[محمد حماد عيد 11]

السلام عليكم
انا ربنا رزقني بولد وروحت اسبته واطلعله شهادة ميلاد
بعد سنه اكتشفت انهم كاتبين الاسم غلط بدل ما هو معتز محمد حماد
كتبوه معتز محمد حامد
فانا الان عايز اعدل الشهادة ايه المطلوب اني اعمله
وهل يصح اني اعمل شكوي ضد موظفين السجل ولا ايه

[ahmed hassn2012]

اولا ما شاء الله ربنا يخلى
ثانيا بالنسبة للموضوع داه ممكن يأخد منك شويه وقت ومجهود علشان تصح الاسم طبعا افضل انك تعمل داه قبل ما يكبر والموضوع يدخل فى تغير اوراق كثيرة
1- انت حتأخد شهادة الميلاد الاصليه وصور منها ولو معاك شهادة ميلاد كمبيوتر خدها معاك وصورها وصور من بطاقتك الرقم القومى وتروح على السجل المدنى التابع له محل ميلاد الصغير معتز وداه ممكن يكون داخل قسم الشرطة او فى مكان مستقل حسب الاحوال ولاحظ ان ساعات بيكون السجل المدنى التابع لميلاد الطفل فى مكان اخر غير اللى انت ساكن فيه يعنى مثلا ولد فى مستشفى بعيدة عن مكان السكن وقيد بالسجل التابع لمكان المستشفى
2- حتروح على موظف او موظفه المختص بتصحيح الاسماء بالسجل المدنى وتطلب تصحيح اسم نجلك من خلال طلب يقوم هو بتحريره وحيطلب منك اصل وصور للاوراق اعلاه وسيتم رد الاصول وحيطلب منك الحضور بعد وقت معين ممكن اسبوع او اكثر او اقل حسب الاحوال
وممكن يطلب منك الذهاب الى مركز المعلومات الرئيسى وقد يتم التعديل داخل مركز المعلومات ويتم استخراج شهادة ممكينه بعد التعديل بثلاث ايام
3- الطلب اللى انت مقدمه من خلاله يبان هل الخطأ فى شهادة الميلاد داخل سجل المواليد نفسه وداه الاقرب والاصعب فى تصحيحه ولا خطأ فى كتابة شهادة الميلاد فقط وداه احتمال وسهل التصحيح .
بمعنى ان لو الخطأ فى الشهادة فقط وفى السجل الاسم صحيح يتم التصحيح مباشرة
اما اذا كان الخطأ فى الاسم داخل السجل فانت مضطر الى تقديم طلب تصحيح الاسم من
معتز محمد حامد الى معتز محمد حماد وحترفق معاه اصل شهادة الميلاد و شهادة الكمبيوتر المميكنه وصور البطاقة الخاصة بك ودفع رسوم الطلب وتكتب اقرار بصحه اسمه وداه حيأخد وقت لان الطلب حيروح الادارة الرئيسية وهى اللى حتعرض الامر على لجنة تصحيح القيود واللجنة تصدر قرار بالتعديل
4- انت حتابع مع موظف او موظفه السجل المدنى هل الطلب رجع وتم البت فيه ولا لسه
5- واخير اذا رجع الطلب وتم البت فيه حيقولوا لك انتظر يومان او ثلاث وتروح تتطلع مستخرج كمبيوتر (شهادة ميلاد كمبيوتر ) وحتابع الاسم الصحيح وانت كدة عملت اللازم
ملاحظة انت ممكن تعمل الموضوع داه بنفسك او من خلال محامى ولكن بتوكيل خاص لتصحيح الاسم بشهادة الميلاد وليس توكيل عام
دى كل الاجراءات والموضوع كما ذكرت ممكن يأخد شويه وقت ومجهود فى تقديم الطلب والمتابعه
تقبل تحياتى

[محمد حماد عيد 11]

شكرا لحضرتك استاذ احمد فيه معلومه هقول لحضرتك عليها
1- الاسم في شهادة الميلاد فقط مكتوب خطا
اما في الاخطار مكتوب صح
2-انا معملتش له شهادة كمبيوتر مازالت ورقيه
3-هو مقيد في سجل المواليد التابع لقريتي يعني المستشفي بجوار المنزل بتاعي انا تماما
تقبل تحياتي

[ahmed hassn2012]

لو فعلا الخطا فى الشهادة حيكون التصحيح سهل وداه ممكن يتم فى مركز المعلومات الرئيسى حياخدوا الشهادة الورقيه ويقولوا لك استخرج شهادة كمبيوتر بعد ثلاث ايام
ولا تنسى طابع مواليد من البوستة اللى بيطلب عند استخراج شهادة ميلاد كمبيوترلاول مرة للصغير
بس المهم يكون الخطأ فى الشهادة وليس فى السجل المدون به المواليد والا سوف تسير بالطريقة اعلاه
بالتوفيق ياغالى

[محمد حماد عيد 11]

ربنا يوفقك يا غالي وشكرا لمجهودك