[aiman noor eldein]

- هذه إحدى مواضيعنا التى طرحناها على حضراتكم ، بتاريخ 14 أيلول (سبتمبر) 2010 ، بعد أن سرت إشاعة فى الوسط الرياضى يومها بان السبب الحقيقى وراء زيارة الكابتن مانويل جوزيه المكوكية الى القاهرة هو العودة لتدريب النادى الاهلى ، وليس كما اعلن يومها قضاء أجازة العيد بين الأصدقاء .
- وقد رأينا إنه من المناسب إعادة عرضها ، فى ظل الحملة الإعلامية الشرسة التى يتعرض لها الرجل من بعض الأقلام التى لا تخفى حقدها و كرهها للرجل ، الذى إرتبط تاريخه مع النادى الأهلى بالعديد من الإنجازات التى من الصعب أن تتكرر على المستوى المحلى و الدولى .

وهنا نحن نعيد الموضوع لتعلموا إننا أبدا لا نتجنى على أحد ، و أن ما نكتبه تمر الأيام وتثبت صحته ، وأن رؤيتنا المستقبلية التى من الله بها علينا غالبا ما تكون صائبة ، و ربما لتعلموا أيضا ما أسباب هذا الكم الهائل من الحقد و الغل الذى يحمله البعض للرجل .

المشـــــــهد الأول :

- بعد إنتهاءه من يوم من العمل الشاق ، وبدء أجازة عيد الفطرالمبارك ، يخرج الاستاذ من مكتبه ، وقد بدا على وجهه الرضا و السعادة البالغة ، وبدأ يصافح الجميع و يودعهم ، متمنيا لهم قضاء أجازة سعيدة .

- وأثناء نزول الاستاذ من الجريدة ، يدق جرس الموبايل ، ويدور الحوار التالى :

- الاستاذ : أيوه يا ام محمد ، خير ؟!

- أم محمد : ما تنساش يا محمود تجيب معاك 2 كيلو فسيخ ، من الفسخانى اللى جانب الجرنال .!

- الاستاذ : يا ستى هو ده وقته الجو حر والشمس سخنه نار ، ابعتى اسماعيل البواب يجيب اللى انتى عايزاه .

- أم محمد : اسماعيل خد العيال و سافر يعيد فى البلد , وبكره العيد كل سنه وانت طيب، العيال جايين يعيدوا معانا ، وياكلوا الفسيخ .!

- الاستاذ : حاضر يا ستى ، هفوت عليه دلوقتى ، على الله يكون فاتح ؟!


- يغلق الاستاذ الموبايل ، ويحدث نفسه : الله يخرب بيتك يا إسماعيل الجو نار ، يعنى حبكت تسافر البلد النهارده ، داهيه لا ترجعك .!

المشــــهد الثـــــــــانى :

- بمجرد أن يضع الاستاذ المفتاح فى باب الشقه ويدخل ، يأتيه صوتا كالرعد أو قل كالصاعقة المدوية من داخل المطبخ :

- محمود جبت الفسيخ يا محمووووووود .!

- الاستاذ : أيوه ، قلت لك ميت مره ، استنى عليه أريح من السكه و بعدين اتكلمى .

- تخرج الفاضلة ام محمد وتنظر الى يدى الاستاذ ، إمال هو فين ؟

- الاستاذ : هو ايه ؟

- ام محمد : الفسيخ يا محموووووود .

- يفكر الاستاذ لثوانى : ياااااااه نسيته فى شنطة العربيه ، ابعتى اسماعيل يجيبوا من العربيه .

- ام محمد : اسماعيل مين ؟

- الاستاذ : اسماعيل البواب .!

- ام محمد مندهشة : انت يا راجل ما بتفهمش مش قلت لك اسماعيل خد العيال وسافر يعيد فى البلد .

- الاستاذ : خلاص ، خلاص ، هنزل أجيبه .

- أم محمد : وبعدين إيه اللى خلاك تشيله فى شنطة العربيه ، ما حطتوش قدامك ليه علشان ما تنساهوش ؟

- الاستاذ : الزفت جمال هليل كان معايا ، ولو كان شم ريحته ما كنش هيبطل تريقه .!!

- أم محمد : طيب إتصرف ، علشان الجو حر ، و أنا مش ناقصه خنقه الله يخرب بيتك يا إسماعيل .!!

