[مصطفى طرابية]

ليه النهارده الدُنيا هوجه ملخبطه
جُــوَّا الميدان
ومطالب الثـُـوَّار طلاسِم شخبطه
فوق الحيطان
بعد امَّا كانـُوم في يناير
يد واحده وصدر فايِّر
والقلوب مِتـْرَبَّـطه
نفس الهتاف نفس الهدف
يمكن لـُقاهُم كان صُدَف
مش ترتيبات متخططه
إتجمَّعُوا ف نفس المكان
جُوَّا الميدان
وكأن كان محطوط رادار
عامل شرار
هُوَّا اللي كان بيلمُهُم
على كلمه واحده تضـُمُهُم
في حُضنها
كلمة ( وطن )
غالي عليهُم كلـُّهُم
دلوقتي ليه متفرَّقين
ناس في الشمال أو في اليمين
خلوا الولاد متشتتين
خلوا البلاد متقسِّمين
دستور جديد واللا انتخاب
ديمقراطيَّه واللا حلم فوق سحاب
والبلد نبنيها واللا نسيبها للموت والخراب
قاعدين تخانقوا ف بعضـُكوُ
وكلاب كتير قاعدين قـُرَيِّب مِنـُّكوُ
متحفزين وسط الضباب
علشان تنـُط تعُضـُّكوُ
..................
والفرصه جت للمجرمين
والمأجورين
يتغلغِلوا زي الشيطان
جُوَّا الميدان
وانتم هناك مش دريانين
بالمزروعين
م الأمريكان
بيساعدوا أزيال النظام
بيخططوا لينا عشان
نبقى ف بلدنا مقسِّمين
ناس في الشمال أو في اليمين
أو ناس مابينهُم محتارين
دقـُّوا الأسافين وسطِنا
مابين شبابنا وشعبنا
ويشكـِّكونا ف دِرعنا
عاوزين يهدُّوا حيطه حاميه ضهرنا
مفضلشي غير جيشنا العظيم
سيفنا اللي حامي مصرنا
لو قدروا على زرع الشكوك
في جيش وفيه إبني وأخوك
نضعف ونبقى زى صيد
تايه شريد
في كل خطوه يقابله شوك
يبعد بعيد
واما يبان واقف وحيد
يهجم عليه كل الكلاب المسعورين
إللى هينهش منه إيد
واللي الدماغ والفخدتين
واللي الرجول بالعضمتين
..................
يا شعب مصر الطيبيبن
عاوزين تروحوا لحد فين
وبدال ما تبقوا قـُرَيِّبين
والثوره فاضل ع الهدف
أسابيع بسيطه وموش سنين
خلـُّوا الإيدين ماسكه الإيدين
واقضوا على فلول النظام
والمجرمين والمُعتدين
خلـُّوا حمامات السلام
من غير جناحات مجروحين
علشان يطيروم مرتاحين
من غير أنين
من غير آلام
................
يا أهل مصر المُشتاقين
حريه وعداله وحياه
لازم تآمنوم باليقين
إن احنا لو متفرَّقِين
والكل عن ثورتنا تاه
هيتوه معاه ناس مطحونين
سايح عرقهُم ع الجباه
واما الشباب قاد ثورته
قام كلهم وقفوم معاه
متشوقين
يبقوا ف حياتهم مستورين
مش مقهورين
قاموا يوميها وهللوا
بدموع ف عينهم فرحانين
والجو بيهم صار طوفان
والدنيا بقيِّت هيلمان
شعروا بإن الوقت حان
تبقى البلد عايشه ف أمان
بس النهارده وللأسف
بعد امَّا حِدْنا م الهدف
الدنيا بقيِّت لخبطه
جُوَّا الميدان
ومطالب الثوَّار طلاسم شخبطه
فوق الحيطان
وكلاب كتير مِتشعبطه
فوق البيبان
مستنيين المعجنه
علشان يخشوا كلهُم زي الجعان
وبدال ما ثورتنا ابتدت جُوَّا الميدان
ترجع تضيع من نفسها
وبأهلها
وبجهلها
جُوَّا الميدان
ــــــــــــــــــــ
***************

[landies]

شعر اكثر من رائع والله بجد جميل انا عندي اقتراح بجد لو تقدر تسجلة بصوت شخص يكون عندة مقدرة القء الشعر ومع خلفية موسيقية وده سهل من خلال البرامج خلفية صوت هتاف من هتاف حقيقي لميدان التحرير لانه بجد شعر اكثر من رائع وكمان انا بحب الشعر الحر

[hasbo25]

وبدال ما ثورتنا ابتدت جُوَّا الميدان
ترجع تضيع من نفسها
وبأهلها
وبجهلها
جُوَّا الميدان

[الكومى]

كلمات اكثر من رائعه

بارك الله فيك