوات كتير يعني بيحط قناتين ٣ كورة واتنين تلاتة افلام وخلاص

الخلاصة في تجميع القنوات على المكبر طالما عندك أكثر من ٨ قنوات تستعمل الفتحة التانية في مكبر الغرفة
عندك ٨قنوات او اقل تجمع علي الفتحة الاولي بس ممنوع تقرب من الفتحة التانية عشان ما تضيعش قوة الخروج بتاعت مكبر الغرفة
ولو شغال vhf زي الناس اللي عندها خبرة نصيحة ماتجمعش من اول قناة ف بندات الvhf اللي هيا c5 وتحط بعدها c9 وc12 وc18 لامش هتبقي كويسة معاك خليك برنس وسيبك من البندات دي وتحط قنواتك علي فتحة ال vhf برضوا بس خليك من اول الs باند اللي بتبدأ من s25 وبعدها s27 لغاية s33 الأماكن دي مكانها بين اخر ال نطاق الvhf واول نطاق الuhf صورتها بتبقي full hd
بس لما تجمعها ماتعليش الdb بتاعها في مكبر الغرفة لأنها في انضف مكان في النطاق الترددي ولو عليتها وجيت تعلي مكبر خط في الشوارع هتعمل خيالات وريجة علي بندات الuhf ف لو اشتغلت بيها دخلها ضعيفة شويه علي المكبر يعني تهديها من الميدليتور

خامس حاجه
تجميع سلوك القنوات على المكبر
في ناس بتحب تشتغل بالاسبليتور المقلوب ومن الاسبليتر علي مكبر صغير ومنه للمكبر هيا طريقة شغالة كويس مع بعض الناس بس احب اقولك انها غلط لأنها بتفقد ١٣ db من قوة خرج الrf
الصح انك تجمع علي المكبر علطول مباشر من الأجهزة عن طريق rf in و out حتي لو عندك قنوات كتير التجميع يبقي كل ٨قنوات in وout وبالترتيب معني كده ان السلك من فتحة out بتاعت الجهاز بند ٢١ تدخل علي اول فتحة في المكبر
وتاني فتحة زي ماقولت هتبقي out جهاز ٣٧ تدخل على المكبر وهكذا
وتحاول تخلي وصلات ال rf اللي بين الأجهزة قصيرة وتكون من سلك ٩٦ شعرة ويكون سلك محترم خامة كويسة علشان مايعملش تداخل إشارات خارجية
والجاكات الدكر والنتاية تكون معدن وال اف كونتكتور تكون محملة خامتها كويسة
اهم شيء الادوبتور بتاع الرسيفرات اللي في الشبكة تكون أصلية ١٢فولت ١ امبير علشان ماتلاقيش خيالات في الصورة لان ال ٢ امبير بتعمل راجع كهربة وخطوط موجة في الصورة
ووصلات الاوديو فيديو تكون خامة أصلية وتلمها بشيكرتون ماتسيبهاش متنتورة

طبق كلامي هتاخد صورة ممتازة ومفيش مشترك مهما كان بعيد هيشتكي من ضعف الصورة

وان شاء الله بكره نكمل الكلام عن التوزيع في الشوارع وانواع السلوك اللي في الشارع وترتبها ازاي وتركب مكبرات الشوارع ازاي

[الحاج شريف]

ليس هذا هو المقصود بالدش المركزى فى هذاالمنتدى ، المقصود به شبكات العماره التى تحتوى على سويتشات وعدسات كواترو
اللى حضرتك شرحته شبكات التوزيع السلكيه الممنوعه قانونا ، وبالتالى لايدعمها المنتدى ولا يدعم شروحاتها
للأسف الموضوع سيغلق لمخالفته القانون وتعليمات المنتدى