- يفتح الاستاذ الباب و أثناء نزوله من على السلم لإحضار الفسيخ ، يتمتم محدثا نفسه ببعض الكلمات :

- قال ما بفهمش قال ، صحيح الملافظ سعد يا وليه يا خرفانه الله يخرب بيتك يا اسماعيل .!

المشــــهد الثــــــــالث :

- بعد أن يصعد الاستاذ ، ويعطى الفسيخ للحاجه أم محمد ، يقرر أن يأخذ حمام بارد ويتوضأ لأداء صلاة العصر ، وأثناء إستمتاعه بالحمام ، يدق جرس التليفون ، الحاجه أم محمد من خارج باب الحمام : إرفع السماعه اللى عندك يا محمود .

- الاستاذ : مين ؟

- ام محمد : مش عارفه واحد من الجرنال عايزك .

- يرفع الاستاذ السماعة : أيوه مين ؟

- المتحدث : أنا فتحى يا استاذ ، بكلمك من المطار ، ليك عندى مفاجأه كده ؟

- الاستاذ : خير ؟

- فتحى : عارف مين لسه نازل من الطياره دلوقتى ؟

- الاستاذ : مين ؟

فتحى : مستر مانويل جوزيه .

- الاستاذ : مندهشا بتقول مين ؟

- فتحى : مستر مانويل جوزيه ، إنت مش سامعنى ولا أيه يا استاذ ؟؟ إيه الزيطه اللى عندك دى ؟ انت فين بالضبط ؟؟

( لاحظ أن الاستاذ فى هذه اللحظه كان بيشد السيفون بعد التغيرات الفسيولوجية التى طرأت عليه عقب تلقيه خبر عودة مستر جوزيه) ..!!

- الاستاذ وقد ارتسمت على وجهه علامات الرعب ووقعت الصابونه من يده من هول المفاجأة ، وأثناء نزوله لتناولها .

- فتحى : يا استاذ يا استاذ ، رحت فين يا استاذ ؟!

- الاستاذ : أيوه يا زفت ، بتقول مين ؟

- فتحى : بقول مستر مانويل جوزيه لسه واصل المطار حالا .

- الاستاذ : وده جى يهبب إيه ، متأكد انه هو ؟

- فتحى : هو يا استاذ بشحمه ولحمه ، بعنى أنا هتوه عنه ، وكمان فى جماعه من النادى مستنياه ، الجدع الطويل أبو دقن ده اللى بيدرب الإجوان ، و الدرندلى وشويه كده مش عارف اساميهم .

- الاستاذ : طيب يا فقرى إقفل دلوقتى وحاول تعرف لى من بعيد لبعيد الجدع ده جى ينيل إيه ؟ .

- يخرج الاستاذ من الحمام مهرولا .

- الست ام محمد : ايه يا بو محمد ، طالع من الحمام و الصابون على جسمك ، ايه الحكايه ؟ التليفون ده قلب حالك ليه ؟!

- الاستاذ مش وقته

يدخل الاستاذ الى غرفة مكتبه بالمنزل ، وما أن تيقن بإتصالاته من صحة الخبر ، وقدوم مسترمانويل جوزيه ، فى زيارة مفاجئة لقضاء أجازة العيد بين أحباءه وأصدقاءه فى القاهرة ، حتى ترتعد فرائصه و ترتعش مفاصله ، وأصبح مترجلا يقطع الحجرة ذهابا و إياب وهويضرب أخماسا فى أسداس .

- الاستاذ محدثا نفسه بصوت مسموع :

- اجازة العيد ؟ جى يقضى أجازة العيد ؟ لا لا أكيد الموضوع فيه سر ؟ يادى الواقعه ليكون حسن حمدى بعت له علشان يمسك الفريق من تانى ، يا دى المصيبه السوده ، واشمعنى افتكر العيد الصغير ؟ ما جاش فى الضحيه ليه ؟ ده احنا ما صدقنا ان حسام البدرى إبتدى يلوش ، وقلنا نخطف لنا بطوله من ولاد الهرمه .!!

- وحياة أمه لانا لابه حتة مقال يولع الدنيا ، و يوقع كل الناس فى بعض ، ويبدأ الاستاذ فى كتابة إحدى مقالاته المسمومة .

