[osamasaad]

قريت النهاردة موضوع شيق حول تطوير قناة النيل للاخبار و كتبت الرد ده

بارك الله فيكم يا شباب فتحتم نفسى انى اقول شوية اسرار عن قناة النيل للاخبار و قطاع الاخبار كله بما انى متابع اخبارهم و اسرارهم عن قرب و يمكن ما تلاقوش الاخبار دى فى مكان تانى و اللى مش عاجبه يشرب من اقرب ترعة معفنة جنبه
اولا خطة التطوير مش جديدة دى من ساعة تغيير منظومة الاعلام اللى بيسموها منظومة و كان مقرر تعيين حوالى 300 شخص و فكروا يعملوا مسابقة رسمية تنزل اعلاناتها لى الاهرام بعد غياب و الى ما ذلك لكنهم اتراجعوا و قرروا عمل مسابقة " زيتنا فى دقيقنا " المشهورة انتم طبعا عارفين انها بتقام على اقوى المقاييس العلمية و تقدم جيش من ابناء العاملين و العاملات و طبعا العاملات كانوا اكتر بكتير و بلغ العدد المتقدم خمسة الاف بالتمام و الكمال بينهم واحد كفيف ( و الله مش هزار ده بجد ) و انا لا اسخر من اخوتى الذين يعانون من فقدان البصر لكن هو ده اللى حصل فعلا اما المسابقة الرسمية ( برضه كانت زيتنا فى دقيقنا ) فكانت مسخررة حقيقية لان المعيار فيها ماكانش ده بيتكلم لغة و الا ده خريج ايه لكن كان الكارت اللى جايبه ده منين و بعدين حاجة غريبة جدا فى اغلب الجايين لانهم كانوا خريجى طب طيب ده يعنى ايه جاوبوا على كده
و بعدين اللى نجحوا كانوا 30 و المطلوب 300 يعملوا ايه يا حبايبنا الحلوين ؟؟ بالضبط ده اللى حصل حبايبنا الحلوين اتدخلوا بقوة و جابوا ابن اللواء كذا و قريب العميد الفلانى بحجة ضمان الولاء الكامل اما الغلبان الكفيف فقد تم تعيينه فى اغرب منصب سمعت عنه و اسمه مترجم لغة الاشارة طيب و ايه الصلة اذا كان الاخ كفيف البصر قالوا هوه كده و اللى مش عاجبه يروح يقول اسرارنا لصحف المعارضة و هوه او هى عارف او عارفه هانجيبه او هانجيبها ازاى و العبارة واضحة
و بعدين نيجى للجانب الاهم يعنى اللى فعلا هايظهروا على الشاشة و رغم ان عددا من المذيعين مشيوا الى قنوات اخرى لكن اللى حصل مش تعيين وجوه جديدة لكن اسناد ادوارهم الى اخرين لدرجة انهم جابوا واحدة كانت طالعة على المعاش و قرروا انها تصلح لتعليم الصغار ؟؟
تعالوا بقه للحاجات الحلوة : تم تغيير الشخص اللى بينسق مع الوكالات الاجنبية بعدما ريحته فاحت و طبعا مش هاقول اسمه او اسمها ايه لكن باعينى الريحة فاحت و انكشفت المبالغ الشهرية اللى بالدولار اللى بتجيى من الايه بى( وكالة الاسوشيتدبريس للاخبار التليفزيونية ) للمنسقين طيب علشان ايه يا حلوين ؟؟ علشان يوافق انه ياخد منهم تقارير يوميا و التقرير قيمته 2500 دولار امريكى طبعا مش مصرى مضروب و كان بياخد من الايه بى شهريا 3 الاف دولار كوميشين حلال طبعا " ده رزقى و رزق عيالى " و لما الوكالة تدى تقريرين فى اليوم بخمسة الاف دولار اميركى برضه يبقى فى الشهر يا حلوين بكام ؟؟ و لما تدى منهم 3 الاف بس للمسكين او المسكينة المنسق يبقى الوكالة خسرانه و الا كسبانة ؟؟ اضربوا خمسة فى 30 يوم و انتم تعرفوا الفارق و بعدين تم فى اجتماع سرى مناقشة امكانية ايقاف اخذ تقارير من الايه بى لكن المنسق المكشوف دافع بشدة لان الوكالات بياخدوا منها الحاجة جاهزة و بالترجمة العربية امال البهايم اللى فى قطاع الاخبار بيهببوا ايه مش عارف
و تبعا لخطة التطوير عايزين مترجمين فورى و هنا المهزلة الاكبر تم اختبار 50 شاب و فتاة لاختيار 3 منهم و بالنهاية احد اللى نجحوا نجاحا باهرا كان كفيف برضه لكنه و الحق يقال و حسب الراوى لا يمكن منافسته الكلمة الاجنبية تخرج و ترجمتها كانه بيقرا الشفايف ماشاء الله عليه و ربنا يحرسه فعلا احسن من اى مفتح او مبصر لكن المشكلة انه كفيف و اتغلبوا على المشكلة دى بانه هايحطوا سماعة على طول فى ودنه ياخد منها الصوت اللى جاى علشان يترجمه
بالنسبة لصنع لوجو القناة الجديد تم اسناده بالامر المباشر و بدون مناقصة او يحزنون الى قريب السيدة سميحة دحروج زوجة السيد حسن حامد رئيس الشركة المصرية للاقمار الصناعية اللى بيعمل حاليا على تطفيش صلاح حمزة مهندس التعاقدات و حكاية اللوجو لوحدها اتصرف عليها 50 الف جنيه مع ان التكلفة الحقيقية لا تتعدى خمسة الاف جنيه و انتم عارفين الباقى بقه يا حبايبى الحلوين و على فكرة النيل للاخبار اشترت رسميا من الجزيرة القطرية اجهزة بث اتش دى بنص التمن لان الجزيرة كانت عايزة تتخلص منها لانها هاتستورد اجهزة جديدة و نص الاجهزة اللى فى المخازن بصناديقها صدت من عدم الاستعمال فى مخزن 6 المشهور
و كفاية كده علشان الله سبحانه و تعالى ستار حليم و المصدر اللى اخدت منه الاخبار دى قال لى ان فيه ناس بيقروا اللى بينزل فى كل المواقع المصرية خاصة عن التليفزيون و بيعرفوا مين اللى سربه و انا شخصيا مستعد لانهم يعرفوا شخصيتى و اسمى اسامه سعد و ياريت الادارة هنا تسمح بانى احط رقم تليفونى مش للدعاية لكن لاستعمال المسئولين باتحاد الاذاعة
ملاحظة اخيرة :
ياريت بتاع اللب اللى ما يتسمى ما يعلقش علشان ما افحضهوش هنا و هو عارف انا باتكلم عن ايه و اياك اسمع منك تعليق و الا هاطلع دين اللى خلفوك لانى صبرت على صرار زيك لفترة طويلة و قلت خلينى مؤدب لكن يبدو ان لغة الادب مش جايبة حاجة هنا و تحذير اخير له انه لا يعلق على الكلام ده لانه صغير قوى على الحاجات دى فاهم يا مشمش قصدى يا هيماس مش اصحابك بيقولوا لك كده