- وأثناء إنشغال الاستاذ بكتابة المقال ، يأتيه صوت أم محمد من خارج غرفة المكتب :

- المغرب أذن يا محمود ، مش هتقوم تفطر ؟

الاستاذ : مش هتنيل لما أخلص اللى فى إيدى .!

الحاجه أم محمد : والله اللى ياكل على ضرسه ينفع نفسه ، انت حر .!

- يخرج الاستاذ بسرعة من غرفة المكتب خوفا من أن تفوت الحاجه أم محمد فى الصدر و تسيب له الورك ؟؟


- الاستاذ وهو يجلس على السفرة : اللهم إنى لك صمت و على رزقك أفطرت ، اللهم لا تسلط علينا من لا يخافك و لا يرحمنا ( يقصد مانويل جوزيه ) الله يخرب بيت امك يا اسماعيل .!

[منصوراوى]

موضوع رائع استاذ ايمن
كلنا معاك يا اسماعيل
والمرعب كلنا عارفينه
معاك الرب واتنين سفن اب

[ٱحےـمد اسےـماعيل]

يخرج الاستاذ من الحمام مهرولا .

- الست ام محمد : ايه يا بو محمد ، طالع من الحمام و الصابون على جسمك ، ايه الحكايه ؟ التليفون ده قلب حالك ليه ؟!

مافيش جديد أستاذ أيمن

مبدع كعادتك

6 سنوات ومش عارف اتعلم منك

[aiman noor eldein]

المشاركة الأصلية كتبت بواسطة هزيم الرعد

مافيش جديد أستاذ أيمن

مبدع كعادتك

6 سنوات ومش عارف اتعلم منك

يا نهااااااااااااااار
بل أنا تلميذك استاذى الكبيييييييييير
أحمد ( هزيم الرعد )

[موكشة]

ودى صورة ام محمد ولا اية

[aiman noor eldein]

المشاركة الأصلية كتبت بواسطة موكشة

ودى صورة ام محمد ولا اية

ولا ايهههههههههههههه

[aiman noor eldein]

المشاركة الأصلية كتبت بواسطة هزيم الرعد

مافيش جديد أستاذ أيمن

مبدع كعادتك

6 سنوات ومش عارف اتعلم منك

طيب وى دىىىىىىىىىىىىى

- الاستاذ : مين ؟

فتحى : مستر مانويل جوزيه .

- الاستاذ : مندهشا بتقول مين ؟

- فتحى : مستر مانويل جوزيه ، إنت مش سامعنى ولا أيه يا استاذ ؟؟ إيه الزيطه اللى عندك دى ؟ انت فين بالضبط ؟؟

( لاحظ أن الاستاذ فى هذه اللحظه كان بيشد السيفون بعد التغيرات الفسيولوجية التى طرأت عليه عقب تلقيه خبر عودة العبقرى) ..!!

[- ايمن منصور -]

دائما مقالاتك بتعجبنى وبستمتع احلى استمتاع لما بشوفها

تسلــــــــــــــــــــم ناقدنا الغالى

[jaber alking]

لالزق ولا لصق المبدع مبدع استاذى وملهمى الاهلاوى الرائع ايمن
تحياتى الك على طول الخط ولا انسى ابدا بما تفضلت بة على من وسام وتقدير
وانت الاهلاوى الذى لايعرف التعصب وانا الزملكاوى
تقديرك لى وسام فى وجة المتعصبين
تحياتى لابداعك ولموضوعك الجميل

[aiman noor eldein]

المشاركة الأصلية كتبت بواسطة ايمن ايمن ايمن

دائما مقالاتك بتعجبنى وبستمتع احلى استمتاع لما بشوفها

تسلــــــــــــــــــــم ناقدنا الغالى

مروركم الكريم دائما ما يسعدنا استاذ أيمن

[aiman noor eldein]

المشاركة الأصلية كتبت بواسطة jaber alking

لالزق ولا لصق المبدع مبدع استاذى وملهمى الاهلاوى الرائع ايمن
تحياتى الك على طول الخط ولا انسى ابدا بما تفضلت بة على من وسام وتقدير
وانت الاهلاوى الذى لايعرف التعصب وانا الزملكاوى
تقديرك لى وسام فى وجة المتعصبين
تحياتى لابداعك ولموضوعك الجميل

أخى الفاضل jaber alking
كان حصولكم على وسام التميز
محصلة طبيعية لتمسككم بالخلق الرياضى القويم
وفزتم به عن جدارة واستحقاق
ولم يكن لنا أبدا فضل عليك
نتمنى أن يقتضى الجميع بك
ويتعلمون منك
المعنى الحقيقى للروح الرياضية

[aiman noor eldein]

- وهذا ما ورد بالموقع الرسمى لجماهير النادى الاهلى اليوم ، عن الكابتن بندق و حقيقة الإعلام الرياضى المصرى ، والذى وصل فيه التعصب والحقد و الكراهية الى حد الثمالة .!!

[YOUTUBE]8wfFphApUWI&feature=player_embedded[/YOUTUBE]

-
- قدم الإعلامي مجدي كامل رئيس أحد المواقع الرياضية درساً في الإعلام الرياضي لمذيعي البرامج الرياضية خاصة بعد أن زاد التلاسن اللفظي بين الجميع خلال المرحلة الماضية وزادت في الفترة الحالية بصورة كبيرة.
وتسائل كامل خلال لقائه بخالد الغندور ما مدي أهمية أن تتحدث أن هناك احتكاك لفظي تم بين أبوتريكه وحكم اللقاء؟ انما هذا هو تصيد للأخطاء. كما أكد كامل أن رد الغندور لكلام المهندس عدلي القيعي هي مسالة شخصية لا تهم الجماهير المتابعة , وسأل الغندور: هل كنت ستقوم بالرد على كلام القيعي لو كان تحدث عن مصطفى يونس؟.

- وكان مجدي كامل صريحاً في تفسيره لتصيد الغندور لأخطاء لاعبي الأهلي , وأكد أن الجميع يتحدث أن هناك قنوات تتبنى فكر النادي الأهلي وتحاول تشتيت انتباه شيكابالا , فخالد الغندور يتبنى وجهة نظر الزمالك ليظهر مؤيداً لجمهور الزمالك.

- وأضاف الإعلامي مجدي كامل أن الإعلام يرصد الحالة فقط ولكننا غرقنا في التفاصيل فما هي أهمية أن تكون كل الأستديوهات تتحدث عن أفعال لا تهدف سوى أن تزيد وقت البرنامج دون أن يستفيد المشاهد.

- وخلال تبرير خالد الغندور لتدخلاته الشخصية أكد أن هناك فروق بين النجوم وضرب مثالاً رائعاً فقد أكد أن الجميع يعلم أن تريكه ليس مثل شيكابالا فشيكا دائم الخروج عن النص ويتطاول ويسب كما ان حسام حسن دائم الاعتراض ويقوم برمي الفانلة غير تريكه صاحب المثل العليا والقيم ودائما كان يوصفونه بالقديس.

- وأكد كامل أن الجميع يجب أن يعامل اللاعبين كبشر , دائما يصيبون وأحياناً يخطئون ويجب أن ننظر إلى الأمام ويجب أن لا نشغل تفكير الناس بأمور ثانوية في ظل الظروف الحالية.

- وتابع مجدي كامل دروسه الهامة بتأكيده أن الإعلاميين يشحنوا الناس و"يسخنوا" الجميع , وهناك أناس يقوموا بتهيئة الأمور للانفجار , وهناك أشخاص يريدون إطفاء هذه الإنفجارات. وأشار أن على الجميع تهيئة الأمور دون تسخين.

- يذكر أن خالد الغندور دخل في تلاسن لفظي مع جميع مقدمي البرامج الرياضية , وكان أخر مشاكله مع الكابتن مجدي عبدالغني بعد أطلق عليه الأخير لقب "قزم" الإعلام ورد عليه الغندور بلقب "مقشة".

[السيدعبدالعزيز]

زادك الله علما وخلقا " استاذ ايمن "
ودائما محمود يكره اللون الاحمر وربنا يهديه .

[السيدعبدالعزيز]

[QUOTE=aiman noor eldein;1391180]- وهذا ما ورد بالموقع الرسمى لجماهير النادى الاهلى اليوم ، عن الكابتن بندق و حقيقة الإعلام الرياضى المصرى ، والذى وصل فيه التعصب والحقد و الكراهية الى حد الثمالة .!!

[YOUTUBE]8wfFphApUWI&feature=player_embedded[/YOUTUBE]

حلقة رائعة ورد رائع من اعلامى رائع .

[aiman noor eldein]

تأكيدا لما كتبه الأخ الفاضل موكشة الصياد هنااااااا