[م محمد الجنـدى]

الكلمة . الطيبة . صدقة

[osamasaad]

انا معاك تماما و لكن لما واحد شتمنى هنا ما حدش دافع او قال له دى مش اصول و علشان كده اضطريت اتكلم معاه بلغته فقط ما عملتش حاجة غير كده و على فكرة هو اللى بدا و انا كنت باحط معلومات فقط و ما شتمتش فى حد خليه بس يحاول يرد عليا و انا هاعلمه الادب على حق

[م محمد الجنـدى]

المشاركة الأصلية كتبت بواسطة osamasaad

انا معاك تماما و لكن لما واحد شتمنى هنا ما حدش دافع او قال له دى مش اصول و علشان كده اضطريت اتكلم معاه بلغته فقط ما عملتش حاجة غير كده و على فكرة هو اللى بدا و انا كنت باحط معلومات فقط و ما شتمتش فى حد خليه بس يحاول يرد عليا و انا هاعلمه الادب على حق

اخى الكريم ... قل . حسبى الله ونعم الوكيل . رواه ابو داود .

ويقول صلى الله عليه وسلم . من كان يؤمن بالله واليوم الاخر

فليقل خيرا او ليصمت . رواه البخارى ومسلم .

خالص تقديرى وتحياتى

[osamasaad]

اشكرك يا اخى العزيز على اللغة الراقية هذه و لكن المشكلة فى البعض الاخر الذى يقابل الملعومة بالسخرية و قد اشتكى لى الاخ الفاضل احمد ابو مسلم مؤخرا فى مكالمة هاتفية مطولة من اسلوب البعض فى مقابلة المعلومة بالسخرية عكس بعض المنتديات الاخرى خاصة العربية و التى لا اريد ذكر اسمها هنا فهم يتعاملون بكل احترام مع كل معلومة او طلب حتى لو كان تافها عموما يا صديقى اعتذر لك عن لغتى لكنى لا اجد كثيرين فى مثل ادبك و تحضرك هنا و انت اخجلتنى من نفسى بهذه الكلمات لكن صدقنى لن ابخل بمعلومة على هذا المكان و بالنسبة لمن لا يعجبه لا يهمنى المهم ان المعلومة توصل و يستفيد منها الجميع
بارك الله فيك و عافاك امين انشاء الله

[م محمد الجنـدى]

اخى الكريم ..

جزاك الله خيرا . رواه الترمذى .

خالص حبى وتقديرى واحترامى وتحياتى